Read Buku Loyera - Chichewa Mphu. 39 Bible Online

Mphu. 39 - Buku Loyera - Chichewa bible

Mphu. 39

¹Za munthu wophunzira Pali ntchito inanso yosiyana zedi, ntchito ya munthu woika mtima pa kuphunzira za Malamulo a Wamphamvuzonse. Munthu ameneyo amafufuzafufuza nzeru za anthu akale ndipo amaika mtima pa zimene aneneri adanena.

²Amasonkhanitsa nkhani za anthu otchuka ndipo amayesetsa kulondola nzeru zozama za mafanizo.

³Amasanthula matanthauzo obisika a miyambi ndipo amatha kulongosola zinsinsi za nthano.

⁴Amagwira ntchito yotumikira akuluakulu ndipo amapezeka pakati pa olamulira. Amayenda ku maiko achilendo kuti akafufuze za makhalidwe oipa ndi abwino a anthu.

⁵Amachita khama kuuka m'mamaŵa kuthamangira kwa Ambuye, Mlengi wake, ndipo amapemphera kwa Mulungu Wopambanazonse. Amapemphera ndi mtima wonse ndi pakamwa pomwe napepesa kuti amkhululukire machimo ake.

⁶Ambuye, Mulungu wamkulu, akafuna, adzamdzaza nazo nzeru zodziŵira zinthu. Pamenepo munthuyo adzalalika mau anzeru, ndipo adzayamika Ambuye popemphera.

⁷Adzaongolera maganizo ake ndi nzeru zake pakuphunzira, ndipo adzasinkhasinkha zachinsinsi zimene adaphunzirazo.

⁸Pa zophunzitsa zake adzadziŵika kuti ndi wanzeru, adzanyadira Malamulo a chipangano cha Ambuye.

⁹Ambiri adzamtamanda chifukwa cha nzeru zake, ndipo sizidzaiŵalika. Mbiri yake sidzafafanizika, dzina lake lidzakhala lotchuka pa mibadwo yonse.

¹⁰Mitundu ya anthu idzakamba za nzeru zake, ndipo mpingo udzamuyamika pa msonkhano.

¹¹Akadzakhala ndi moyo nthaŵi yaitali, adzakhala wotchuka koposa anthu chikwi chimodzi. Akadzafa msanga, mbiri yakeyo idzamkwanira. Nyimbo yotamanda Mulungu

¹²Mumtima mwangamu muli zinanso zambiri zoti ndinene. Ndili wodzaza monga m'mene umaonekera mwezi wathunthu.

¹³Ndimvereni, ana anga ouzika, mukule monga duŵa lokongola lobzala m'mbali mwa mtsinje.

¹⁴Mwazani fungo lokoma ngati lubani, phukani maluŵa ngati kakombo. Mwazani fungo lokoma, imbani nyimbo yotamanda. Tamandani Ambuye chifukwa cha ntchito zao zonse.

¹⁵Lalikani za ukulu wa dzina la Ambuye, muŵayamike ndi kuŵatamanda ndi nyimbo zapakamwa ndi azeze. Muŵatamande ndi mau akuti,

¹⁶“Zonse zimene Ambuye adalenga nzabwino kwambiri. Zonse zimene amalamula zimachitika pa nthaŵi yake.”

¹⁷Munthu wina asafunse kuti, “Kodi ichi nchiyani? Nanga izo bwanji?” Funso lililonse lili ndi nthaŵi yake. Pamene Ambuye adalankhula, madzi adaundana, mau ake adapanga maiŵe a madzi.

¹⁸Akalamula, chilichonse chimachitikadi momwe afunira, palibe munthu amene angachepetse mphamvu zake zopulumutsira.

¹⁹Amaona zochita za anthu onse, palibe choti nkubisira maso ake.

²⁰Amakhala maso chiyambire cha nthaŵi mpaka muyaya, palibe chinthu chodabwitsa pamaso pa Ambuye.

²¹Munthu wina asafunse kuti, “Kodi ichi nchiyani? Nanga izo bwanji?” Chinthu chilichonse chidalengedwa ndi cholinga chake.

²²Madalitso ake ali ngati mtsinje wosefukira umene umanyowetsa nthaka youma.

²³Koma anthu akunja amaŵakwiyira, monga adasandulitsa madzi abwino kuti akhale amchere.

²⁴Kwa anthu oyera mtima njira za Mulungu nzolungama koma kwa anthu ochimwa nzokhumudwitsa.

²⁵Kuyambira pa chiyambi zinthu zabwino zidalengedwa chifukwa cha anthu abwino, zinthu zoipa zidalengedwa chifukwa cha anthu ochimwa.

²⁶Zinthu zofunika kwambiri pa moyo wa munthu ndi izi: madzi, moto, chitsulo, mchere, ndiponso ufa, uchi, mkaka, vinyo, mafuta ndi zovala.

²⁷Zonsezi nzabwino kwa anthu oopa Mulungu, koma zimasanduka zoipa kwa anthu ochimwa.

²⁸Pali mphepo zina zimene zidalengedwa kuti zizilanga anthu, ndipo mkuntho wake umaŵasautsa. Pa nthaŵi ya chiwonongeko zimaonetsa mphamvu zake, zimapoza ukali wa amene adazilenga.

²⁹Moto ndi matalala, njala ndi imfa, zonsezi zidalengedwa kuti zikhale chilango.

³⁰Zilombo, zinkhanira, mamba ndi lupanga zimenezi nzolanga anthu osapembedza ndi kuŵaononga,

³¹Zonsezi zimakondwera kuchita zimene Mulungu amalamula. Nzokonzeka kutumikira Ambuye pamene kufunikira, ndipo nthaŵi yake ikakwana sizinyozera malamulo ake.

³²Ndidazivomera zonsezi chiyambire, ndipo nditaganizaganiza ndidalemba kuti,

³³“Ntchito zonse za Ambuye nzabwino, amapereka zonse zofunika pa nthaŵi yake.”

³⁴Munthu wina asanene kuti, “Ichi si chabwino ngati icho,” chifukwa zinthu zonse zidzadziŵika kuti nzabwino pa nthaŵi yake.

³⁵Tiyeni tsopano, ndi mtima wanu wonse muimbe mokweza, ndipo mutamande dzina la Ambuye.