Read Buku Loyera - Chichewa Mphu. 25 Bible Online

Mphu. 25 - Buku Loyera - Chichewa bible

Mphu. 25

¹Za mwamuna wabwino ndi mwamuna woipa Pali zinthu zitatu zimene zimasangalatsa mtima wanga, zimenenso zimakondweretsa Mulungu ndi anthu onse. Zinthu zake ndi izi: chiyanjano pakati pa abale, chibwenzi pakati pa anthu oyandikana, ndipo mwamuna ndi mkazi okhalitsana bwino.

²Pali anthu a mitundu itatu amene ndimadana nawo amene moyo wao umandinyansa kwambiri. Anthu ake ndi aŵa: munthu wosauka amene ali wonyada, munthu wolemera amene ali wonama, ndipo nkhalamba yokonda zigololo imene ilibe nzeru.

³Ngati sudapeze kanthu ukali mwana, kodi ungapate kanthu bwanji utakalamba?

⁴Kuganiza mwanzeru kumaŵakhala bwino anthu aimvi, ndipo kulangiza ena bwino kumazikhala bwino nkhalamba.

⁵Nzeru zimaŵakhaladi bwino anthu okalamba ndipo khalidwe lakumvetsa ndi lauphungu limaŵayenerera akuluakulu olemekezeka.

⁶Ulemerero wa munthu wokalamba wagona pa kudziŵa zinthu zambiri, ndipo chimene amanyadira nkuwopa Ambuye.

⁷Pali zinthu zisanu ndi zinai zondisangalatsa mtima, palinso china chakhumi chimene ndichita kunena: munthu wonyadira ana ake, munthu wotha kuwona kugwa kwa adani ake iye akali moyo.

⁸Ngwodala mwamuna amene ali ndi mkazi wanzeru, ngwodala mlimi amene saphatikiza ng'ombe ndi bulu polima ndi pulao, ngwodala munthu amene sanachimwepo polankhula, ngwodalanso munthu amene sadagwirire ntchito munthu woluluka koposa iye.

⁹Ngwodala munthu amene ali ndi nzeru zabwino, munthu woti akalankhula anzake amatchera khutu.

¹⁰Ngwamkuludi munthu amene wapeza nzeru, komabe munthu woopa Ambuye palibe amene angampose.

¹¹Kuwopa Ambuye kumapambana zonse. Kodi munthu woopa Ambuye tingamfanizire ndi yani?

¹²Kuwopa Ambuye ndiye chiyambi cha kuŵakonda Ambuyewo, ndipo chikhulupiriro ndiye chiyambi cha kuphathikana nawo. Za mkazi woipa

¹³Bala lililonse chabwino, koma osati bala lokhala mu mtima. Njiru iliyonse chabwino, koma osati njiru ya munthu wamkazi.

¹⁴Vuto lililonse chabwino, koma osati vuto lochokera kwa odana nawe. Kulipsira kulikonse chabwino, koma osati kulipsira kwa mdani.

¹⁵Palibe ululu woopsa kupambana wa njoka, ndipo palibe mkwiyo woopsa kupambana mkwiyo wa mdani.

¹⁶Ndi bwino kukhala pamodzi ndi mkango kapena chinjoka, kupambana kukhala pamodzi ndi mkazi woipa.

¹⁷Mkazi akakwiya, maonekedwe ake amasinthika, nkhope yake imaoneka ngati ya chimbalangondo chaukali.

¹⁸Mwamuna wake amapita kukadya nawo kwa anzake, sangaleke kudandaula kwambiri.

¹⁹Choipa china chilichonse si kanthu, kuyerekeza ndi njira ya mkazi. Tsoka la anthu ochimwa ligwere mkaziyo.

²⁰Monga momwe imavutikira nkhalamba pokwera phiri lamchenga, ndi m'menenso amavutikira mwamuna wofatsa ndi mkazi wolongolola.

²¹Usatengeke naye mtima mkazi wokongola, ndipo usakhumbire mkazi wachuma.

²²Ngati ndi mkazi amene akupeza ndalama zofunikira pa banja, zotsatira zake ndi mkwiyo, kulongolola ndiponso manyazi aakulu.

²³Manyazi, nkhope yotsika, ndi kupwetekedwa mtima ndizo zimene amabweretsa mkazi wanjiru. Manja aulesi ndi maondo olobodoka, ndizo zimene amabweretsa mkazi wosasangalatsa mwamuna wake.

²⁴Tchimo lidayamba ndi munthu wamkazi. Ngati tonsefe timafa, nchifukwa cha iyeyo.

²⁵Usalole madzi kutayikira pa mng'alu. Usalolenso mkazi woipa kumalankhula mwamwano.

²⁶Ngati sachita zinthu monga m'mene ukulamulira iweyo, usiyane naye.