Read Buku Loyera - Chichewa Mphu. 27 Bible Online

Mphu. 27 - Buku Loyera - Chichewa bible

Mphu. 27

¹Ambiri adachimwa chifukwa chofuna kupeza phindu, munthu wofunitsitsa kulemera amauma mtima.

²Monga chikhomo chimakhomedwa pakati pa miyala iŵiri, momwemonso tchimo limakhazikika pakati pa kugulitsa ndi kugula malonda.

³Munthu akapanda kulimbikira kuwopa Ambuye, nyumba yake idzagamuka msanga. Zokamba za munthu zimaonetsa maganizo ake.

⁴Munthu akagwedeza sefa, zinyatsi zimatsalira momwemo. Chimodzimodzinso zolakwa za munthu zimaoneka iye akamalankhula.

⁵Monga mbiya amaiyesa pa moto, momwemonso munthu amayesedwa pa zokamba zake.

⁶Monga chipatso cha mtengo chimatidziŵitsa luso la mlimi, momwemonso zokamba za munthu zimaonetsa zimene zili mumtima mwake.

⁷Usatamande munthu usanamve zolankhula zake, poti mayeso enieni a anthu ali pamenepa. Za chilungamo

⁸Ngati ufunafuna chilungamo, udzachipeza, ndipo udzachivala ngati mkanjo wokongola.

⁹Mbalame za mtundu umodzi zimayendera pamodzi. Chonchonso chilungamo chimakhala nawo amene amachitsata.

¹⁰Mkango umalalira nyama, chimodzimodzinso tchimo limalalira anthu osatsata chilungamo. Za kulankhula kopusa

¹¹Zolankhula za munthu wokonda Mulungu nzanzeru nthaŵi zonse, koma munthu wopusa amasinthasintha ngati mwezi.

¹²Ukamacheza ndi anthu opusa, yesa kupeza mpata wochokerapo msanga, koma ukamacheza ndi anthu okamba zanzeru, ungathe kukhalitsa ndithu.

¹³Mau a anthu opusa amanyansa, ndipo iwo amangosekerera machimo.

¹⁴Mau a anthu okonda kulumbiralumbira amaimiritsa tsitsi pa mutu, akayambana, anzao amangotseka makutu.

¹⁵Anthu onyada akayambana, amakhetsana magazi, mau ao otukwana amamvetsa chisoni.

¹⁶Munthu wokonda kuulula zinsinsi salinso wokhulupirika, ndipo sangapeze konse bwenzi lapamtima.

¹⁷Ukonde bwenzi wako ndi kukhala wokhulupirika kwa iye. Koma ngati udawanditsa zinsinsi zake, usakacheze nayenso.

¹⁸Chifukwa monga momwe munthu amaonongera mnzake pakumupha, momwemonso iweyo udapheratu chibwenzi cha mnzako.

¹⁹Monga momwe mbalame imakupulumukira m'manja, ndi m'menenso wakupulumukira bwenzi wako, ndipo sungamugwirenso.

²⁰Usamulondolenso chifukwa wapita kutali, ali ngati mphoyo imene yaonjoka ku msampha.

²¹Chilonda ukhoza kuchimanga, munthu wachipongwe ukhoza kumkhululukira, koma munthu woulula chinsinsi cha mnzake sungamkhulupirirenso. Za makhalidwe onyenga

²²Munthu akakutuzulira maso, ndiye kuti akuganiza kukuchita zoipa, palibe amene angamletse kuchita zimenezo.

²³Pokamba nawe, amalankhula mau amyaa, ndipo amayamika zimene ukunena. Koma pambuyo pake amasintha mau ake, napotoza mau ako kuti akutsutse.

²⁴Pali zambiri zimene ndimadana nazo, koma munthu wotere ndimadana naye kupambana zonse. Ambuye nawonso amadana naye.

²⁵Munthu woponya mwala kumwamba umamugwera pamutu pake pomwe. Nkhonya yobisalira imadzetsa zilonda pa mwiniwake.

²⁶Ukakumba mbuna, udzagwamo ndiwe wemwe. Ukatcha msampha udzakodwamo ndiwe wemwe.

²⁷Munthu wochita anzake zoipa, zoipa zake zomwezo zimambwerera, osadziŵa kumene zachokera.

²⁸Munthu wodzikuza amanyodola anzake ndi kuŵachita chipongwe, koma kulipsira kumamlalira iye yemwe ngati mkango.

²⁹Anthu amene amakondwera akaona munthu wabwino alikugwa, adzakodwa mu msampha, ndipo adzazunzika asanafe. Za mkwiyo

³⁰Mkwiyo ndi ukali, nazonso nzoipa zazikulu, munthu wochimwa amakhala nazo ziŵiri zonsezo.