Read Buku Loyera - Chichewa Mphu. 45 Bible Online

Mphu. 45 - Buku Loyera - Chichewa bible

Mphu. 45

¹Mose Ambuye adautsa mtumiki wokhulupirika pakati pa ana a Yakobe, ndipo anthu onse adakondwera naye. Mulungu ndi anthu omwe adamkonda. Iyeyu ndi Mose amene timamkumbukira moyamikira.

²Ambuye adampatsa ulemerero wolingana ndi wa Angelo, ndipo adampatsa mphamvu zoopsera adani ake.

³Iye atalamula, zozizwitsa zija zidalekeka ndipo Ambuye adamkuza pamaso pa mafumu. Adampatsa malamulo okhalira anthu ake, ndipo adamuwonetsako kuŵala kwa ulemerero wake.

⁴Chifukwa cha kukhulupirika kwake ndi kudzichepetsa kwake, Ambuye adamuyeretsa pomupatula pakati pa anthu onse.

⁵Adamlola kuti amve liwu lake, namuloŵetsa mu mdima wandiweyani. Adampatsa Malamulo pamaso mpamaso, Malamulo opatsa moyo ndi nzeru, kuti amudziŵitse Yakobe chipangano, kuti amuphunzitse Israele[2] Malamulowo. Aroni

⁶Ambuye adakweza Aroni, munthu woyera mtima ngati Mose, mbale wake wa fuko la Levi.

⁷Adapangana naye chipangano chosatha, namdzoza kuti akhale wansembe wa anthu ake. Adamlemekeza pomuveka zovala zokongola kwambiri ndi mkanjo waulemu.

⁸Adamuveka zokoma kotheratu, ndi kumpatsa zizindikiro za mphamvu zake. Kabudula wabafuta, mkanjo wautali ndi chovala cha efodi.

⁹Pa mkanjo adaikapo mphonje zonga makangaza, nauzunguliza ndi mabelu ambiri agolide, omaimba akuyenda, kuti azimveka m'Nyumba ya Mulungu, ndi kukhala chikumbutso kwa anthu ake.

¹⁰Adamuveka zovala zaunsembe zagolide ndi zobiriŵira, ndiponso zofiirira, zopetedwa bwino ndi mmisiri. Kenaka adamuveka chovala chapachifuwa chimene adaikamo Urimu ndi Tumimu, cha thonje lofiira, ntchitodi yaumisiri.

¹¹Pa chovalacho adaikapo miyala yamtengowapatali yozokotedwa ngati zosindikizira yokhala m'zoikamo zagolide. Zonsezi zinali ntchito za akatswiri. Pa miyalayo adalembapo maina khumi ndi aŵiri, okumbutsa mafuko a Israele.

¹²Pamwamba pa nduŵira yake adaikapo nsangamutu yagolide yolembapo kuti “Woperekedwa kwa Ambuye.” Chinali chinthu chaluso kwambiri, makaka okongola zedi, chinthu chokondweretsa m'maso pochiwona.

¹³Iye asanaloŵe unsembe, panalibe zinthu zokongola chotere. Palibe munthu wina aliyense amene adazivalapo, koma ana ake okha a Aroni, ndiponso zidzukulu zake nthaŵi zonse.

¹⁴Nsembe zake zidzapserezedwa kwathunthu kaŵiri pa tsiku, nthaŵi zonse.

¹⁵Ndi Mose amene adapatula Aroni namdzoza ndi mafuta odalitsidwa. Chimenechi chinali chipangano chosatha kwa iye ndiponso kwa ana ake mpaka kutha kwa mlengalenga, chakuti iye atsogolere chipembedzo ndi kukhala wansembe ndipo azidalitsa anthu m'dzina la Mulungu.

¹⁶Adamsankhula pakati pa anthu onse kuti azipereka kwa Ambuye nsembe zopsereza, za lubani ndi zonunkhira ngati chikumbutso, kutinso azipepesera anthu machimo ao.

¹⁷Adamsungiza Malamulo ake ndi udindo woweruza potsata Malamulo, kuti aziphunzitsa Yakobe za chipangano chake kuti azimfotokozera bwino Israele Malamulo ake.

¹⁸Anthu ena osakhala a m'banja lake adamuukira ndi kumchitira chiwembu m'chipululu. Ameneŵa anali aŵa: Datani, Abiramu ndi anzao, ndiponso Kora ndi gulu lake, ali ndi ukali waukulu.

¹⁹Ambuye adaziwona zimenezi ndipo adaipidwa nazo. Ali ndi ukali woyaka adaŵaononga, ndipo adaŵachita zoopsa pakuŵatentha ndi moto.

²⁰Tsono adaonjezeranso Aroni zaulemu zina, adafuna kuti choloŵa chake chikhale ichi: adampatsa zipatso zoyamba kucha, kuti azikhala ndi chakudya chambiri.

²¹Choncho iwo amadyapo nsembe zopereka kwa Ambuye, zimene adaapatsa Aroni ndi adzukulu ake.

²²Koma Ambuye sadapatse Aroni dziko lakelake ngati anthu ena. Iye yekha analibe chigawo chake pakati pa anthu, poti Ambuye ndiwo anali chigawo chake ndi choloŵa chake. Finehasi

²³Finehasi, mwana wa Eleazara, anali wachitatu potchuka, chifukwa cha changu chake pa za kupembedza Mulungu, ndiponso chifukwa anali ndi mtima wolimba ndi wosafookera pamene anthu ena adaapanduka. Potero adapepesera Aisraele machimo ao.

²⁴Nchifukwa chake Ambuye adachita naye chipangano chamtendere. Adampatsa ulamuliro pa Nyumba ya Mulungu ndi pa mpingo wake. Adampatsanso iyeyo ndi adzukulu ake ukulu wa unsembe mpaka muyaya.

²⁵Kunalinso chipangano ndi Davide, mwana wa Yese, wa fuko la Yuda, kuti odzaloŵa ufumu wake ndi mmodzi mwa ana ake okha. Koma unsembe wa Aroni unali wopita kwa zidzukulu zake zonse.

²⁶Mulungu akupatseni mtima wanzeru kuti muweruze anthu ake mwachilungamo kuti zonse zisaleke kuŵayendera bwino, ndipo ulemerero wao ufikire ku mibadwo yonse yakutsogolo.