Read Buku Loyera - Chichewa Mphu. 23 Bible Online

Mphu. 23 - Buku Loyera - Chichewa bible

Mphu. 23

¹Za pemphero Ambuye, ndinu Atate, ndinu Mwini wa moyo wanga, musandisiye kuti nditsate mau aliwonse a m'kamwa mwanga. Musalole kuti andilakwitse.

²Ndani adzandithandiza kuyendetsa maganizo anga mosamala, ndani adzandithandiza kuika nzeru ndi mwambo mu mtima mwanga, kuti zisandilekerere m'zolakwa zanga, ndipo zisalephere kundidzudzula chifukwa cha machimo anga?

³Tsono zolakwa zanga sizidzachuluka, ndipo machimo anga sadzakula. Choncho sindidzagwa pansi pamaso pa adani anga, ndipo sadzandiseka.

⁴Ambuye, ndinu Atate, ndinu Mulungu wa moyo wanga, musalole kuti ndikhale wonyada,

⁵Chotsereni zilakolako zoipa.

⁶Ndisakhale wadyera ndi wokonda zadama, musalole kuti ndivomere zilakolako zochititsa manyazi. Za kulumbira

⁷Ana anga, mverani malangizo anga pa za kusunga pakamwa. Wosunga malangizo ameneŵa sadzapalamula.

⁸Munthu wochimwa amakodwa m'mau ake omwe. Anthu osinjirira ndi amwano amagwa ndi mau ao.

⁹Pakamwa pako pasazoloŵere kulumbira pasamanzemanze kutchula dzina la Woyera uja.

¹⁰Kapolo wokwapulidwa nthaŵi zonse salephera kukhala ndi mikwingwirima, chimodzimodzi munthu wokonda kulumbira ndi kutchula dzina la Mulungu ameneyo sangalephere kuchimwa.

¹¹Munthu wokonda kulumbira amadzaza ndi machimo, ndipo mkwapulo sudzachoka m'nyumba mwake. Akalephera kuchita zimene adalumbira, akhalabe ndi tchimo. Akachita kunyozera zimene adalumbirazo, achimwa moŵirikiza. Ngati adalumbira monyenga sadzamkhululukira, ndipo m'nyumba mwake mavuto adzachita kudzaza. Za nkhani zonyansa

¹²Pali kulankhula kwina kumene kuli ngati imfa. Zoterezi zisamapezeka pakati pa zidzukulu za Yakobe! Paja zimenezi zili kutali ndi anthu okonda Mulungu, iwo sakondwera m'machimo.

¹³Usazoloŵere kumakamba nkhani zoipa ndi zonyansa, chifukwa mau ake ali ndi uchimo.

¹⁴Ukakhala pakati pa anthu omveka uzikumbukira bambo wako ndi mai wako, kuwopa kuti ungadziiŵale pamaso pa akuluakuluwo, kuyamba mkhalidwe wauchitsiru. Pambuyo pake nkumaganiza kuti kukadakhala kwabwino udakapanda kubadwa, kenaka nkumatemberera tsiku udabadwa.

¹⁵Munthu wozoloŵera kulankhula mau ochititsa manyazi sadzathanso kulankhula zabwino mpaka kufa kwake. Za machimo a dama

¹⁶Pali mitundu iŵiri ya anthu ochulukitsa machimo, palinso mtundu wachitatu wa anthu odziitanira chilango. Chilakolako choipa chili ngati moto woyaka umene suzimika mpaka utatentha zonse. Munthu wochita chigololo ndi wachibale wake sadzaleka mpaka moto utampsereza.

¹⁷Kwa munthu wadama akazi onse ngokoma, ndipo sadzalekeza dama lake mpaka kufa.

¹⁸Munthu wochimwira ukwati wake amati, “Ndani angandiwone? Ponseponse pali mdima, ndipo zipupa zikundibisa. Palibe wondipenya, ndivutikirenji? Ngakhale Mulungu Wopambanazonse sadzasamalako za machimo anga.”

¹⁹Munthu ameneyu amangoopa maso a anthu anzake. Amaiŵala kuti maso a Ambuye ndi oŵala kwambiri kupambana m'mene limaŵalira dzuŵa. Amapenya zonse zimene anthu akuchita, amapenya ngakhale zinthu zobisika.

²⁰Dziko lisanalengedwe, Ambuye ankalidziŵa, atatsiriza kulilenga, akulidziŵabe.

²¹Munthu wochimwa ameneyo adzalangidwa poyera mu mzinda, atamugwira pamene iye sakuyembekeza konse. Za mkazi wachigololo

²²Ndi m'mene alirinso mkazi wosakhulupirika kwa mwamuna wake, amatha kubereka mwana woloŵa chuma ndi mwamuna wina.

²³Choyamba, waswa lamulo la Mulungu. Kachiŵiri, wachimwira mwamuna wake. Kachitatu, wadzisandutsa wadama pochita chigololo, ndipo wabereka ana am'thengo.

²⁴Adzamzenga mlandu pamaso pa gulu, ndipo chilango chidzagwera ana ake.

²⁵Ana ake sadzazika mizu ndipo nthambi zake sizidzabereka zipatso.

²⁶Adzamkumbukira momtemberera, ndipo manyazi sadzamchoka.

²⁷Motero onse am'tsogolo adzadziŵa kuti palibe kanthu kena kabwino kupambana kuwopa Ambuye. Palibedi chabwino china choposa kumvera Malamulo a Mulungu.