Read Buku Loyera - Chichewa Mphu. 5 Bible Online

Mphu. 5 - Buku Loyera - Chichewa bible

Mphu. 5

¹Mtima wako usakhulupirire chuma, nkumanena kuti, “Ndadala!”

²Usafeŵerere zilakolako zako ndi mphamvu zako, usamangotsatira zifuniro zoipa za mtima wako.

³Usanene kuti, “Ndani angandichite kanthu?” Ukatero, Mulungu adzakulanga.

⁴Usanene kuti, “Ndidachimwa, koma palibe chimene chidaoneka.” Zimenezi zingoonetsa kuti Ambuye ngopirira nthaŵi yaitali.

⁵Usakhulupirire udyo kuti Mulungu adzakukhululukira, mpaka kumachulukitsa dala machimo ako.

⁶Usanene kuti, “Chifundo chake nchachikulu, adzandikhululukira machimo anga, ngakhale achuluke chotani.” Iyeyo ngwachifundodi, komanso amakwiya, sangalephere kulanga ochimwa.

⁷Usazengereze kubwerera kwa Ambuye, usamati, “Ndibwerera maŵa.” Ukatero, mkwiyo wa Ambuye udzakugwera mwadzidzidzi, ndipo adzakukantha pa nthaŵi ya chilango.

⁸Usagonere pa chuma chopata monyenga, poti pa nthaŵi ya tsoka sichidzakuthandiza. Za kukhala wolungama ndi wodzisunga

⁹Usamapete zinthu ndi mphepo iliyonse, kapena kumangoyenda m'njira iliyonse, monga m'mene amachitira munthu wochimwa wokamba paŵiripaŵiri.

¹⁰Uzilimbikira pa zimene udziŵa, ndipo usamasinthesinthe mau ako.

¹¹Uzifulumira kumvetsera, koma usamayankha msanga.

¹²Munthu uzimuyankha pamene ukudziŵa chonena, koma ngati sudziŵa, dzanja lako ligwire pakamwa.

¹³Kulankhula kumatha kubweretsa ulemerero kapena manyazi. Munthu angathe kugwa ndi mau ake omwe.

¹⁴Usatchuke ndi ukazitape, usatchere anzako misampha ndi mau ako. Paja mbala manyazi amaigwera, ndiponso munthu wokamba paŵiripaŵiri mlandu umamgwera.

¹⁵Usamachite molakwa pa zinthu zazikulu ndi zazing'ono zomwe. Usasanduke mdani m'malo mokhala bwenzi.