Read Buku Loyera - Chichewa Mphu. 31 Bible Online

Mphu. 31 - Buku Loyera - Chichewa bible

Mphu. 31

¹Za mavuto obwera ndi chuma Munthu wosagona tulo chifukwa cha chuma amaonda, chumacho chimadzetsa nkhaŵa nkuthaŵitsa tulo.

²Kuda nkhaŵa kwamasana kumaletsa tulo, m'maso mumangoti gwa ngati wadwala koopsa.

³Munthu wolemera amalimbikira pa ntchito, kuti adziwunjikire chuma, ndipo akasiya ntchito, amasangalala nkumadyerera.

⁴Munthu wosauka amagwira ntchito yoŵaŵa nangopeza pang'ono zofunikira moyo wake, ndipo akasiya ntchito, amasaukirasaukira.

⁵Munthu wokondetsa golide sadzakhala wolungama, ndipo munthu wakhwinthi ndi ndalama adzasokera nazo.

⁶Anthu ambiri adatayikiratu chifukwa cha golide, adakumana ndi chiwonongeko.

⁷Chuma ndi msampha kwa anthu ochikondetsa, chimakola opusa onse.

⁸Ngwodala munthu wolemera amene alibe tchimo, ndipo sathamangira golide.

⁹Mutiwonetse munthu wotero ndipo tidzamuyamika, chifukwa ameneyo adachita zozizwitsa pakati pa anthu a fuko lake.

¹⁰Ndani adayesedwapo pa zimenezi napezeka wangwiro? Ngati alipo, ayenera kunyadira. Ndani woti akadatha kuchimwa koma sadachimwe, kapena kuchita choipa koma sadachite?

¹¹Munthuyo chuma chake chidzakhazikika bwino, anthu anzake adzamtamanda chifukwa cha ntchito zake zachifundo. Za makhalidwe apaphwando

¹²Ukakhala pa phwando ladzaoneni, usaonetse maso adyera, usanene kuti, “Lero kuli madyerero!”

¹³Kumbukira kuti kuyang'ana ndi diso ladyera nkulakwa. Palibe chinthu chaumbombo kupambana diso, nchifukwa chake limangodza misozi kaŵirikaŵiri.

¹⁴Usakhale kagwam'masotola, usamakankha mnzako popisa dzanja m'mbale.

¹⁵Uziganizira zofuna za anzako poyang'anira zako zomwe, pa zonse uziganizira bwino.

¹⁶Uzidya mwaulemu zimene akupatsa. Usamatafuna mwaphokoso, mwinamwina anthu ena adzadana nawe.

¹⁷Potsata ulemu, uziyamba ndiwe kuleka kudya. Usaonetse dyera pakudya, mwinamwina anthu ena adzaipidwa nazo.

¹⁸Ukamadya pa gulu lalikulu la anthu, usamayamba ndiwe kudya, ena asanayambe.

¹⁹Munthu wamkhalidwe ngakhale chakudya chochepa chimamukwanira, ndipo sachita pefupefu akagona pabedi pake.

²⁰Munthu wodya moyenera amagona tulo tabwino, ndipo amadzuka msanga, akupeza bwino. Kusapeza tulo, kuchita mseru, kugeya ndulu, zonsezi zimachitika ndi munthu wadyera.

²¹Ngati akuumiriza kudya kopitirira, tuluka ukasanze, udzakhala bwino.

²²Ndimvere, mwana wanga, usanyozere, ndipo potsiriza udzavomereza mau anga. Zochita zako zonse uzichita moyenera, ndipo matenda sadzakukhudza.

²³Munthu wodyetsa anzake bwino, anthu amamuyamika, umboni wao pa ufulu wakewo umakhaladi wokhulupirika.

²⁴Koma mumzinda monse anthu amamdandaula munthu womana, umboni wao pa kumana kwake umakhala wokhoza zedi. Za vinyo

²⁵Usayese kuwonetsa kuti ndiwe katundu pakumwa vinyo, chifukwa ambiri adaonongeka naye vinyo.

²⁶Monga moto ndi madzi zimayesa kulimba kwa chitsulo, momwemonso vinyo amayesa mitima ya anthu odzikuza akamamenyana.

²⁷Vinyo ndiye moyo umene wa anthu, akamumwatu moyenera. Kodi popanda vinyo moyo uli nchiyaninso? Vinyo adalengedwa kuti azisangalatsa anthu.

²⁸Vinyo amapatsa chimwemwe ndi chisangalalo mu mtima, kumumwatu pa nthaŵi yabwino ndi mwa muyesonso wabwino.

²⁹Koma kumumwa mobzola muyeso, amaŵaŵitsa mtima, amautsa mikangano ndi ndeu.

³⁰Munthu wopusa kuledzera kumamuutsira ukali wodzipweteketsa nawo, kumamlanda mphamvu nkumuwonjezera kumenyedwa.

³¹Pakumwa vinyo pa phwando usadzudzule mnzako, kapena kumchedzera pamene iye akusangalala. Usamdzudzule kapena kumvutitsa pomulonjerera ngongole.