Read Buku Loyera - Chichewa Mphu. 50 Bible Online

Mphu. 50 - Buku Loyera - Chichewa bible

Mphu. 50

¹Simoni mkulu wa ansembe Ndi Simoni, mwana wa Oniyasi, mkulu wa ansembe, amene adakonza Nyumba ya Mulungu pamene anali moyo, naizinganso ndi malinga.

²Adakhazikitsa maziko a zipupa zazitali ziŵiri, zolimbitsa khoma la Nyumba ya Mulungu ponse pozungulira.

³Pa nthaŵi yake anthu adakumba dziŵe la madzi, dziŵe lake ngati nyanja kukula.

⁴Mtima wake unali pa kuteteza anthu ake kuti asaonongeke, motero adalimbitsa mzinda kuti usagonje akauthira nkhondo.

⁵Ankaoneka waulemu kwambiri anthu akamzungulira iye akamatuluka kuseri kwa chinsalu chochinga.

⁶Anali ngati nthanda yoŵala m'mitambo kapena ngati mwezi pamene uli wathunthu.

⁷Anali ngati dzuŵa loŵala pa Nyumba ya Mulungu Wopambanazonse, kapena ngati kuŵala kwa utawaleza pa mitambo yonyezimira.

⁸Anali ngati maluŵa a pa nthaŵi ya phukira, kapena ngati akakombo pafupi ndi kasupe wa madzi, kapenanso ngati nthambi ya mtengo wa lubani yonunkhira bwino pa dzinja.

⁹Anali ngati lubani wofuka m'chombo, kapena ngati chikho chopangidwa ndi golide wosalala, chimene adachikometsa ndi miyala yamtengowapatali.

¹⁰Anali ngati mtengo wa olivi wodzaza ndi zipatso kapena ngati mkungudza wofika ku mitambo.

¹¹Ankati akavala mkanjo wake wapamwambo, nkukolekapo zokongoletsera zamakaka, nkudzakwera ku guwa lansembe, bwalo la Nyumba yopembedzeramo linkalemerera.

¹²Pamene ansembe ankampatsa zigawo za nsembe, iye ataima pafupi ndi guwa, abale ake ali kwete m'mbalimu, anali ngati kamtengo ka mkungudza ka ku Lebanoni, kokhala pakati pa kanjedza.

¹³Ana onse a Aroni, atavala zokongola, ankaima pamaso pa gulu lonse la Aisraele, ali ndi nsembe zopereka kwa Ambuye m'manja mwao.

¹⁴Atatha kuchita mwambo wapaguwa ndi kupereka nsembe kwa Mulungu Wamphamvuzonse, Wopambanazonse,

¹⁵ankatambalitsa dzanja nkugwira chikho, nkuthira vinyo wa fungo lokoma patsinde pa guwa ngati nsembe yopereka kwa Mulungu Wopambanazonse, mfumu ya anthu onse.

¹⁶Tsono ana a Aroni ankafuula namaliza malipenga ao asiliva. Ndipo ankachita phokoso lalikulu ngati chikumbutso pamaso pa Ambuye.

¹⁷Pa nthaŵi yomweyo anthu onse pamodzi ankadzigwetsa pansi moŵeramitsa mutu, namapembedza Mulungu wao, Wamphamvuzonse, Wopambanazonse.

¹⁸Ndipo gulu lanyimbo linkamutamanda ndi mau ao, poimba nyimbo za maimbidwe okongola.

¹⁹Anthu ankapemba Ambuye Wopambanazonse ndi kupemphera pamaso pa Mulungu Wachifundo mpaka mwambo wa Ambuye utatha, ndi kutsiriza dongosolo lake.

²⁰Tsono wansembe wamkulu ankatsika kuchokera ku guwa nkukweza manja ake pa gulu lonse la Aisraele, kuti aŵadalitse m'dzina la Ambuye.

²¹Ndiye anthu ankaŵerama pansi kachiŵiri kuti alandire madalitso a Mulungu Wopambanazonse. Pemphero lotamanda

²²Tsopano tamandani Mulungu amene adalenga zonse, amene amachita ntchito zodabwitsa kulikonse. Ndiye amene amatilera kuyambira m'mimba mwa amai, ndipo amatichitira chifundo.

²³Atipatse chimwemwe chamumtima ndipo masiku athu ano akhale amtendere m'dziko la Israele mpaka muyaya.

²⁴Ambuye azipitiriza kutichitira chifundo ndipo atipulumutse pa nthaŵi yomwe ino. Mitundu yoipa ya anthu

²⁵Pali mitundu iŵiri ya anthu imene ndimaipidwa nayo, ndipo wachitatu si mtundu wa anthu konse.

²⁶Amenewo ndi anthu okhala ku phiri la Seiri, Afilisti ndi anthu opusa a ku Sekemu. Nzeru za Yesu mwana wa Sira

²⁷Ine Yesu, mwana wa Sira, mwana wa Eleazara wa ku Yerusalemu, ndalemba m'buku muno malangizo a luntha ndi a nzeru ochokera mumtima mwanga.

²⁸Ngwodala munthu amene amatanganidwa ndi kuphunzira malangizo ameneŵa. Amene amaŵasunga mu mtima, adzakhala wanzeru.

²⁹Amene amasunga malangizo ameneŵa, adzapambana pa zonse, poti akuyenda m'kuŵala kwa Ambuye.