Read Buku Loyera - Chichewa Mphu. 40 Bible Online

Mphu. 40 - Buku Loyera - Chichewa bible

Mphu. 40

¹Za mavuto a moyo wa munthu Munthu aliyense adalembedwa ntchito yakalavulagaga, ana a Adamu amasenza goli lolemera, kuyambira pamene adatuluka m'mimba mwa amai ao, mpaka pamene adzabwerere ku nthaka, mai wa onse.

²Chimene chimaika m'mitima mwao maganizo opweteka ndiponso mantha, ndi nkhaŵa yodikira tsiku la kufa kwao.

³Ngakhale munthu akhale pa mpando waufumu ndi waulemerero, kapena akhale wosauka wongoti mbwerekete pa fumbi ndi pa phulusa,

⁴ngakhale munthu akhale wovala zamlangali ndi nsangamutu yaufumu, kapena akhale wovala chiguduli,

⁵onsewo amangopeza ukali ndi nsanje, nkhaŵa ndi mavuto, kuwopa imfa, kuyambana ndiponso ndeu. Akapita kukagona usiku, kutulo amangoganiza zina ndi zina za mtundu womwewo.

⁶Mwina angousa pang'ono, mwina osausa konse, ndipo amavutika kwambiri kutuloko, monga momwe amachitira ali maso. Amavutika ndi maloto oŵaŵa, ngati munthu wothaŵa ku malo a nkhondo.

⁷Pamene ali pafupi kupulumuka, amatsitsimuka, nkumadabwa kuti amachita mantha popanda chifukwa.

⁸Zolengedwa zonse, anthu kapena nyama, anthu ochimwa ndiye kasanunkaŵiri,

⁹zimapeza imfa, magazi, kumenyana, lupanga, masoka, njala, mazunzo ndi mliri.

¹⁰Zonsezi zidalengedwa chifukwa cha anthu ochimwa, ndipo chigumula chija chidachitika chifukwa cha iwowo.

¹¹Zonse zochokera ku nthaka zimabwereranso ku nthaka, ndipo zonse zochokera m'madzi zimabwereranso ku nyanja.

¹²Ziphuphu ndi zosalungama, zonsezi zidzatha, koma chikhulupiriro choona chidzakhalapo mpaka muyaya.

¹³Chuma cha anthu oipa chidzaphwa ngati mtsinje, chidzangozimirira ngati mphezi yogunda mwamphamvu nthaŵi yamvula.

¹⁴Munthu wachifundo adzapeza kusangalala, koma anthu osamvera Malamulo adzaonongeka.

¹⁵Anthu osapembedza Mulungu sadzakhala ndi adzukulu ambiri, ali ngati mitengo yozika mizu yopanda mphamvu pa mwala.

¹⁶Bango lomera m'mbali mwa mtsinje, adzalizula asanazule udzu wina.

¹⁷Kuchita zachifundo ndi ngati munda wodalitsidwa, kupatsa mwaufulu nchinthu chokhala nthaŵi zonse.

¹⁸Amapeza bwino munthu amene ali pa ntchito ndiponso munthu amene amadziimira payekha, koma wopeza chuma amakondwera koposa aŵiriwo.

¹⁹Munthu akakhala ndi ana namanga mzinda, amatchuka, komabe kukhala ndi mkazi wabwino nkwabwino koposa.

²⁰Vinyo ndi zoimbaimba zimasangalatsa mtima, koma kukonda nzeru ndiye chinthu chopambana zonsezo.

²¹Zitoliro ndi azeze zimakometsa nyimbo, koma liwu lokongola loimba ndi pakamwa limapambana zonsezi.

²²Maso amakhumbira maonekedwe abwino ndi okongola, koma mmera wobiriŵira wam'minda umaposa zonsezi.

²³Kukumana ndi bwenzi kapena mnzako nchokondwetsa, koma mkazi ndi mwamuna wake akakumana, nchokondwetsa koposa.

²⁴Achibale ndi ogwirizana nawo ali bwino pa nthaŵi yamavuto, koma kupereka zachifundo kumapulumutsa kopambana.

²⁵Golide ndi siliva zimalimbitsa munthu, koma malangizo abwino ndiye chinthu chopambana zonsezo.

²⁶Chuma ndi mphamvu zimalimbitsa mtima, koma kuwopa Ambuye kumapambana ziŵirizo. Munthu woopa Ambuye sasoŵa kanthu, sayeneranso kufunafuna womthandiza.

²⁷Kuwopa Ambuye kuli ngati munda wodalitsidwa, kumateteza munthu kupambana mbiri yabwino kwabasi.

²⁸Mwana wanga, usakhale munthu wopemphapempha, ndi bwino kufa kupambana kupemphapempha.

²⁹Munthu wodalira chakudya cha mnzake sakhala ndi moyo weniweni, amaipitsa kum'mero kwake ndi chakudya cha wina. Munthu wanzeru ndi wotsata mwambo amalewa zinthu zotere.

³⁰Munthu wopanda manyazi amati kupempha nkwabwino, koma m'mimba mwake muli moto woyaka.