Read Buku Loyera - Chichewa Mphu. 33 Bible Online

Mphu. 33 - Buku Loyera - Chichewa bible

Mphu. 33

¹Munthu woopa Ambuye, tsoka silimgwera, nthaŵi zonse Ambuye adzampulumutsa ku mavuto.

²Munthu wanzeru sadana ndi Malamulo. Koma munthu wosakhulupirika ali ngati ngalawa pakati pa namondwe.

³Munthu wanzeru amakhulupirira Malamulo, ndipo kwa iye malamulowo ngokhulupirika ngati mau olosa.

⁴Ukonzeretu zimene ukalankhule, ndipo anthu adzamvetsera. Ukumbukire bwino zimene udaphunzira, usanayankhe.

⁵Maganizo a chitsiru amakhala ngati mkombero wa ngolo, maganizo ake amazungulira ngati njinga.

⁶Bwenzi wamchedzera ali ngati kavalo wakuthengo amene amadzuma womkwera aliyense, ngakhale akhale yani. Za kusiyana kwa anthu

⁷Bwanji tsiku lina limakhala labwino koposa linzake, pamene dzuŵa limapereka kuŵala kolingana chaka chathunthu.

⁸Amasiyana chifukwa Ambuye adafuna choncho. Ndiwo amene adasankhula nyengo ndi masiku achikondwerero.

⁹Masiku ena adaŵakweza ndi kuŵayeretsa, koma ena adaŵasunga ngati masiku wamba.

¹⁰Anthu onse amachokera ku nthaka, ndipo Adamu adapangidwa ndi dothi lam'nthaka.

¹¹Mwa nzeru zao Ambuye adaika kusiyana pakati pa anthu, makhalidwe ao adaŵapanga osafanana.

¹²Ena adaŵadalitsa ndi kuŵakweza, ena adaŵayeretsa ndi kuŵaika pafupi nawo. Koma ena adaŵatemberera ndi kuŵapeputsa, adaŵatsitsa m'malo mwao.

¹³Dothi likakhala m'manja mwa mmisiri wake, iye amaumba nalo chimene akufuna. Chimodzimodzinso anthu m'manja mwa Mlengi, amaŵapatsa zinthu monga Iye akufunira.

¹⁴Ubwino uli poyang'anana ndi kuipa, moyo uli poyang'anana ndi imfa. Chonchonso munthu wochimwa ali poyang'anana ndi munthu wosamala za Mulungu.

¹⁵Yang'anani ntchito zonse za Mulungu Wopambanazonse: mudzaona kuti adazipanga ziŵiriziŵiri, china chosiyana ndi chinzake.

¹⁶Ine ndidakhala wotsirizira kudzagwira ntchito. Ndinali ngati wokunkha pambuyo pa anthu othyola mphesa.

¹⁷Koma ndi madalitso a Ambuye ndidakhala wopambana, motero nanenso ndidadzaza mopondera mphesa ngati ena onse.

¹⁸Zindikirani kuti ntchitoyi sindidaigwire chifukwa cha ine ndekha, koma chifukwa cha onse ofuna kuphunzira.

¹⁹Tsono mundimvere, inu amene muli akuluakulu pakati pa anthu; tcherani khutu, inu atsogoleri a mpingo. Za kudziimira pa wekha

²⁰Pa moyo wako wonse usalole kuti wina akulamulire, ngakhale akhale mwana wako, mkazi wako, bwenzi lako kapena mbale wako. Usapatse wina aliyense chuma chako, kuwopa kuti mwina ungasinthe maganizo nkumuuza kuti akubwezere.

²¹Nthaŵi yonse uli ndi moyo ndipo ukadapumabe, usadzipereke mu ulamuliro wa wina aliyense.

²²Ndi bwino kuti ana ako azigonera pa iwe kupambana kuti iwe uzigonera pa ana ako.

²³Ukhale wodzilamulira wekha pa zonse zimene umachita, usalole kuti mbiri yako iipe.

²⁴Pamene masiku a moyo wako adzakhala pafupi kutha, pa nthaŵi imene uzikamwalira, pamenepo udzagaŵe chuma chako. Za akapolo

²⁵Udzu, ndodo ndi katundu ndizo zoyenera bulu. Chakudya, mwambo ndi ntchito ndizo zofunikira akapolo.

²⁶Uzimgwiritsa ntchito kapolo wako, ndipo udzapeza mtendere mu mtima. Ukangomlekerera osampatsa ntchito, adzayamba kufuna ufulu wake.

²⁷Goli ndi nsinga zimaŵeramitsa khosi ng'ombe. Kapolo woipa amamzunza ndi matangadza.

²⁸Umpatse ntchito kuti asamangokhala, chifukwa ulesi umaphunzitsa munthu makhalidwe oipa.

²⁹Mpatse ntchito pakuti ndiye chinthu chomuyenera, akapanda kukumvera, ummange ndi maunyolo.

³⁰Koma usakhale wankhalwe ndi munthu wina aliyense, kapena kuchita kalikonse kosalungama.

³¹Ngati uli ndi kapolo, umsunge ngati mnzako, chifukwa udamgula ndi magazi. Ngati uli ndi kapolo, umsunge ngati mbale wako, poti umamsoŵa monga umadzisoŵera mwiniwakewe. Ukamamzunza, iye nkuthaŵa, kodi udzadzera njira iti kuti udzampeze?