Read Buku Loyera - Chichewa Mphu. 36 Bible Online

Mphu. 36 - Buku Loyera - Chichewa bible

Mphu. 36

¹Kupempherera Aisraele kuti apulumuke Inu Ambuye, mutichitire chifundo, Inu Mulungu mwini zonse, mutiyang'ane ife.

²Muwopseze anthu onse a mitundu ina.

³Musamule dzanja lanu ndi kulanga mitundu yachilendo, kuti onsewo adziŵe mphamvu zanu.

⁴Monga mudaŵaonetsera kuti ndinu oyera pa zochita zanu pakati pa ife, momwemonso mutiwonetse ukulu wanu pa zochita zanu pakati pa iwowo.

⁵Aphunzire monga tidaphunzirira ife, kuti palibe Mulungu wina koma Inu nokha Ambuye.

⁶Onetsani zizindikiro zatsopano ndi kuchita zozizwitsa zinanso, muwonetse ulemerero wa dzanja lanu ndi mkono wanu wakumanja.

⁷Mudzutse mkwiyo wanu, mugwetse ukali wanu, onongani amaliwongo ndi kuthyoleratu adani.

⁸Mulifulumize tsiku lake, ndi kukumbukira nthaŵi yake yosankhidwa. Anthu azisimba za ntchito zanu zodabwitsa.

⁹Ukali wa mkwiyo wanu uwononge anthu otsala, adani a anthu anu atheretu.

¹⁰Phwanyani mitu ya mafumu a adani athu amene amati, “Ife pano! Pali yaninso?”

¹¹Sonkhanitsani mafuko onse a Yakobe, muŵapatsenso dziko lao, monga mudaachitira kale.

¹²Inu Ambuye, muŵachitire chifundo anthu otchedwa dzina lanuŵa, Israele amene mudamutchula mwana wanu wachisamba.

¹³Muchitire chifundo mzinda m'mene muli Nyumba yopembedzeramo Inu, Yerusalemu, mzinda wopumulirako Inuyo.

¹⁴Mudzaze Ziyoni ndi nyimbo zambiri zokutamandani, Nyumba yanu muidzaze ndi ulemerero wanu.

¹⁵Achitireni umboni anthu amene mudaŵalenga pa chiyambi, muchitedi zimene aneneri adalankhula m'dzina lanu.

¹⁶Apatseni mphotho anthu okukhulupirirani, ndipo aneneri anu apezeke kuti ngokhulupirika.

¹⁷Inu Ambuye, mverani pemphero la atumiki anu, potsata zimene mudalonjeza pamene Aroni adadalitsa anthu anu. Apo anthu onse a dziko lapansi adzadziŵadi kuti Inu ndinu Ambuye, Mulungu wamuyaya. Za kusankhula

¹⁸M'mimba mumaloŵa zakudya zosiyanasiyana, koma chakudya china chimapambana chinzake.

¹⁹Monga lilime limazindikira mitundu yosiyanasiyana ya nyama, chonchonso munthu wanzeru amatha kuzindikira mabodza.

²⁰Munthu wa nzeru zopotoka amadzetsa mavuto, nkofunika munthu wodziŵa zambiri kuti ambwezere munthu wotere. Za kusankha mkazi

²¹Munthu wamkazi amavomera ukwati mwamuna aliyense, koma ana aakazi ena ali bwino koposa anzao.

²²Kukongola kwa munthu wamkazi kumasangalatsa omuyang'ana, amuna safuna chinanso kuposa pamenepo.

²³Ngati mkazi ngwolankhula mofatsa ndi modzichepetsa, mwamuna wake ngwamwai kupambana amuna ena onse.

²⁴Munthu akatenga mkazi, ndiye kuti wagwira pakulu, ali ndi mthandizi womuyenera ndiponso nsanamira yoyedzamirako.

²⁵Kumene kulibe mpanda, mbala zimabako. Munthu amene alibe mkazi, ntchito nkuyendayenda ndi kudandaula.

²⁶Ndanitu angakhulupirire mbala yomangoyendayenda m'mizinda yosiyanasiyana? Chimodzimodzi ndani angakhulupirire munthu wopanda kwao, womangogona kulikonse kumene kwamdera?