Read Buku Loyera - Chichewa Mphu. 28 Bible Online

Mphu. 28 - Buku Loyera - Chichewa bible

Mphu. 28

¹Munthu wokonda kulipsira anzake, nayenso adzamulipsira Ambuye amene amaŵerenga machimo ake.

²Ukakhululukira mnzako amene wakuchimwira, nawenso Ambuye ukaŵapempha adzakukhululukira machimo ako.

³Ngati munthu asungira chiwembu mnzake, angayembekeze bwanji kuti Ambuye adzamumvera chisoni?

⁴Ngati sachitira chifundo munthu mnzake, angapemphe bwanji Ambuye kuti amkhululukire machimo ake?

⁵Ngati amene ali munthu chabe asunga mkwiyo, osafuna kukhululukira mnzake, iyeyo ndani adzamkhululukira zolakwa zake?

⁶Kumbukira kutha kwa moyo wako, ndipo lekeratu chidani. Kumbukira kuti udzafa ndi kuwola, ndipo sunga Malamulo mokhulupirika.

⁷Ganiza za Malamulo ndipo usakwiyire mnzako. Kumbukira chipangano cha Wopambanazonse, ndipo ukhululukire mnzako. Za kukangana

⁸Lewa kukangana ndi anzako, ndipo udzachepetsa machimo ako, chifukwa munthu wopsa mtima msanga amautsa mkangano.

⁹Munthu wochimwa amadzetsa mavuto pakati pa abwenzi, ndipo amautsa kusamvana pakati pa anthu amene kale anali ndi mtendere.

¹⁰Moto umakolera chifukwa chosonkhezera, ndeunso imakula ndi ukali wake. Ukali wa munthu umalingana ndi mphamvu zake, ndipo mkwiyo wake umakwera motsatana ndi chuma chake.

¹¹Kukangana kwadzidzidzi kumautsa ndeu. Ndipo ndeu yadzidzidzi imaphetsa.

¹²Mukauzira pa mbaliŵali, moto umayaka, mukathirapo malovu, moto umazima. Zonsezi zimachokera m'kamwa mwako. Za kulankhula

¹³Akazitape ndi amthirakuŵiri afunika kuŵatemberera, chifukwa adaononga anthu ambiri okhala mwamtendere.

¹⁴Akazitape adaononga anthu ambiri, ndipo adaŵamwazira m'maiko ena ndi ena. Adaononga mizinda yambiri yamalinga, nagwetsa nyumba za anthu otchuka.

¹⁵Akazitape adasudzulitsa akazi okhulupirika ndi kuŵalanda phindu lonse la ntchito zao.

¹⁶Aliyense amene amalabadako za ukazitape sadzapezanso pousa, ndipo sadzakhala ndi mtendere mumtima mwake.

¹⁷Mkwapulo wa chikoti umasiya mikwingwirima, koma mkwapulo wa lilime umaphwanya mafupa.

¹⁸Anthu ambiri adafa ndi lupanga, koma amene adafa ndi lilime ngochuluka koposa.

¹⁹Ngwodala munthu amene amalewa lilime lolongolola, amene sadaone ukali wake, amene sadasenze goli lake ndipo sadamangidwe ndi unyolo wake.

²⁰Paja goli lake nlachitsulo ndipo matangadza ake ngamkuŵa.

²¹Lilimelo limadzetsa imfa yoŵaŵa, ndipo nkwabwino kufa kupambana kukanthidwa ndi lilime lotere.

²²Koma silingathe kugonjetsa anthu oopa Mulungu, iwo sangathe kupsa ndi moto wake.

²³Anthu osiya Ambuye ndi amene adzazunzike nalo lilimelo, lidzayaka ngati moto wosazima pakati pao. Lidzaŵagwira ngati mkango ndi kuŵang'amba pafupipafupi ngati kambuku.

²⁴Monga munda wako umaumangira mpanda waminga, monganso umatsekera siliva ndi golide wako,

²⁵momwemonso uzichenjera ndi mau ako, ndi kuŵapima bwino, ndipo uziikapo chitseko ndi mipiringidzo pakamwa pako.

²⁶Chenjera kuti lilime lako lingakulakwitse, ungadzagwe m'manja mwa anthu okulalira.