Read Buku Loyera - Chichewa Mphu. 29 Bible Online

Mphu. 29 - Buku Loyera - Chichewa bible

Mphu. 29

¹Za kubweza ngongole Kukongoza mnzako ndi ntchito yachifundo, kuthandiza mnzako ndiye kusunga malamulo.

²Mnzako akasauka umkongoze, iweyo ukakhala ndi ngongole uzibweza msanga.

³Uzisunga mau ako ndi kukhala wokhulupirika kwa mnzako, ndipo zonse zimene usoŵa udzazipeza bwino.

⁴Anthu ambiri amayesa kuti ngongole ndi mwai, ndipo amavutitsa amene adaŵathandiza.

⁵Anthu ena amachita gwadugwadu kwa anzao kuti aŵakongoze, amanong'ona pokamba za chuma cha mnzaoyo, koma nthaŵi ikafika kuti abweze ngongole amazengereza, amangobweza mau chabe ndi kudandaula kuti nthaŵi yachepa.

⁶Womkongozayo akamlonjerera mopanikiza, iye amangobwezako pafupi hafu chabe. Akalandirako hafuyo wokongoza uja amati ndi mwai. Ngati wokongolayo sabweza, ndiye kuti wokongoza uja watayadi ndalama zake, ndipo wasanduka mdani popanda chifukwa. Kenaka wokongola uja amayamba kutemberera ndi kunyoza womkongozayo, ndiye kuti m'malo mwa ulemu amambwezera chipongwe.

⁷Anthu ambiri amakana kukongoza, osati chifukwa chouma mtima, koma amaopa kutaya ndalama pachabe. Za kuthandiza osauka

⁸Komabe uziŵalezera mtima anthu osauka, usamachedwe poŵachitira chifundo.

⁹Paja Malamulo amati, uzithandiza osauka, usaŵabweze kwao ali chimanjamanja.

¹⁰Ndalama zako uziwonongerako bwenzi lako kapena mbale wako, zisachite dzimbiri ndi kuwonongeka utazikumbira pansi.

¹¹Udziikire chuma potsata lamulo la Mulungu Wopambanazonse. Zimenezi zidzakuthandiza kupambana kukhala ndi golide.

¹²Mosungira chuma uunjike ndalama zochitira ntchito zachifundo, zidzakupulumutsa pa mavuto onse.

¹³Chifundo chidzakutchinjiriza kwa mdani wako kupambana chishango cholimba kapena mkondo wamphamvu. Za zigwiriro

¹⁴Munthu wabwino amapereka chigwiriro pamalo pa mnzake, koma wopanda manyazi yekha ndi amene angakane kumthandiza mnzakeyo.

¹⁵Ngati wina akuchitira zabwino zotero, usaiŵale chifundo chakecho, poti iye wadzipereka chifukwa cha iwe.

¹⁶Munthu woipa amangomwaza chuma cha amene wamthandizapo,

¹⁷ndipo wosadziŵa kuyamika amaiŵala amene adampulumutsa.

¹⁸Kupereka chigwiriro pofuna kuthandiza ena kudaonongeratu chuma cha anthu olemera ambiri, ndipo kunaŵagwedeza ngati namondwe pa nyanja. Kudakankhanso anthu omveka kuchoka kwao ndi kumangoyendayenda m'maiko achilendo.

¹⁹Munthu woipa akakhalira ena mboni kuti apezepo phindu, adzangoputa milandu.

²⁰Tsono uzimthandiza mnzako monga ungathere, koma uchenjere kuti ungagwe m'mavuto nawenso. Za ufulu wapanyumba

²¹Zinthu zofunikira kwenikweni pa moyo ndi izi: madzi, chakudya, zovala ndi nyumba yokhalamo.

²²Ndi bwino kukhala wosauka koma uli ndi nkako kakhumbi, kupambana kumadya bwino koma muli m'nyumba mwa wina.

²³Kaya uli ndi zinthu zochepa kaya zambiri, ukhutire nazo, motero sadzakunena kuti umangodya nawo kwa ena.

²⁴Ndi moyo wovutika kumangodikiza m'makomo mwa anthu. Kumene wakakhala mlendoko, palibe chimene unganenepo.

²⁵Udzalandira alendo, udzapatsa anthu zakumwa, iwo osathokoza, m'malo mwake adzakupeputsa nkumati,

²⁶“Mlendo iwe, bwera kuno, konza tebuloli. Wakonza chiyani? Bwera nacho ndidye.

²⁷Mlendo iwe, tachoka pamenepa, akhalepo olemekezekaŵa. Mbale wanga wadzandiyendera, ndikuŵafuna maloŵa.”

²⁸Kwa munthu wanzeru nchinthu chopweteka: kumtonzera ufulu, kumchititsa manyazi ngati a munthu wangongole.