Read Buku Loyera - Chichewa Mphu. 43 Bible Online

Mphu. 43 - Buku Loyera - Chichewa bible

Mphu. 43

¹Dzuŵa Lisatero kukongola thambo lakumwamba! Ngokongoladi kwambiri maonekedwe a mlengalenga!

²Dzuŵa likamatuluka limalalika kuti, “Ntchito za Wopambanazonse nzododometsa kwambiri.”

³Masana limaumitsa dziko, ndani angapirire kutentha kwake?

⁴Munthu ayenera kuvukuta, akafuna kuti ng'anjo itenthe. Koma kutentha kwa dzuŵa pa mapiri, nkopambana kutentha kwa ng'anjo katatu. Limamwaza mpweya wotentha kwambiri ndipo limathobwa m'maso ndi kuŵala kwake.

⁵Ambuye amene adalenga dzuŵalo ngaakulu, mau ao amalifulumiza pa njira yake. Mwezi

⁶Adalenganso mwezi umene sulephera kukhala, umene uli chizindikiro choonetsa zigawo za nthaŵi mpaka muyaya.

⁷Timalondola masiku achikondwerero potsata mwezi. Mwezi umaŵala kwambiri kenaka nkuzimirira.

⁸Mwezi udapatsako dzina lake kwa miyezi, ndipo umanka nukongolerakongolera pamene ukusinthika. Uli ngati mbendera ya miyuni yamumlengalenga, imene imaŵala ku thambo lakumwamba.

⁹Kunyezimira kwa nyenyezi kumakongoletsa mlengalenga, kuŵala kwake kumakometsa thambo la Ambuye.

¹⁰Akazilamulira Woyera uja, zimaima kuti njo pamene adaziikapo, iliyonse silephera pa ulonda wake. Utawaleza

¹¹Yang'ana utawaleza ndipo tamanda Mlengi wake. Kuŵala kwake nkokongola kwabasi.

¹²Umakhala mu mlengalenga ngati uta wochezimira, manja a Wopambanazonse ndiwo amaukoka. Zodabwitsa za dziko lapansi

¹³Mulungu amalamula chisanu chambee kuti chigwe, amachititsa mphezi kuti zitsimikize chiweruzo chake.

¹⁴Mosungira chuma chake mumatsekuka, ndipo mitambo imauluka ngati mbalame.

¹⁵Amaunjika mitambo ndi mphamvu zake zazikulu, kenaka nkuiphwanya naisandutsa matalala.

¹⁶Pakumva liwu la bingu lake, dziko limanjenjemera. Ndipo Iye akaoneka, chivomezi chimagwedeza mapiri.

¹⁷Iye akalamula, mphepo yakumwera imaomba, monganso mkuntho wakumpoto ndi kamvulumvulu. Amagwetsa chisanu chambee ngati kutera kwa mbalame, chimagwa pansi ngati thenje ya dzombe.

¹⁸Kuyera kwake maso amadodoma nako, ndipo pamene chikugwa, mtima umachita chidwi.

¹⁹Ambuye amawaza pa dziko lapansi chisanu chonga mchere, chikalimba ndi mphepo yozizira, chimasanduka ngati minga.

²⁰Mphepo yozizira yakumpoto ikaomba, pamwamba pa madzi pamalimba ndi chisanu. Padziŵe paliponse madzi amalimba choncho, naphimbapo ngati malaya ankhondo apachifuwa.

²¹Mwina Iye amapsereza mapiri ndi kutentha chipululu, amafotetsa udzu ngati ndi moto.

²²Koma nkhungu yam'mitambo imachiritsa zonse msanga, ndipo zikafota ndi chitungu, mame amazitsitsimutsanso.

²³Ndi nzeru zake adagonjetsa nyanja ndipo adaikamo zilumba.

²⁴Amene amayenda pa nyanja amakamba za kuwopsa kwake, ndipo nkhani zao zimatichititsa chidwi.

²⁵M'nyanjamo muli zolengedwa zachilendo ndi zodabwitsa, muli zamoyo zosiyanasiyana ndi zilombo zikuluzikulu,

²⁶Ndi mphamvu za Mulungu, atumiki onsewo amafika komwe alinga, zonse zimayenda potsata malamulo ake.

²⁷Tingasimbe zambirimbiri, komabe sitingazithe. Mwachidule tingonena kuti, “Ambuye ndiwo Zonse.”

²⁸Tingazipeze kuti mphamvu zoŵatamandira, pakuti Iwowo ngaakulu kupambana ntchito zao zonse.

²⁹Ambuye ngoopsa ndiponso ngaakulu, mphamvu zao nzodabwitsa.

³⁰Tamandani Ambuye monga mungathere, chifukwa amapambana matamando onse. Tamandani ukulu wa Ambuye ndi mphamvu zanu zonse, musatopere, chifukwa simungafikepo.

³¹Kodi alipo amene adaona Ambuye kuti angathe kufotokoza m'mene aliri? Kodi ndani angaŵalemekeze monga momwe kufunikira?

³²Ntchito zao timangoziwona pang'ono chabe, zikalipo zina zambiri zobisika zoposa izo.

³³Ambuye adapanga zinthu zonse ndipo amapereka nzeru kwa anthu oŵapembedza.