Read Buku Loyera - Chichewa Mphu. 46 Bible Online

Mphu. 46 - Buku Loyera - Chichewa bible

Mphu. 46

¹Yoswa Yoswa, mwana wa Nuni, anali ngwazi yankhondo, ndiye amene adaloŵa m'malo mwa Mose pa ntchito ya uneneri. Potsata tanthauzo la dzina lake, adasanduka wotchuka pa ntchito yopulumutsa osankhidwa a Ambuye. Adagonjetsa adani amene ankaŵathira nkhondo, ndi kupatsa Aisraele dziko laolao.

²Anthu ankachita chidwi poona m'mene ankakwezera manja ake, ndi m'mene ankasamulira lupanga lake pochita nkhondo ndi mizinda.

³Nkale lonse ndani adaonetsa kulimba mtima ngati kwa iyeyu? Pajatu ndiye amene ankamenya nkhondo za Ambuye.

⁴Kodi suja adaaimitsa dzuŵa mpaka tsiku limodzi lidaatalika ngati masiku aŵiri?

⁵Adapemphera Mphambe Wopambanazonse pamene adani ankampanikiza ku mbali zonse, ndipo Ambuye amphamvu adayankha pemphero lake pogwetsa matalala oopsa.

⁶Adakantha anthu a dzikolo ndipo adaonongeratu adani ake pa Matsitso paja, kuti mitundu ya anthu adziŵe mphamvu ya zida zake, poti iye ankamenyera nkhondo Ambuye, ndipo ankamvera Wamphamvu uja kotheratu. Kalebe

⁷Pa nthaŵi ya Mose, Yoswa uja ndi Kalebe, mwana wa Yefune, adakhala okhulupirika polimbana ndi gulu lonse. Adaletsa anthu kuti angachimwe nathetsa kudandaula kwao.

⁸Mwa anthu oyenda pansi 600,000 aŵiri okhawo ndiwo adapulumuka, nakaloŵa m'dziko laolao, dziko lamwanaalirenji.

⁹Ambuye adampatsa nyonga Kalebe, ndipo iye adakhala nazo mpaka nthaŵi ya ukalamba wake. Adakwera m'dziko lamapiri, nalilanda kuti likhale la zidzukulu zake.

¹⁰Tsono Aisraele onse adaona kuti ndi chinthu chabwino kutsata Ambuye mokhulupirika. Aweruzi

¹¹Panalinso aweruzi, aliyense wotchuka pa yekha. Onsewo adakana kupembedza mafano, ndipo sadapandukire Ambuye. Aŵakumbukire moŵalemekeza.

¹²Mafupa ao apeze moyo watsopano kuchokera kumanda kumene akugona, ndipo mbiri ya kutchuka kwao ibukenso mwa adzukulu ao. Samuele

¹³Ambuye adakonda kwambiri Samuele. Ali mneneri wa Ambuye, adakhazikitsa ufumu, ndipo adadzoza olamulira anthu ake.

¹⁴Nthaŵi zonse adaweruza anthu potsata Malamulo a Ambuye, ndipo Ambuyewo adasunga bwino Yakobe.

¹⁵Poti Samuele adakhala wokhulupirika, adaoneka kuti anali mneneri weniweni. Pa mau ake anthu adazindikira kuti analidi mneneri woona.

¹⁶Adapemphera Ambuye Amphamvuzonse, pamene adani ankampanikiza ku mbali zonse, ndipo adapereka nsembe ya mwanawankhosa.

¹⁷Pamenepo mau a Ambuye adagunda kumwamba ngati bingu, adamveka ndi phokoso lalikulu.

¹⁸Adaononga atsogoleri a adani ndiponso atsogoleri onse a Afilisti.

¹⁹Samuele asanakapumule kwamuyaya, adachita umboni pamaso pa Ambuye ndi pa wodzozedwa wake kuti, “Sindidatengepo chinthu cha munthu wina, ngakhale nsapato,” ndipo palibe amene adamtsutsa.

²⁰Ngakhale atafa, adalosabe nachenjeza mfumu Saulo za imfa yake. Ali m'manda adalankhula mau olosa kuti machimo a anthu ake afafanizike.