Read Buku Loyera - Chichewa Mphu. 47 Bible Online

Mphu. 47 - Buku Loyera - Chichewa bible

Mphu. 47

¹Natani Atafa Samuele, padabwera Natani, kuti akhale mneneri pa nthaŵi ya Davide. Davide

²Monga momwe amapatulira mafuta pakati pa zopereka za nsembe ya chiyanjano, momwemonso Davide Ambuye adamsankhula pakati pa Aisraele onse.

³Ankaseŵera ndi mikango ngati anaambuzi, ndiponso ndi zimbalangondo ngati anaankhosa.

⁴Suja akali mnyamata adapha chiphona, nachotsa manyazi a anthu ake, pamene adaponya mwala ndi khwenengwe nkugwetsa Goliyati wodzikuza uja.

⁵Ndiye kuti adapempha Ambuye Opambanazonse, ndipo Iwo adalimbitsa dzanja lake lamanja kuti aphe wankhondo wamphamvu uja, ndi kutsimikiza mphamvu za anthu ake.

⁶Motero anthu adamtamanda ngati wogonjetsa anthu 10,000. Adamuyamika chifukwa cha madalitso amene Ambuye adampatsa, kenaka adamuveka chisoti chaufumu.

⁷Iye adagonjetsa adani ake onse ku mbali zonse, naonongeratu mphamvu za Afilisti, ndipo mpaka lero lino adaniwo alibenso mphamvu.

⁸Pa zonse zimene ankachita, ankathokoza Woyera uja, Wopambanazonse uja. Ankachita zimenezi ndi mau oyamika. Ankaimba nyimbo ndi mtima wake wonse, chifukwa ankakonda Mlengi wake.

⁹Adasankhula anthu oimba nyimbo ku guwa, kuti aziimba nyimbo zokoma ndi zeze.

¹⁰Adakometsa masiku achikondwerero nakhazikitsa mwambo wake pa nyengo ndi nyengo, kotero kuti anthu ankatamanda dzina loyera la Ambuye. Ndipo m'Nyumba ya Mulungu munkamveka mau oyamika kuyambira m'maŵa mpaka madzulo.

¹¹Ambuye adamkhululukira machimo ake, ndipo adampatsa mphamvu zazikulu mpaka muyaya. Adachita naye chipangano chaufumu nampatsa mpando waufumu m'dziko la Israele. Solomoni

¹²Pambuyo pa Davide, mwana wake wanzeru adaloŵa ufumu. Adakhazikika popanda zovuta, chifukwa cha bambo wakeyo.

¹³Solomoni adakhala mfumu pa nthaŵi ya mtendere, ndipo Mulungu adapereka mtendere ponse pozungulira, kuti athe kumanga Nyumba yolemekezeramo Mulungu, malo opembedzeramo mpaka muyaya.

¹⁴Iwe Solomoni, unali wanzeru kwambiri pa nthaŵi ya unyamata wako, nzeru zako zinali zodzaza ngati mtsinje.

¹⁵Mbiri yako idadziŵika pa dziko lonse lapansi ndipo udalidzaza ndi miyambi ndi mikuluŵiko.

¹⁶Dzina lako lidamveka mpaka ku zilumba zakutali, ndipo anthu adakukonda chifukwa cha mtendere wa pa ufumu wako.

¹⁷Nyimbo zako, malangizo ako, mafanizo ako, ndiponso mau ako ofotokozera zobisika, zonsezi anthu zinkaŵachititsa chidwi.

¹⁸M'dzina la Ambuye Mulungu, Iye amene amatchedwa Mulungu wa Aisraele, udakundika golide ngati chitini, ndipo siliva udamsandutsa chinthu wamba ngati mtovu.

¹⁹Koma udadzipereka wathunthu kwa akazi, ndipo udasanduka kapolo wa zilakolako zako.

²⁰Udaononga mbiri yako, udaipitsa mtundu wako. Udadzetsa tsoka pa ana ako mwakuti adavutika chifukwa cha uchitsiru wako.

²¹Ufumu udagaŵikana, choncho ufumu wa Efuremu udapanduka.

²²Koma Ambuye sadaleke kukhala achifundo, sadaononge zimene Iwo adapanga. Sadaononge ana a wosankhidwa wao, sadaononge zidzukulu za munthu amene ankamukonda. Tsono adasunga otsala a Yakobe, nasiyira Davide chiphukira chofumira mwa iye. Rehobowamu ndi Yerobowamu

²³Solomoni adakapumula ndi makolo ake, nasiya mmodzi mwa ana ake kuti aloŵe m'malo mwake. Iyeyo anali Rehobowamu, munthu wopanda nzeru, chipukupuku cha munthu, amene anthu ake adampandukira chifukwa cha mkhalidwe wake. Panalinso Yerobowamu, mwana wa Nebati, amene adachimwitsa Aisraele, ndi kutsogoza Aefuremu pa njira yoipa.

²⁴Machimo ao adachuluka kopitirira, kotero kuti adaŵatulutsa m'dziko mwao.

²⁵Chifukwa ankachitadi zoipa zamitundumitundu, mpaka chilango chidaŵagwera.