Read Buku Loyera - Chichewa Mphu. 49 Bible Online

Mphu. 49 - Buku Loyera - Chichewa bible

Mphu. 49

¹Kukumbukira za Yosiya kuli ngati kumva zonunkhira zokoma, monga lubani wosakanizidwa bwino ndi mmisiri. Kuli ngati kutsekemera kwa uchi pa khosi, ndiponso ngati nyimbo yoimba pa phwando la vinyo.

²Adatsata njira yabwino ya kutembenuza mitima ya anthu, ndipo adachotsa zonyansa zonse za mafano.

³Adakhala wokhulupirika kwathunthu kwa Ambuye, ndipo adalimbitsa chipembedzo choona pa nthaŵi ya chisokonezo choipa. Yeremiya

⁴Mafumu onse anali ochimwa kupatula Davide, Hezekiya ndi Yosiya. Poti adasiya Malamulo a Wopambanazonse, mafumu a ku Yuda adatha.

⁵Adapereka ulamuliro wao kwa anthu ena, ndi ulemerero wao kwa anthu achilendo.

⁶Anthu ameneŵa adatentha mzinda wosankhidwa, malo opembedzerapo. Adasiya miseu yake popanda anthu, monga momwe Yeremiya adaanenera.

⁷Anthu adamzunza Yeremiya, mneneri amene Mulungu adampatula akali m'mimba mwa mai wake kuti azule ndi kugwetsa, aononge ndi kugumula, komanso kuti amange ndi kubzala. Ezekiele

⁸Ezekiele adaona ulemerero wa Mulungu m'masomphenya, umene Mulungu adamuwonetsa pamwamba pa galeta la Akerubi.

⁹Ambuye adakumbukira adani ake, naŵatumizira mvula yanamondwe, koma onse amene anali olungama, adaŵachitira zabwino.

¹⁰Kunena za aneneri khumi ndi aŵiri aja, mafupa ao akhalenso ndi moyo watsopano kuchokera ku manda ao, poti aneneriwo adaika mtima watsopano mwa Yakobe, ndipo adapulumutsa anthu chifukwa cha chikhulupiriro chao. Zerubabele ndi Yoswa

¹¹Kodi Zerubabele tizimtamanda bwanji? Anali ngati mphete yosindikizira ku dzanja lamanja la Ambuye.

¹²Chimodzimodzinso Yoswa, mwana wa Yehozadaki. Ameneŵa pa nthaŵi yao adamanga Nyumba ya Mulungu, adamanga Nyumba yoyera ya Ambuye, Nyumba yoyenera ulemerero wamuyaya. Nehemiya

¹³Mbiri ya Nehemiya njaikulu. Iye adautsanso zipupa zogamuka za Yerusalemu. Adamanga zipata ndi mipiringidzo yake ndi kumanganso nyumba zathu zoonongeka. Atsogoleri ena

¹⁴Palibe wina pa dziko lapansi amene adalengedwa wolingana ndi Enoki, chifukwa iye adatengedwa kuchoka pa dziko lapansi.

¹⁵Sadabadwepo munthu wina wolingana ndi Yosefe. Anali mtsogoleri wa abale ake ndiponso mchirikizi wa anthu ake. Mafupa ake omwe adaŵasamala mwaulemu.

¹⁶Semu ndi Seti adalemekezeka pakati pa anthu, koma Adamu adapambana zolengedwa zonse zamoyo pa dziko lapansi.