Read Buku Loyera - Chichewa Mphu. 24 Bible Online

Mphu. 24 - Buku Loyera - Chichewa bible

Mphu. 24

¹Za kulemekeza Nzeru Nzeru zimadziyamika zokha ndipo zimadzinyadira pakati pa anthu ake.

²Nzeru zimalankhula pa msonkhano wa Mulungu Wopambanazonse, ndipo zimadzinyadira pamaso pa Mulungu Wamphamvuzonse.

³Zimati, “Ine ndidatuluka m'kamwa mwa Mulungu Wopambanazonse, ndidaphimba dziko lapansi ngati nkhungu.

⁴Ndinkakhala m'thambo lakumwamba, chipilala cha mtambo ndiye chinali mpando wanga waufumu.

⁵Ndekhandekha ndidazungulira mlengalenga, ndipo ndidayenda m'maphompho ozama.

⁶Ndinkalamulira mafunde a pa nyanja, ndiponso dziko lapansi, ndinkalamuliranso anthu a mitundu yosiyanasiyana.

⁷Monsemo ndidafunafuna popumulira.

⁸Pamenepo Mlengi wa zinthu zonse, adandipatsa malangizo, Iye amene adandilenga ine adandilozera pomanga hema langa. Adati, ‘Kakhale m'dziko la Yakobe, Aisraele akakhale anthu ako.’

⁹Adandilenga poyambayamba ndithu nthaŵi isanayambike, ndipo ndidzakhalapo mpaka muyaya.

¹⁰Ndinkamutumikira m'chihema choyera chija, motero ndidakhazikika m'Ziyoni.

¹¹Tsono adandikhazika mu mzinda umene ankaukonda, nkundipatsa ulamuliro mu Yerusalemu.

¹²Ndidakhazikika pakati pa anthu olemekezeka, m'chigawo cha Ambuye amene ndi choloŵa chao.

¹³Kumeneko ndidakula ngati mkungudza wa ku Lebanoni, ngati mtengo wa paini wa ku Heremoni.

¹⁴Ndidakula ngati mgwalangwa wa ku Engedi ndipo ngati zitsamba za maluŵa a roza a ku Yeriko. Ndidakula ngati mtengo wa olivi m'chigwa, ndidatalika ngati mtengo wamba wookedwa m'mbali mwa mtsinje.

¹⁵Ndinkanunkhira bwino ngati mtengo wa kasiya ndi wa sinamoni. Fungo langa linkafalikira ngati mure wabwino, ndiponso ngati zonunkhira za galbanumu, onika ndi stakite. Ndinali ngati utsi wa lubani wonunkhira bwino m'chihema choyera chija.

¹⁶Ndinkatambalitsa nthambi zanga ngati mtengo wa mbwemba ndipo nthambi zangazo zinali zokhwima ndi zokongola.

¹⁷Ndinkaphukira bwino ngati mpesa, ndipo maluŵa anga ankabereka zipatso zokoma ndi zochuluka.

¹⁸Ine ndine mai wake wa chikondi chokoma, wa kuwopa, wa nzeru ndi wa chikhulupiriro. Poti ndine wamuyaya, amandipereka kwa ana onse amene Mulungu adaŵasankha.

¹⁹Bwerani kwa ine inu amene mumakhumbira ine, dzadyeni zipatso zanga mpaka kukhuta.

²⁰Kukumbukira ine kumakoma koposa kutsekemera kwa uchi, kukhala ndi ine kumakoma koposa chisa cha uchi.

²¹Munthu wodya ine adzalakalaka kwambiri kundidyanso. Munthu womwa ine adzalakalaka kwambiri kundimwanso.

²²Munthu womvera Ine sadzagwa m'mavuto, ndipo otsata zimene ine ndimafuna sadzachimwa.” Za nzeru ndi Malamulo

²³Zonsezi ndi Buku la Chipangano cha Mulungu Wopambanazonse, Malamulo amene Mose adapereka, kuti akhale choloŵa cha magulu a Yakobe.

²⁴Musaleke kulimbika mwa Ambuye, muphathane nawo kuti akulimbitseni. Ambuye amphamvuzonse Iwo okha ndiwo Mulungu, palibenso mpulumutsi wina koma Iwo okha.

²⁵Amatumiza nzeru mosefukira ngati mtsinje wa Pishoni, kapena ngati mtsinje wa Tigrisi pa nyengo ya zipatso zoyamba.

²⁶Zimasefukira ngati mtsinje wa Yufurate kapena mtsinje wa Yordani pa nyengo yokolola.

²⁷Amapereka malangizo osefukira ngati mtsinje wa Nailo, kapena ngati Gihoni pa nyengo yothyola mphesa.

²⁸Monga amene adayamba kuphunzira za nzeru sangazimvetse kotheratu, momwemonso wotsirizira sangazindikire kuzama kwake.

²⁹Paja maganizo ake ndi aakulu kupambana nyanja, ndipo zolinga zake ndi zozama kupambana phompho lakuya.

³⁰Ine ndakhala ngati ngalande yotenga madzi amumtsinje, ngati njira ya madzi yokaloŵa m'dimba.

³¹Ndidati, “Ndikukathirira munda wanga wa zipatso, ndikukathirira maluŵa anga.” Koma mwadzidzidzi ngalande yanga idasanduka mtsinje, ndipo mtsinje wanga udasanduka nyanja.

³²Ndidzaphunzitsanso mwambo wanga kuti uŵale ngati mbandakucha, kuŵala kwake kuwoneke patali.

³³Ndidzalalikanso maphunzitso a Mulungu ngati zolosa, ndi kuŵasiyira mibadwo yakutsogolo.

³⁴Zoonadi, sindidadzigwirire ntchito ine ndekha, komanso ena onse amene amafunafuna nzeru.