Read Buku Loyera - Chichewa Mphu. 41 Bible Online

Mphu. 41 - Buku Loyera - Chichewa bible

Mphu. 41

¹Za imfa Iwe imfa, kukumbukira iwe nkoŵaŵa kwambiri kwa munthu amene ali pa mtendere pakati pa chuma chake, munthu amene alibe zomdetsa nkhaŵa, amene zonse zikumuyendera bwino, amenenso akali ndi mphamvu zokondwerera chakudya chake.

²Iwe imfa, kufika kwako nkokomera munthu wosauka ndi wopanda mphamvu, wokalamba kwambiri ndi wodera nkhaŵa zinthu zambiri, wokhumudwa ndi wosathanso kupirira.

³Usachite mantha ndi lamulo lakuti udzafa. Kumbukira amene adafa iwe uli moyo ndipo amene adzafa iwe utafa kale.

⁴Ndi lamulo la Ambuye kuti zinthu zonse zamoyo zidzafa, koma iwe ungatsutsane bwanji ndi kufuna kwa Mulungu Wopambanazonse? Ngakhale ukhale ndi moyo zaka khumi, zana kapena chikwi, m'manda sadzakufunsa kanthu pa zimenezi. Za chilango cha anthu oipa

⁵Ngoipitsitsa ana a anthu ochimwa, amene amaleredwa pakati pa anthu osalabadako za Mulungu.

⁶Chuma cholandira ana otereŵa chidzatha, zidzukulu zaonso zidzakhala zotsutsidwa nthaŵi zonse.

⁷Munthu wosapembedza Mulungu ana ake adzamloza chala, poti iwo omwe ngonyozeka chifukwa cha bambo waoyo.

⁸Tsoka kwa inu anthu osapembedza Mulungu, inu amene mudasiya Malamulo a Mulungu Wopambanazonse.

⁹Mukabadwa, mwabadwira matemberero, mukadzafa, mudzakhalabe otembereredwa.

¹⁰Chimene chimachokera m'nthaka, chidzabwerera kunthaka komweko, chimodzimodzinso anthu osapembedza Mulungu, amachoka m'matemberero kukagwa m'chiwonongeko.

¹¹Anthu amalira akufa ao, koma ndi dzina lomwe loipa la munthu wochimwa lidzaiŵalika.

¹²Samalirani mbiri yanu, chifukwa idzakhala nanu nthaŵi yaitali kupambana matumba chikwi chimodzi a golide.

¹³Masiku a moyo wabwino ngoŵerengeka, koma mbiri yabwino imakhala mpaka muyaya. Za mtima wa manyazi

¹⁴Ana anga, sungani malangizo anga, ndipo mudzakhala ndi mtendere. Nzeru zobisika zili ngati chuma chobisika, ziŵiri zonsezi zilibe phindu.

¹⁵Ndi bwino kubisa uchitsiru, koposa kubisa nzeru.

¹⁶Tsono malangizo angaŵa muŵamvere ndi ulemu. Si manyazi aliwonse amene muyenera kukhala nawo, ndiponso si anthu onse angathe kuweruza zinthu moyenera.

¹⁷Mkhalidwe wadama uzichita nawo manyazi pamaso pa atate ako kapena amai ako. Mabodza uzichita nawo manyazi pamaso pa kalonga kapena mfumu.

¹⁸Zochimwa zako uzichita nazo manyazi pamaso pa mtsogoleri kapena woweruza milandu. Zolakwa zako uzichita nazo manyazi pamaso pa mpingo. Zinthu zosalungama uzichita nazo manyazi pamaso pa anzako kapena abwenzi ako.

¹⁹Ngati waba, uzichita manyazi pamaso pa anthu oyandikana nawo. Uzichita manyazi ngati udaphwanya lonjezo kapena chipangano. Uzichita manyazi ndi mazoloŵero aumbombo pakudya. Uzichita manyazi ukapereka kapena kulandira kanthu moderera.

²⁰Uzichita nako manyazi kukana kumbwezera moni kwa mnzako, kapena kuyang'anitsitsa mkazi wadama.

²¹Uzichita nako manyazi kufulatira wachibale, kapena kulanda wina zimene zili zake, kapena kupenyetsetsa mkazi wamwini.

²²Uzichita nako manyazi kuseŵera ndi mdzakazi wa munthu wina, usayerekeze kuyandikira bedi lake. Uzichita nako manyazi kutonza abwenzi ako, kapena kuŵanyoza utaŵapatsa kanthu.

²³Uzichita nako manyazi kubwerezabwereza mphekesera, kapena kuulula zinsinsi za anthu ena. Ukatero udzakhala ndi manyazi oyenera, ndipo anthu onse adzakukomera mtima.