Read Buku Loyera - Chichewa Mphu. 51 Bible Online

Mphu. 51 - Buku Loyera - Chichewa bible

Mphu. 51

¹ZOONJEZERA Nyimbo yothokoza Ndikukuthokozani, Inu Ambuye anga ndi mfumu yanga. Ndikukutamandani Mulungu Mpulumutsi wanga.

²Ndikukuthokozani, chifukwa mudanditchinjiriza ndi kundichirikiza. Mudandipulumutsa ku imfa, ku msampha wa munthu wosinjirira, ndi ku milomo yonama bodza.

³Pamaso pa adani anga, mudandithandiza ndi kundipulumutsa potsata ukulu wa chifundo chanu ndi ulemerero wa dzina lanu. Mudandipulumutsa kwa anthu ondikukutira mano ofuna kuti andidye, kwa amene ankafuna kundipha, ndi ku mavuto ambiri amene ndidapirira.

⁴Mudandipulumutsa ku moto umene udanditentha mbali zonse, ndi pakati pa moto umene sindinayatse ndine.

⁵Mudandipulumutsa ku manda akuya ndi ku lilime loipa ndi lamabodza, lilime londisinjirira kwa mfumu.

⁶Ndinali pafupi kufa, moyo wanga unkakhudza manda.

⁷Adani adandizungulira ponseponse, koma panalibe wondithandiza. Ndidafunafuna chithandizo koma osachiwona.

⁸Tsono ndidakumbukira chifundo chanu, Inu Ambuye, ntchito zanu za masiku amakedzana. Mumaombola anthu okhulupirira Inu, ndipo mumaŵapulumutsa kwa adani ao.

⁹Tsono ndidapemphera m'dziko lino lapansi, kupempha kuti mundipulumutse ku imfa.

¹⁰Ndidapemphera kwa Ambuye, Tate wa mbuye wanga, kuti, “Musandisiye pa mavuto anga, pamene ndikusoŵa chithandizo pakati pa anthu onyada.

¹¹Ndidzatamanda dzina lanu kosalekeza, ndi kukuimbirani nyimbo zothokoza.” Ndipo Inu mudamva pemphero langa.

¹²Paja mudandipulumutsa ku imfa, ndi kundithandiza nditataya mtima. Nchifukwa chake ndikukuthokozani ndi kukuyamikani, ndiponso ndikutamanda dzina lanu, Inu Ambuye.

¹³Ndikali mnyamata, ndisanayambe kuyendayenda, ndidapemphera poyera kuti ndipeze nzeru.

¹⁴Kunja kwa Nyumba yopembedzera ndidapempha nzeru, ndipo ndidzazifunafuna pa moyo wanga wonse.

¹⁵Kuyambira ubwana wanga mpaka ukalamba wanga mtima wanga wakhala ukukondwerera nzeruzo. Ndakhala ndikuzitsata kuyambira ubwana wanga, chifukwa ndidaayamba kale kuzikonda.

¹⁶Ntangotchera khutu pang'ono ndidazilandira, ndipo ndidaphunzira zambiri.

¹⁷Chifukwa cha nzeruzo, zanga zonse zidapita patsogolo. Motero ndidzatamanda amene adandipatsa nzeru.

¹⁸Ndidatsimikiza kuzigwiritsa ntchito zimene ndidaphunzira. Ndidachita khama kufuna zabwino, ndipo sindidzachita manyazi konse.

¹⁹Ndidafunitsitsa kupeza nzeru ndi mtima wanga wonse, ndipo ndidachita khama kutsata Malamulo. Tsono ndidakweza manja anga kumwamba ndilikudandaula chifukwa cha umbuli wanga.

²⁰Ndidaika mtima pa kufunafuna nzeru, ndipo nditalewa machimo, ndidazipeza. Zidandithandiza kumvetsa zinthu kuyambira pamene ndidazipeza, nchifukwa chake sindidzatayika.

²¹Mtima wanga udaafunitsitsa kuzipeza, ndipo ndidalandiradi mphatso yaikuluyo.

²²Ambuye adandipatsa mphatso ya kulankhula bwino, ndipo ndidzamlemekeza nayo.

²³Bwerani kwa ine inu amene simudaphunzire, mudzaphunzire m'sukulu yanga.

²⁴Chifukwa chiyani mukudandaula kuti zinthuzi zikusoŵani, pamene moyo wanu ukuzifuna chotere?

²⁵Paja ndidalengeza kuti, “Muzilandire popanda kupereka ndalama.

²⁶Longani makosi anu m'goli la nzeru, ndipo mtima wanu ulandire maphunziro ake, amapezeka pafupipafupi.”

²⁷Onani ine, ndidadza thukuta pang'ono chabe, koma ndidapeza mtendere waukulu.

²⁸Gulani maphunziro ndi siliva wambiri, mukatero mudzapeza golide wambiri.

²⁹Mukondwere ndi chifundo cha Ambuye, musachite nako manyazi kuŵatamanda.

³⁰Gwirani ntchito yanu pa nthaŵi yoyenera, ndipo Mulungu adzakupatsani mphotho yanu pa nthaŵi yake.