Read Buku Loyera - Chichewa Mphu. 26 Bible Online

Mphu. 26 - Buku Loyera - Chichewa bible

Mphu. 26

¹Za Akazi Ngwodala mwamuna amene ali ndi mkazi wabwino, mkazi wotere amaŵirikiza masiku a moyo wa mwamuna wake.

²Mkazi wokhulupirika amasangalatsa mwamuna wake, ndipo mwamunayo adzakhala ndi mtendere pa moyo wake wonse.

³Mkazi wabwino ndi dalitso lalikulu, ndi imodzi mwa mphatso zamtengowapatali, zimene Ambuye amasungira anthu oŵaopa.

⁴Ngakhale alemere kapena asauke, anthu ameneŵa adzakhala okondwa, nthaŵi zonse adzaoneka osangalala.

⁵Pali zinthu zitatu izi zimene mtima wanga umaopa, ndi china chachinai chimene ndimachita nacho mantha: ukazitape womveka mumzinda monse, kusonkhana kwa gulu la anthu okwiya, ndi kusinjirira. Zonsezi ndi nzoipa koposa imfa.

⁶Mkazi wansanje amaŵaŵitsa mtima ndi kumvetsa chisoni, aliyense amamva mau ake olasa.

⁷Mkazi woipa ali ngati goli lang'ombe lolasa m'khosi, kuyesa kumugonjetsa ndiye ngati ukugwira chinkhanira.

⁸Mkazi wauchidakwa amaŵaŵitsa mtima, sangathe kubisa manyazi ake.

⁹Mkazi wachimasomaso amadziŵika ndi kapenyedwe kake, ungathe kumzindikira pakungoyang'ana zikope zake.

¹⁰Uzimuyang'anira bwino mwana wako wamkazi wochita mwano. Ukamlekerera pang'ono, adzangochita zakezake.

¹¹Uchenjere nawo maso ake opanda manyazi, ndipo usadabwe ngati akukokera ku zoipa.

¹²Munthu woyenda pa ulendo amamwa madzi aliwonse amene waŵapeza. Chimodzimodzinso mkaziyo amangodikira apa ndi apa, nkuvomera aliyense amene wamufuna.

¹³Ubwino wa mkazi umakondweretsa mwamuna wake, luso lake limanenepetsa thupi la mwamuna wake.

¹⁴Mkazi wosalankhula zambiri ndi mphatso yochoka kwa Ambuye, palibe chuma cholingana ndi mkazi wodziŵa mwambo.

¹⁵Mkazi wodzisunga bwino amasangalatsa moŵirikiza, palibe chinthu choposa mtima wopanda dama.

¹⁶Mkazi wokongola wosamala bwino za m'nyumba mwake ngwokoma ngati dzuŵa lotuluka m'maŵa mu mlengalenga wa Ambuye.

¹⁷Nkhope yokongola yokhala pa thupi lopangidwa bwino njoŵala ngati nyale yokhala pa choikapo chake m'Nyumba ya Ambuye.

¹⁸Miyendo yake yokongola yoima pa mapazi olimba ili ngati mizati yagolide pa tsinde lasiliva.

¹⁹Mwana wanga, khala ndi moyo wabwino pa unyamata wako, usapereke mphamvu zako kwa anthu achilendo.

²⁰Ufunefune m'chigwa monse malo achonde, ndipo ubzalemo mbeu zako mokhulupirira ubwino wa mtundu wako.

²¹Tsono ana ako amene udzasiya kumbuyo kwako adzakula bwino akunyadira ulemerero wa makolo ao.

²²Mkazi wadama ali ngati malovu chabe. Mkazi wokwatiwa ali ngati nsanja yopheramo odzamnyenga.

²³Mkazi wosaopa Mulungu ngwoyenera mwamuna wosalabadira za Malamulo. Koma munthu woopa Ambuye adzalandira mkazi wokonda za Mulungu.

²⁴Mkazi wopanda manyazi amakonda kudzinyazitsa, koma mkazi wa makhalidwe abwino amakhala wodzichepetsa ngakhale pamene ali yekha ndi mwamuna wake.

²⁵Mkazi wodzikuza ali ngati galu, koma mkazi wa makhalidwe abwino amaopa Ambuye.

²⁶Mkazi wolemekeza mwamuna wake amaoneka wanzeru kwa aliyense, koma wonyoza mwamuna wake monyada onse amamudziŵa kuti ndi woipa. Ngwodala mwamuna amene ali ndi mkazi wabwino, chifukwa adzakhala ndi moyo nthaŵi yaitali.

²⁷Mkazi wam'kamwa ndi wolongolola ali ngati kulira kwa lipenga lankhondo loputa adani. Mwamuna wokhala ndi mkazi wotere, ali pa phokoso lankhondo nthaŵi zonse. Za zinthu zokhumudwitsa

²⁸Pali zinthu ziŵiri izi zimene zimandipweteka mtima, ndi china chachitatu chimene chimandikwiyitsa: msilikali wosauka chifukwa cha umphaŵi, anthu anzeru omanyozedwa ndipo munthu wolungama wosandukanso woipa. Wotereyu Mulungu amamukonzera imfa yochita kuphedwa. Za malonda

²⁹Nkwapatali kuti munthu wamalonda apewe machitidwe oipa. Nkwapatali kuti munthu wogulitsa zinthu apezeke wosachimwa.