Read Buku Loyera - Chichewa Mphu. 32 Bible Online

Mphu. 32 - Buku Loyera - Chichewa bible

Mphu. 32

¹Za madyerero Ngati akusankha kuti ukhale woyang'anira pa phwando, usapupulume. Khala monga ena onse, usamale za iwo poyamba, kenaka ukhale pansi.

²Utatsiriza ntchito zako zonse, ukakhale pamalo pako. Motero udzakondwa poona chimwemwe chao, ndipo iwowo adzakuyamika chifukwa cha makhalidwe ako abwino.

³Ngati ndiwe nkhalamba ulankhule, chifukwa ndi chinthu chokuyenerera. Koma polankhula uzilankhula zomveka, ndipo usadule zoimbaimba.

⁴Ngati pali zoimbaimba, usalankhulelankhule, si nthaŵi yodziwonetsa kuti ndiwe munthu wanzeru.

⁵Monga momwe umakhalira mwala wa rubi pa mphete yagolide, ndi m'menenso liliri gulu la anthu oimba pa phwando.

⁶Monga momwe umakhalira mwala wa emeradi pa mphete yagolide, ndi m'menenso iliri nyimbo yokoma pakumwa vinyo wabwino.

⁷Ngati ndiwe mnyamata, ulankhule ngati nkofunika. Koma usalankhule kopitirira kaŵiri ndipo pokhapokha atakupempha.

⁸Ukambe mwachidule, unene zambiri ndi mau ochepa, uwoneke kuti ndiwe wodziŵa, koma wosafuna kulankhula.

⁹Pakati pa anthu otchuka usakhale ngati uli ndi anzako olingana nawo, ndipo pamene wina akulankhula, iwe usaikepo mau achibwana.

¹⁰Monga mphezi imayamba kung'anima bingu lisanagunde, momwemonso mbiri ya munthu wabwino imamveka, iye tisanamuwone.

¹¹Pa phwando uzichoka nthaŵi yabwino, usamakhala wotsirizira. Ulunjike ku nyumba, osaimaimanso ai.

¹²Kumeneko ungathe kudzisangalatsa, ungathe kuchita zomwe ukufuna, koma usachimwe polankhula zodzikuza.

¹³Tsono pa zonsezi usaiŵale kuthokoza Mlengi wako amene amakupatsa madalitso ochuluka. Za kuwopa Mulungu

¹⁴Munthu woopa Ambuye amalandira malango ake. Anthu odzuka m'maŵa kuti achite kufuna kwa Ambuye, Mulungu amaŵakomera mtima.

¹⁵Munthu wokonda Malamulo adzapezamo chakudya choti nkukhuta, koma munthu wachiphamaso amaphunthwa nawo Malamulowo.

¹⁶Munthu woopa Ambuye adzadziŵa chilungamo ndipo ntchito zake zidzaŵala ngati nyale.

¹⁷Munthu wochimwa amakana kumdzudzula, amafunafuna zifukwa zopitirizira mkhalidwe wake.

¹⁸Munthu wanzeru sanyozera malangizo a anzake, koma munthu wamwano ndi wodzikuza alibe mantha konse.

¹⁹Usachite zinthu usanaganize, ndipo pambuyo pake sudzadandaula.

²⁰Usayende pa njira yoipa, ndipo sudzakhumudwa pa mwala.

²¹Usamayende mosachenjera pa njira yosalala,

²²uzipenyetsetsa kumene ukupita.

²³Uzisamala bwino pa zonse zimene uchita chifukwa kutero ndiye kutsata Malamulo.

²⁴Munthu wokhulupirira Malamulo amamvera mau ake. Munthu wokhulupirira Ambuye sadzaona zomupweteka.