Read Buku Loyera - Chichewa Mphu. 38 Bible Online

Mphu. 38 - Buku Loyera - Chichewa bible

Mphu. 38

¹Za matenda ndi mankhwala Sing'anga uzimpatsa ulemu woyenerera, chifukwa cha ntchito zimene amakuchitira, paja nayenso adamlenga ndi Ambuye.

²Nzeru zake zochizira zimachokera kwa Mulungu Wopambanazonse, ndipo mafumu amamulipira.

³Sing'anga nzeru zake zimamsandutsa wokwera, ndipo akuluakulu amamulemekeza.

⁴Ambuye adalenga mankhwala kuchokera m'nthaka, ndipo munthu wanzeru saŵanyoza.

⁵Kodi suja kamtengo kadakometsa madzi nthaŵi ija, kuti mphamvu za Ambuye zidziŵike?

⁶Ambuye amapatsa anthu nzeru kuti aŵayamike chifukwa cha ntchito zao zodabwitsa.

⁷Sing'anga amachiza zoŵaŵa ndi mankhwala amenewo. Katswiri wa mankhwala ndiye amene amasakaniza mankhwalawo mwa nzeru zake.

⁸Choncho ntchito za Ambuye nzosatha, amapereka moyo pa dziko lonse lapansi.

⁹Mwana wanga, ngati ukudwala, usadzilekerere, koma upemphere kwa Ambuye ndipo adzakuchiritsa.

¹⁰Leka zolakwa zako, usaipitse manja ako, ndipo ulapiretu mu mtima machimo ako onse.

¹¹Pereka nsembe zofukiza lubani ndi za ufa wosalala, uthire mafuta pa zopereka zako monga ungathere.

¹²Tsono uitane sing'anga, poti nayenso adamulenga ndi Ambuye. Usamufulatire, chifukwa ukumusoŵadi.

¹³Ilipo nthaŵi pamene kuchira kwako kumakhala m'manja mwa asing'anga.

¹⁴Paja iwonso amachita kupempha Ambuye kuti aŵathandize pa ntchito yao yochepetsa zoŵaŵa ndi yochiza, kuti apulumutse moyo wa anthu.

¹⁵Munthu akachimwira Mlengi wake, adzipereke m'manja mwa sing'anga.

¹⁶Mwana wanga, umkhetsere misozi munthu wakufa. Poti uli ndi chisoni chachikulu, uyambe ndiwe kulira kwambiri. Uike mtembo wake m'manda potsata mwambo, usaleke kuŵalemekeza manda akewo.

¹⁷Misozi yako ikhale yambiri kulira kwako kukhale kwakukulu, monga kuyenera munthuyo. Ulire masiku angapo, kuwopa kuti anthu angakunene, ndipo uthuze mtima ndi kuleka chisoni.

¹⁸Paja chisoni chimafikitsa munthu ku imfa, ndipo mtima wachisoni umathetsa mphamvu.

¹⁹Pa mazunzo chisoni chimapitirira, moyo wongokhala ndi chisoni umapsinja mtima.

²⁰Tsono usalekerere mtima wako kukhala wa chisoni chonyanya. Uleke chisonicho, ukumbukire kuti nawenso udzafa.

²¹Usaiŵale kuti wakufa sadzabwereranso. Sungathe kumthandiza, ndiye ungodzipweteka.

²²Kumbukira kuti zimene zachitikira iye, iwenso zidzakuchitikira. “Ladzulo linali lake, lalero nlako.”

²³Wakufa ataikidwa, usamkumbukirenso, iye atakusiya, iwe ukhazike mtima pansi. Za ntchito zina

²⁴Nzeru za mlembi zimapezeka munthu akaona mpata wokwanira wophunzira, amene satanganidwa ndi zambiri angathe kukhala wanzeru.

²⁵Kodi angakhale bwanji ndi nzeru munthu wongoyendetsa pulao, amene amangonyadira kukhala ndi mkwapulo m'manja? Amangoyendetsa ng'ombe zake nkuzama m'ntchito za ng'ombezo, nkhani zokamba ndi za ng'ombe basi.

²⁶Amangolimbikira kulima mizere, nkumagwira ntchito mpaka usiku kuti adyetse anaang'ombe.

²⁷Chimodzimodzinso anthu aluso ndi amisiri amene amagwira ntchito usana ndi usiku. Ena amazokota zosindikizira, namayesayesa kusiyanitsa zithunzi zolembapo. Amaika mtima pa za kulemba bwino chithunzi cholingana ndi chifanizo. Ndipo amachezera usiku kuti aitsirize ntchito yaoyo.

²⁸Chimodzimodzinso mmisiri wosula, amene amakhala pafupi ndi mwala wosulirapo. Iye amangoganiza zosula bwino chitsulo chake. Mpweya wotentha wa moto umakhwinyatitsa khungu lake. Iye uja amalimbanadi ndi moto wam'ng'anjo. Kulira kwa nyundo kumamgonthetsa makutu, maso ake amangokhala pa chinthu chimene akusulacho. Amangofuna kumaliza ntchito yake, ndipo amaigwira mpaka usiku kuti aitsirize bwino.

²⁹Chimodzimodzinso munthu woumba mbiya, amene ali pa ntchito yake, amazunguza mkombero ndi mapazi ake. Amatanganidwa kwambiri ndi ntchito yake kuti akwaniritse chiŵerengero cha mbiya zofunika.

³⁰Amakumba dothi ndi dzanja lake, nalipondaponda ndi mapazi yake. Amalimbikira kuti aikulungize bwino, ndipo amachezera kuti atsuke uvuni bwino lomwe.

³¹Amisiri onsewo amadalira manja ao, ndipo aliyense ali ndi luso pa ntchito yake.

³²Popanda anthu otereŵa, mzinda sungamangike, ndipo anthu sangathe kukhalamo, alendo sangadzereko.

³³Koma anthu otere simuŵapeza pa bwalo lokambirana, kapena pa malo aulemu pa msonkhano. Sakhala pa mipando ya oweruza, samvetsa zogamula za pa bwalo la milandu. Sadziŵa kufotokoza za mwambo ndi za kuweruza, ndipo sapezeka pakati pa anthu onena miyambi.

³⁴Komabe ntchito zao nzothandiza zedi kutukula dziko lino lapansi. Pa mapemphero ao amangoganiza za ntchito yao.