Read Buku Loyera - Chichewa Mphu. 34 Bible Online

Mphu. 34 - Buku Loyera - Chichewa bible

Mphu. 34

¹Maloto si kanthu Anthu opanda nzeru amakhulupirira zinthu zonama ndi zachabe, zitsiru zimatekeseka ndi maloto.

²Kukhulupirira maloto kuli ngati kuumirira mtunda wopanda madzi.

³Maloto amalingana ndi kalilole, chifaniziro cha nkhope kuyang'anana ndi nkhope yeniyeniyo.

⁴Kodi m'zonyansa mungachokere kanthu koyera? Nanga m'mabodza, kodi mungachokere zoona?

⁵Maula, mipingu ndi maloto, zonsezi nzachabe, zili ngati zoganizira za munthu wamkazi pa nthaŵi yake yochira.

⁶Usaikepo mtima konse pa zimenezo, pokhapokha ngati Mulungu Wopambanazonse ndiye wazitumiza.

⁷Ambiri adasokera ndi maloto ndipo amene ankaŵakhulupirira adaonongeka.

⁸Kutsata bwino Malamulo sikulira zopeka zonama zoterezi, nzeru zabwino kwenikweni zimapezeka mwa munthu wonena zoona. Za maulendo

⁹Munthu woyenda kwambiri amadziŵa zambiri, ndipo munthu amene adaona zambiri, amalankhula zanzeru.

¹⁰Amene sadaone zambiri, amangodziŵa zinthu pang'ono, koma munthu woyenda kwambiri amakhala waluso pa zambiri.

¹¹Ndidaona zinthu zambiri pa maulendo anga, ndipo zimene ndimazimvetsa nzochuluka kuposa zimene ndingakambe.

¹²Kaŵirikaŵiri ndidakumana ndi zoopsa zoti nkadafa, koma ndidapulumuka chifukwa cha zimene ndidaphunzira. Za kuwopa Ambuye

¹³Anthu oopa Ambuye adzakhala ndi moyo, chifukwa amakhulupirira amene angathe kuŵapulumutsa.

¹⁴Munthu woopa Ambuye sadzakayika pa chilichonse. Sadzakhala wamantha, chifukwa chikhulupiriro chake chili mwa Ambuye.

¹⁵Ngwodala munthu woopa Ambuye, amadziŵa kumene angapeze chithandizo.

¹⁶Ambuye amasunga anthu oŵakonda, Ambuyewo ndi chishango chao cholimba ndi mthandizi wamphamvu. Amaŵateteza ku mphepo yotentha ndi ku dzuŵa lamasana. Amaŵagwirira kuti asaphunthwe, amaŵachirikiza kuti asagwe.

¹⁷Amasangalatsa mitima yao ndi kuŵalitsa maso ao, amaŵapatsanso mphamvu, moyo ndi madalitso. Za kupereka nsembe

¹⁸Nsembe zochokera pa phindu loipa nzonyansa, mphatso za anthu oipa Mulungu sangazilandire.

¹⁹Mulungu Wopambanazonse sakondwera ndi nsembe za anthu osasamala za Iye. Ngakhale nsembe zaozo zichuluke, sizingakwanire kupepesa machimo ao.

²⁰Kupereka nsembe ndi chuma cholanda kwa munthu wosauka kuli ngati kupha mwana bambo wake akuwona.

²¹Chakudya chongolaŵa ndiye moyo wa anthu osauka, kuŵalanda chimenecho nkuŵapha.

²²Kuba chuma cha mnzako nkumupha, kunyenga wantchito pa malipiro ndi ngati kukhetsa magazi ake.

²³Ngati munthu wina akumanga nyumba, wina nkumagwetsa, kodi aŵiriwo sangodzivuta chabe?

²⁴Ngati wina akupemphera, wina nkumatemberera, kodi Ambuye adzamvera uti?

²⁵Ngati usamba m'manja utagwira mtembo, kenaka nkuugwiranso, kusamba kuja kuli ndi phindu lanji?

²⁶Nchimodzimodzi munthu wosala zakudya chifukwa cha machimo ake, kenaka abwerezanso machimo omwewo. Kodi ndani adzamva mapemphero ake? Kodi kudzilanga kuja kuli ndi phindu lanji?