Read Buku Loyera - Chichewa Mphu. 22 Bible Online

Mphu. 22 - Buku Loyera - Chichewa bible

Mphu. 22

¹Za munthu waulesi Mlesi ali ngati mwala wonyansa, aliyense amamseka chifukwa cha kuipa kwake.

²Mlesi ali ngati ndoŵe yonyansa, amene waitola, amasamba m'manja. Za ana oleredwa moipa

³Kukhala bambo wa mwana wamwamuna wopanda mwambo, ndi chinthu chochititsa manyazi, ndipo kubadwa kwa mwana wamkazi ndi tsoka[1].

⁴Mtsikana wanzeru amapeza banja, koma mtsikana wopanda manyazi amavutitsa bambo wake.

⁵Mkazi wachipongwe amachititsa manyazi bambo wake ndi mwamuna wake. Ndipo onsewo amamnyoza.

⁶Kulangiza pa nthaŵi yosayenera kuli ngati nyimbo pa maliro, koma kulanga kapena kukwapula nkofunika nthaŵi zonse. Za nzeru ndi uchitsiru

⁷Kuphunzitsa chitsiru kuli ngati kumata mbiya yophwanyika ndi phula, kulinso ngati kudzutsa munthu amene wagona tulo tofa nato.

⁸Kulankhula ndi chitsiru kuli ngati kulankhula ndi munthu woodzera. Ukangotsiriza kulankhula chimafunsa kuti, “Mukuti chiyani?”

⁹Ana oleredwa ndi mwambo aiŵalitsa anthu kuti makolo anali anthu osauka.

¹⁰Koma ana osokonezeka, onyada ndi opanda mwambo amapeputsa ulemu wa makolo ao.

¹¹Munthu wakufa umulire, chifukwa wasiya kuŵala kwa dzuŵa. Chitsiru uchilire, chifukwa chasiya nzeru zake. Munthu wakufayo usamulire kwambiri pakuti wapeza chiwuso. Koma chitsiru moyo wake umaipiratu kupambana imfa.

¹²Maliro olira anthu akufa amakhala a masiku asanu ndi aŵiri. Maliro olira anthu opusa ndi osasamala za Mulungu, amakhala a masiku onse a moyo wao.

¹³Usamalankhule kwambiri ndi chitsiru, kapena kukacheza kwa munthu wopusa. Chenjera naye kuti ungagwe m'mavuto ndipo kuti angakudetse pokhudzana naye. Ngati ufuna mtendere umlewe, ndipo uchitsiru wake sudzakutopetsa.

¹⁴Kodi pali chinthu cholemera kuposa mtovu? Inde chilipo, dzina lake nchitsiru.

¹⁵Mchenga, mchere, ndi kamphumphu ka chitsulo nkwapafupi kuzisenza kupambana kupirira munthu wopusa.

¹⁶Mtanda wa nyumba womangidwa bwino sugwedezeka ndi chivomezi. Chimodzimodzi mtima woganiza mwanzeru sugwedezeka pa mavuto.

¹⁷Mtima woganiza mwanzeru uli ngati makaka a utoto pa khoma losalala.

¹⁸Monga momwe mpanda wa pa phiri sungathe kulimba ndi mphepo, chonchonso mtima wa chitsiru wonjenjemera ndi maganizo ake omwe sungalimbike konse ukapeza choopsa. Za chibwenzi

¹⁹Ukathopsola mnzako m'maso, amadza misozi. Ukabaya mnzako mu mtima, amatulutsa zakukhosi.

²⁰Ukaponya mwala kuti ulase mbalame, zonse zimathaŵa. Ukanyoza bwenzi lako, chibwenzi chanu chidzatha.

²¹Ukasololera lupanga bwenzi lako, usataye mtima, pali mwai woti nkuyanjananso.

²²Ngati wayambana ndi bwenzi lako, usavutike, mungathe kuyanjananso. Koma kunyoza, chipongwe, kuulula zachinsinsi, ndi kumjeda, zonsezi zimathetsa chibwenzi chilichonse.

²³Mnzako azikukhulupirira pamene ali mmphaŵi. Akadzapeza bwino, udzasangalala naye. Umthandize pa mavuto, mwina nkudzalandirako kanthu iye atapeza chuma.

²⁴Moto usanayake m'ng'anjo, mumayamba mwatuluka nthunzi ndi utsi, chimodzimodzi kumenyana kusanayambe, kumayamba nkunyozana.

²⁵Sindidzachita manyazi kutchinjiriza bwenzi langa, sindidzamfulatira konse.

²⁶Koma ngati choipa chindigwera chifukwa cha iye, aliyense amene adzazimve, adzayamba kuchenjera naye. Za kukhala maso

²⁷Ndani adzandithandiza kulonda pakamwa panga, ndani adzandithandiza kusokerera kwamphamvu milomo yanga, kuti ndisati ndilakwe, ndisaonongeke ndi zokamba zanga?