Read Buku Loyera - Chichewa Mphu. 35 Bible Online

Mphu. 35 - Buku Loyera - Chichewa bible

Mphu. 35

¹Za malamulo ndi nsembe Kusunga Malamulo kuli chimodzimodzi kupereka nsembe zambiri. Kusamala Malamulo ndiye ngati kupereka nsembe zothokozera.

²Kubwezera zachifundo mothokoza kuli ngati kupereka nsembe zaufa. Pothandiza wosauka, umachita ngati ukupereka nsembe yoyamikira.

³Kuleka zoipa kumakondweretsa Ambuye, kusiya zochimwa ndiye nsembe yopepesera machimo.

⁴Usabwere pamaso pa Ambuye chimanjamanja.

⁵Nsembe zonsezi ziyenera kuperekedwa chifukwa Malamulo akutero.

⁶Munthu wolungama akamapereka nsembe ku guwa, fungo lake labwino limafika kwa Mulungu Wopambanazonse.

⁷Nsembe za munthu wolungama Ambuye amazilandira, ndipo sadzaziiŵala.

⁸Uzikonda kulemekeza Ambuye ndi mtima wachifundo, ndipo usaleke kupereka kwa Ambuye zipatso zako zoyamba kucha.

⁹Uzipereka mphatso zako ndi chimwemwe, ndipo uzisangalala popereka chachikhumi chako.

¹⁰Uzipatsa Mulungu Wopambanazonse monga momwe adakupatsira, uzipereka mwaufulu monga ungathere.

¹¹Paja Ambuye amapereka mphotho mwaufulu; adzakuchulukitsira kasanunkaŵiri. Za kulungama kwa Mulungu

¹²Usayese kupereka chiphuphu kwa Ambuye, chifukwa sadzachilandira. Ndipo usadalire nsembe yopanda chilungamo, chifukwa Ambuye ndiwo muweruzi, muweruzi wake wopanda tsankho.

¹³Saonetsa kukondera poweruza wosauka, amamvera pemphero la amene anzake adamulakwira.

¹⁴Sanyozera pempho la mwana wamasiye kapena madandaulo a mkazi wamasiye.

¹⁵Suja misozi ya mkazi wamasiye imatsika pamasaya pake, akamaneneza munthu amene adamliritsa?

¹⁶Uzitumikira Ambuye mokhulupirika, ndipo Iwowo adzakulandira. Pamenepo mapemphero ako akafika kumwamba.

¹⁷Pemphero la munthu wodzichepetsa limabzola mitambo, ndipo mtima wake sudzakhazikika mpaka Ambuye atamva pempherolo. Sadzaleka kupempha mpaka Wopambanazonse atamuyendera, ndi kuchitira chilungamo anthu abwino pakuweruza moona.

¹⁸Ambuye sadzachedwa ndipo sadzapirira anthu ochimwa, mpaka atadzaphwanya misana ya anthu opanda chisoni, ndi kulipsira mitundu ya akunja; mpaka ataonongeratu anthu achipongwe ndi kuthyola mphamvu za anthu osalungama;

¹⁹mpaka aliyense atampatsa molingana ndi zochita zake, ndi kulipira ntchito zakezo potsata zolinga za mumtima mwake; mpaka atagamula mlandu wa anthu ake, ndi kuŵasangalatsa ndi chifundo chao.

²⁰Pa nthaŵi ya mavuto chifundo cha Ambuye nchokondweretsa, ngati mitambo yamvula pa nthaŵi yachilala.