Read Buku Loyera - Chichewa Mphu. 30 Bible Online

Mphu. 30 - Buku Loyera - Chichewa bible

Mphu. 30

¹Za kulera ana Munthu wokonda mwana wake amamkwapula kaŵirikaŵiri, kuti adzakondwerere makulidwe a mwanayo.

²Munthu wopatsa mwambo mwana wake, adzakondwera naye, ndipo adzamunyadira pakati pa anzake.

³Munthu wophunzitsa bwino mwana wake adani ake adzachita naye nsanje, ndipo iyeyo adzamnyadira pakati pa abwenzi ake.

⁴Ngakhale bamboyo akamwalira, amachita ngati akali moyo, chifukwa adasiya chithunzi chake.

⁵Pamene anali moyo ankakondwera akamamuwona, ndipo pamene analikufa, sadade nkhaŵa.

⁶Adasiya wina woti alipsire adani ake, ndipo wina woti aŵabwezere zabwino abwenzi ake.

⁷Koma amene amasasatitsa mwana wake, adzayenera kumanga zilonda zake zomwe, ndipo mtima wake udzavutika akamadzamumva akulira.

⁸Monga kavalo wosaphunzitsa amakhala wokanika, momwemonso mwana wopanda mwambo amakhala wosaweruzika.

⁹Sasatitsa mwana wako, ndipo adzakuopseza, seŵera naye, ndipo adzakumvetsa zoŵaŵa.

¹⁰Usamaseka naye, mwinamwina udzalira naye, ndiye potsiriza udzalira kuti, “Mai, kalanga ine!”

¹¹Usamkokomeze akali wamng'ono, ndipo usalekerere zolakwa zake.

¹²Umfeŵetse khosi akali wochepa, umkwapule akali mwana. Ukapanda kutero, adzakhala wamphulupulu ndi wosamvera, ndipo adzakuvutitsa kwambiri.

¹³Umphunzitse mwambo mwana wako osamlekerera, mwinamwina adzakuchititsa manyazi ndi chipongwe chake. Za moyo wabwino

¹⁴Ndi bwino kukhala munthu wosauka koma wa moyo wamphamvu ndi wathanzi, kupambana kukhala munthu wolemera koma wodwaladwala.

¹⁵Moyo wabwino ndi mphamvu zipambana golide, thupi lathanzi lipambana chuma chochuluka.

¹⁶Palibe chuma cholingana ndi moyo wabwino, palibe zokondweretsa zoposa mtima wachimwemwe.

¹⁷Ndi bwino kufa kupambana kuzunzika pa moyo wako wonse, ndi bwinonso kuusa kwamuyaya kupambana kudwala nthaŵi yaitali.

¹⁸Chakudya chabwino chopatsa munthu wosafuna kudya, chili ngati chakudya chochiika ku manda.

¹⁹Pali phindu lanji kupereka nsembe kwa fano? Silingathe kudya kapena kununkhiza. Chimodzimodzinso ndi munthu amene akulangika ndi Ambuye.

²⁰Amangochiyang'ana chakudyacho nkumabuula, ngati munthu wofulidwa akakumbatira namwali. Za chimwemwe ndi chisoni

²¹Usabindikire m'chisoni, usachite kudzivutitsa dala.

²²Mtima wachimwemwe umakhalitsa moyo munthu, ndipo kusangalala kumachulukitsa masiku ake.

²³Khala wachimwemwe, sangalatsa mtima wako, ndipo chisoni uchipirikitsire kutali, chifukwa chisoni chidaononga anthu ambiri, chilibe phindu kwa aliyense.

²⁴Nsanje ndi mkwiyo zimachepetsa moyo, ndipo nkhaŵa imakalambitsa msanga.

²⁵Munthu wosangalala amadya bwino, ndipo amakondwerera chakudya chake.