Read Buku Loyera - Chichewa Mphu. 44 Bible Online

Mphu. 44 - Buku Loyera - Chichewa bible

Mphu. 44

¹B: M'MBIRI YAKALE Kulemekeza makolo athu akale ku Israele Tsopano tiyeni titamande anthu otchuka ndi kunyadira makolo athu potsata mibadwo yao.

²Mulungu adaonetsa mwa iwo kukula kwa ulemerero wake, ndipo adasonyeza ukulu wake chiyambire.

³Ena adakhala mafumu m'maiko ao, ndipo adatchuka chifukwa cha mphamvu zao. Ena anali aphungu anzeru ndipo ankalankhula zolosa.

⁴Ena ankatsogolera anthu ndi malangizo ao, ankamvetsa bwino za m'mitima mwa anthu, ndipo ankaphunzitsa anthu ao mwanzeru.

⁵Ena anali opeka nyimbo zokoma ndipo ankalemba ndakatulo.

⁶Ena anali olemera ndi amphamvu, ankakhala mwamtendere m'nyumba mwao.

⁷Anthu onseŵa adatchuka pakati pa anthu a mbadwo wao, ndipo ankaŵanyadira pa moyo wao.

⁸Ena adasiya mbiri yabwino, ndipo anthu akuŵakumbukirabe mpaka pano.

⁹Pali ena amene anthu saŵakumbukira, amene adangoti zii, ngati sadakhalepo ndi moyo. Iwo achita ngati sadabadwe konse, chimodzimodzinso ana ao oŵatsatira.

¹⁰Koma nawu mndandanda wa anthu otchuka, amene ntchito zao zabwino siziiŵalika.

¹¹Chuma chao adzachilandira ndi ana ao, ndipo choloŵa chao chidzakhala cha mibadwo yakutsogolo.

¹²Ana ao amasungabe chipangano, zidzukulu zao zidzateronso chifukwa cha makolo ao.

¹³Zidzukulu zao zidzakhala mpaka muyaya, ndipo ulemerero wao sudzazimirira.

¹⁴Mitembo yao adaiika mwamtendere, koma mbiri yao idzakhala mpaka muyaya.

¹⁵Mitundu ya anthu idzalalika nzeru za anthu ameneŵa, ndipo anthu a Mulungu adzaimba nyimbo zoŵatamanda. Enoki

¹⁶Enoki adakondwetsa Ambuye, ndipo adatengedwa kupita kumwamba. Iye adapatsa mibadwo yonse chitsanzo cha kutembenuka mtima. Nowa

¹⁷Nowa adapezeka kuti anali munthu wangwiro ndi wolungama. Pa nthaŵi ya chilango iye adakhala ngati chiphukira, chifukwa cha iye pa nthaŵi ya chigumula padatsalira anthu ena pansi pano.

¹⁸Ambuye adachita naye chipangano chamuyaya chakuti zamoyo zonse sizidzaonongekanso ndi chigumula. Abrahamu

¹⁹Abrahamu anali kholo lotchuka la mitundu yambiri ya anthu. Palibe amene adakhala womveka ngati iyeyo.

²⁰Adatsata malamulo a Mulungu Wopambanazonse, ndipo adachita naye chipangano. Adakhazikitsa chipanganocho m'thupi mwake, ndipo atamuyesa, adampeza kuti ali wokhulupirika.

²¹Nchifukwa chake Ambuye adamlonjeza molumbira kuti adzadalitsa mitundu ya anthu mwa zidzukulu zake, ndiponso kuti zidzukulu zakezo zidzachuluka ngati fumbi la pa dziko lapansi, zidzakwezedwa ngati nyenyezi. Adalonjezanso kuti dziko laolo lidzakhala lalikuludi, kuchokera ku nyanja ina mpaka ku nyanja ina, ndiponso kuchokera ku mtsinje waukulu mpaka ku malire a dziko lapansi. Isaki ndi Yakobe

²²Isakinso adamlonjeza zomwezo chifukwa cha bambo wake Abrahamu.

²³Madalitso oyenerera mtundu wonse wa anthu ndi chipangano, adazigoneka pa Yakobe. Adamlimbitsa m'madalitso amene adampatsawo ndipo adampatsa dziko kuti likhale choloŵa chake. Adaliduladula m'zigawo naligaŵira mafuko khumi ndi aŵiri aja.