Read Buku Loyera - Chichewa Mphu. 37 Bible Online

Mphu. 37 - Buku Loyera - Chichewa bible

Mphu. 37

¹Za abwenzi onyenga Bwenzi aliyense amati, “Inenso ndine bwenzi lako.” Koma ena ndi abwenzi dzina chabe.

²Kodi si chinthu chomvetsa chisoni kwambiri kuti mnzako kapena bwenzi lako asanduke mdani wako?

³Kodi zidachitika bwanji kuti pendekero loipa chotere lidzaze dziko lapansi ndi kunyenga anthu?

⁴Mnzako wina amakhala nawe mosangalala, pamene uli pabwino, koma pa nthaŵi ya mavuto amakupandukira.

⁵Mnzako weniweni amakuthandiza polimbana ndi adani ako, nkhondo ikabuka, amatenga zida nkukuteteza.

⁶Usaiŵale bwenzi lako mumtima mwako, usamtaye utalemera. Za alangizi

⁷Mlangizi aliyense amakonda kupereka malangizo, koma ena amangofunako phindu lao.

⁸Uchenjere naye munthu wodzakulangiza, uyambe waona kuti akufunapo phindu lanji, chifukwatu ameneyo makamaka akuganiza za iye yemwe poyamba, chilipo ndithu chimene wakukonzekera.

⁹Angathe kunena kuti; “Zimene ukuchitazi ndi zabwino,” namadikira kuti zinthu zikugwere.

¹⁰Usakapemphe nzeru kwa munthu amene amakupenekera, usaulule zolinga zako kwa amene amakuchitira nsanje.

¹¹Usafunse munthu wamkazi za amene amapikisana naye, kapena munthu wamantha kumfunsa za nkhondo, munthu wogulitsa kumfunsa za malonda, munthu wogula kumfunsa za kugulitsa, munthu waumbombo kumfunsa za kuthokoza, munthu wouma mtima kumfunsa zachifundo, munthu waulesi kumfunsa za ntchito ina iliyonse, munthu waganyu kumfunsa za kutsiriza ntchito, kapitao waulesi kumfunsa za ntchito yovuta. Pofuna kupempha nzeru usadalire anthu ameneŵa.

¹²Koma iwe uziyendera munthu woopa Mulungu, amene ukudziŵa kuti amatsata Malamulo, amene amaganiza monga iwe, amene adzakuthuzitsa mtima ukalakwa pena.

¹³Komanso udzifunsitse mtima, chifukwa palibenso wina wokhulupirika ngati mtima wako.

¹⁴Nthaŵi zina mtima wa munthu umamudziŵitsa zambiri kupambana alonda asanu ndi aŵiri okhala pa nsanja.

¹⁵Koma koposa zonsezo, uzipemphera kwa Mulungu Wopambanazonse kuti akuyendetse m'njira yoona.

¹⁶Ntchito iliyonse imayamba ndi kuganiza kwanzeru, ndipo chilichonse choti uchite, uyambe wachisinkhasinkha bwino.

¹⁷Maganizo mizu yake ili mu mtima.

¹⁸Mumtima mumaphuka nthambi zinai: zabwino ndi zoipa, moyo ndi imfa. Zonsezi mfumu yao ndi lilime.

¹⁹Munthu angathe kukhala ndi nzeru zophunzitsa ena, koma iyeyo osatha kudzichitira kanthu kaphindu.

²⁰Munthu wochenjera pakamwa anzake nkudana naye, ndiye potsiriza pake amafa ndi njala.

²¹Zimenezi zimachitika chifukwa Ambuye sadamukomere mtima, ndipo iyeyo alibe nzeru.

²²Wina amadziyesa wochenjera, koma zimene amaphunzitsa zimakhala zoona kwa iye yekha.

²³Munthu waluntha weniweni amaphunzitsa anthu ake, zimene amaphunzitsa zimakhala zoona ndithu kwa aliyense.

²⁴Munthu wanzeru anthu amamtamanda, onse omuwona amamutcha wodala.

²⁵Masiku a moyo wa munthu ngoŵerengeka, koma masiku a moyo wa Israele ngosaŵerengeka.

²⁶Munthu wanzeru anthu onse amamkhulupirira, ndipo adzamkumbukira nthaŵi zonse. Za kudziletsa

²⁷Mwana wanga, pa moyo wako wonse uzidziyesayesa. Zindikira bwino zimene zili zoipa kwa iwe ndipo usazilole.

²⁸Chifukwa si zonse zimakhalira bwino munthu aliyense, ndipo si munthu aliyense amakondwera ndi zinthu zonse.

²⁹Usachite khwinthi ndi tokomera m'kamwa, usakhale wadyera pa chakudya.

³⁰Munthu akakhutitsa amadwala, kudyetsa kwambiri kumachititsa ntchofu.

³¹Ambiri amafa chifukwa cha kudyetsa. Ulewe zimenezi ndipo udzakhala moyo nthaŵi yaitali.