Read Buku Loyera - Chichewa Mphu. 48 Bible Online

Mphu. 48 - Buku Loyera - Chichewa bible

Mphu. 48

¹Eliya Pambuyo pake padabwera Eliya, mneneri wonga moto, mau ake ankaŵala ngati nsakali.

²Adadzetsa njala pa anthu, motero anthu ambiri adafa chifukwa cha changu chake.

³Potsata mau a Ambuye adatseka thambo lakumwamba, ndipo adatsitsa moto katatu.

⁴Iwe Eliya, ntchito zako zinali zozizwitsa kwabasi. Ndani angathe kunyadira ntchito zotere?

⁵Udaukitsa munthu wakufa m'manda ndi mau a Mulungu Wopambanazonse.

⁶Udagwetsa mafumu m'chiwonongeko, ndipo anthu otchuka udaŵagwetsa pansi kuchokera pabedi pao.

⁷Udamva mau odzudzula ku phiri la Sinai, mau otsimikiza za chilango ku phiri la Horebu

⁸Tsono udadzoza mafumu kuti azilipsira, ndi aneneri kuti aloŵe m'malo mwako.

⁹Udatengedwa kupita kumwamba ndi kamvulumvulu wamoto m'galeta lokokedwa ndi akavalo amoto.

¹⁰Zidalembedwa kuti udzabwera pa nthaŵi yake, kudzaziziritsa mkwiyo wa Mulungu, ukali wake usanabuke, kudzayanjanitsa bambo ndi mwana ndi kukhazikitsanso mafuko a Yakobe.

¹¹Ngodala amene adzakuwona, ndiponso amene adafa ali ndi chikondi. Ndithudi ifenso tidzakhala ndi moyo. Elisa

¹²Pamene paja Eliya adatengedwa ndi kamvulumvulu, Elisa adadzazidwa ndi nzeru zake. Pa moyo wake wonse sadachite mantha ndi mfumu ina iliyonse, ndipo panalibe munthu womgonjetsa.

¹³Panalibe ntchito yomukanika. Ngakhale atafa, thupi lake lidatchula mau olosa.

¹⁴Ali moyo adachita zinthu zozizwitsa, ndipo atafa ntchito zake zidakhalanso zodabwitsa. Chilango cha anthu osakhulupirika

¹⁵Ngakhale zinthu zidatero, anthu sadatembenuke mtima kapena kuleka machimo ao. Mulungu adaŵachotsa m'dziko mwao naŵabalalitsa m'dziko lonse lapansi. Anthu oŵerengeka okha adatsalapo, ndipo ankalamulidwa ndi mfumu ya ku banja la Davide.

¹⁶Ena mwa iwowo adachita zokomera Ambuye, koma ena ankachimwirachimwirabe. Hezekiya

¹⁷Hezekiya adamangira mzinda wake linga nadzetsa madzi m'kati mwa mzindawo. Adaboola thanthwe ndi zitsulo, napanga maiŵe osungiramo madzi.

¹⁸Pa nthaŵi ya ufumu wa Hezekiya, Senakeribu adadzathira nkhondo, natuma Rabisake mtsogoleri wankhondo. Adathira nkhondo mzinda wa Ziyoni, nayamba kudzikuza zedi m'kunyada kwake.

¹⁹Tsono anthu adataya mtima, nkumanjenjemera, ndipo adayamba kuda nkhaŵa ngati mkazi amene akuchira.

²⁰Adapempha Ambuye achifundo, kuchita kukweza manja kwa Iwo. Kumwamba Woyera uja adamva pemphero lao msanga, ndipo adatuma Yesaya kuti aŵapulumutse.

²¹Mulungu adagwetsa zithando zankhondo za Aasiriya, ndipo mngelo wake adaŵaonongeratu. Yesaya

²²Zidatero pakuti Hezekiya adachita zokomera Ambuye, ndi kusunga makhalidwe a kholo lake Davide, monga adamulangizira Yesaya, mneneri wotchuka amene ankalosa zokhulupirika.

²³Pa nthaŵi ya Yesaya, dzuŵa lidabwerera m'mbuyo ndipo adaonjezera masiku a moyo wa mfumu.

²⁴Mwa mphamvu za mzimu adaona zakutsogolo ndipo adasangalatsa anthu odandaula ku Ziyoni.

²⁵Adaulula zinthu zakutsogolo mpaka kutha kwa nthaŵi, nafotokoza zinsinsi zina zobisika, zisanachitike konse.