Read Buku Loyera - Chichewa Mphu. 3 Bible Online

Mphu. 3 - Buku Loyera - Chichewa bible

Mphu. 3

¹Za Udindo wa ana kwa makolo Ana inu, mundimvere ine bambo wanu. Mukafuna kupulumuka, muchite zimene ndikuuzeni.

²Ambuye adapatsa bambo ulemu woposa ana ake, adatsimikiza mphamvu za mai pa ana ake.

³Amene amalemekeza atate ake, amapepesa Mulungu chifukwa cha machimo ake.

⁴Amene amalemekeza amai ake, amachita ngati kudzikundikira chuma.

⁵Amene amalemekeza atate ake, ana ake adzamsangalatsa, ndipo akamapemphera, mapemphero ake adzamveka.

⁶Amene amalemekeza atate ake, adzakhala ndi moyo wautali. Amene amamvera Ambuye, amasangalatsa amai ake.

⁷Amene amaopa Ambuye, amalemekeza atate ake, amagwirira ntchito makolo ake ngati mtumiki wao.

⁸Mwana wanga, uzilemekeza atate ako ndi mau apakamwa ndiponso ndi ntchito zako, kuti madalitso ao akhale pa iwe.

⁹Pajatu madalitso a bambo amalimbitsa mabanja a ana ake, koma matemberero a mai amazula maziko a mabanjawo.

¹⁰Usadzikweze pakuchititsa manyazi bambo wako. Manyazi a bambo wako angakupatse bwanji ulemu?

¹¹Munthu amapeza ulemu chifukwa cholemekeza atate ake. Ndipo kusalemekeza amai nchinthu chochititsa ana manyazi.

¹²Mwana wanga, usamale bambo wako atakalamba, usamuvute konse pa moyo wake wonse.

¹³Ngakhale nzeru zake zikuyamba kutha, iwe uzimuwonetsa ndithu chifundo. Usamnyoze chifukwa chongoti uli ndi moyo wolimba.

¹⁴Chifundo chochitira bambo wako sichidzaiŵalika, adzachiŵerengera ngati cholipirira machimo ako.

¹⁵Pamene udzagwe m'mavuto Mulungu adzakukumbukira, ndipo machimo ako adzasungunuka ngati chisanu pa dzuŵa.

¹⁶Amene sasamala bambo wake, ali ngati munthu wonyoza Mulungu mwachipongwe. Amene amakwiyitsa mai wake, Ambuye amamtemberera. Za kudzichepetsa

¹⁷Mwana wanga, ukhale wodekha pa zonse zimene umachita, ndipo anthu okomera Ambuye adzakukonda.

¹⁸Ngati ndiwe wotchuka kwambiri, udzichepetse, ukatero udzapeza kuyanja pamaso pa Ambuye.

¹⁹Pali anthu ambiri otchuka ndi amphamvu, koma Ambuye amaulula zinsinsi zao kwa anthu odzichepetsa.

²⁰Pajatu mphamvu za Ambuye nzazikulu, amalemekezedwa ndi anthu odzichepetsa.

²¹Usayese kumvetsa zinthu zimene zili zapatali kwa iwe, kapena kufufuza zinthu zimene zili zopitirira nzeru zako.

²²Uzilingalira kwambiri za ntchito imene walandira, zimene zili zobisika kwa iwe ulibe nazo ntchito.

²³Usatanganidwe ndi zinthu zopitirira nzeru zako, ngakhale zimene adakuphunzitsa nzopitirira nzeru za anthu.

²⁴Ambiri adasokera chifukwa cholingalira zinthu zapatali, ndipo zopeka zao zonama zidasokeretsa maganizo ao. Za kunyada

²⁵Ngati ulibe maso, sungathe kupenya. Ngati ndiwe mbuli, usadziwonetse ngati wanzeru.

²⁶Munthu wokanika adzatha moipa. Munthu woseŵera ndi zoopsa, adzataya moyo wake.

²⁷Mtima wokanika umadzitengera mavuto ambiri, munthu wochimwa amanka nachimwirachimwira.

²⁸Tsoka likagwera wonyada, palibe mankhwala, pakuti kuipa kumakhala kutazika mizu mwa iye.

²⁹Munthu wochenjera amalingalira bwino fanizo, munthu wanzeru amafunitsitsa kukhala ndi makutu atcheru. Za Kuthandiza osauka

³⁰Monga momwe madzi amazimira moto walaŵilaŵi, momwemonso mphatso zopatsa osauka zimapepesera machimo.

³¹Amene amabwezera zabwino kwa zabwino, amaganizira zam'tsogolo. Pamene azidzati agwe, anzake adzamchirikiza.