Read Buku Loyera - Chichewa Mphu. 6 Bible Online

Mphu. 6 - Buku Loyera - Chichewa bible

Mphu. 6

¹Pajatu mbiri yoipa imabweretsa manyazi ndi chidzudzulo. Zimenezi ndizo zimene zimagwera anthu ochimwa okamba paŵiripaŵiri.

²Usadzitame chifukwa cha maganizo ako, kuwopa kuti mtima wako ungaphulike ngati wa nkhunzi.

³Udzayoyola masamba ako ndi zipatso zako, ndiye udzakhala wekha ngati mtengo wouma.

⁴Mtima woipa umaononga mwiniwake yemweyo, ndipo adani ake amamseka. Za chibwenzi

⁵Mau abwino amachulukitsa abwenzi, munthu wolankhula mofatsa, anthu ambiri amamuyankha mwaulemu.

⁶Amene umayanjana nawo azikhala ambiri, koma wokulangiza akhale mmodzi yekha mwa anthu 1,000.

⁷Ukapala bwenzi, uyambe wamuwona m'mene aliri; usayambe nkumukhulupirira msanga.

⁸Pali ena okhala abwenzi ako pamene zikuŵakomera, m'menemo pa nthaŵi ya mavuto amakuthaŵa.

⁹Abwenzi ena amasanduka adani, mpaka kukuchititsa manyazi poulula mikangano imene udachita nawo.

¹⁰Pali abwenzi ena ongokonda kudzadya nawe, koma pa nthaŵi ya mavuto safuna kukuyandikira.

¹¹Ukakhala wolemera amakhala anzako, kumakuthandiza kulamula antchito ako.

¹²Koma ukasauka amakufulatira, amakuzemba, iwe osaŵaonanso.

¹³Uzikhala kutali ndi adani ako, ndipo uzikhala mochenjera ndi abwenzi ako.

¹⁴Abwenzi okhulupirika ndi ngaka yolimba, aliyense wopeza abwenzi otere wapeza chuma.

¹⁵Abwenzi okhulupirika ngamtengowapatali, kukoma kwao sikungagulike ndi ndalama.

¹⁶Abwenzi okhulupirika ali ngati mankhwala opatsa moyo. Oopa Ambuye ndiwo amene amapeza abwenzi otere.

¹⁷Munthu woopa Ambuye amakhala ndi abwenzi abwino, monga m'mene aliri iyeyo, abwenzi akenso ali momwemo. Za kuphunzira luntha

¹⁸Mwana wanga, ufunefune malangizo ukadali mwana, ndipo mpaka kukalamba, uzidzapeza ndithu luntha.

¹⁹Uchite khama kuphunzira luntha, monga munthu amene akulima ndi kufesa mbeu, motero udzayembekeza phindu lalikulu. Pofunafuna lunthalo udzapeza mavuto pa kanthaŵi, koma posachedwa udzadya zipatso zake.

²⁰Luntha limakhala ngati lovuta kwambiri kwa munthu wopanda mwambo, wopusa sakhalitsa nalo.

²¹Lidzamlemera zedi ngati chimwala choyesera mphamvu, ndipo sadzakhalira kulitaya.

²²Mpake kuti amati luntha, chifukwa si anthu ambiri amalipeza.

²³Mvetsa mwana wanga, ndipo uvomere malangizo anga, usakane uphungu wanga.

²⁴Ika miyendo yako m'matangadza a luntha, ndipo usunge khosi lako m'goli lake.

²⁵Ŵerama kuti ulisenze paphewa pako, ndipo usatope nazo nsinga zake.

²⁶Ulisunge ndi mtima wako wonse, ndipo utsate njira zake ndi mphamvu zako zonse.

²⁷Ulilondole ndi kulifunafuna, ndipo lidzadziwonetsa kwa iwe; tsono ukaligwira, usalitaye.

²⁸Potsiriza pake lidzakupatsa mpumulo, ndipo lidzasanduka chimwemwe kwa iwe.

²⁹Matangadza ake adzakutchinjiriza kwambiri, ndipo goli lake lidzakhala ngati chovala chaulemu.

³⁰Goli lake lidzakhala ngati chokongoletsera chagolide, ndipo nsinga zake zidzakhala ngati chigwe chobiriŵira.

³¹Udzalivala ngati chovala chaulemu, ndipo pamutu pako lidzakhala ngati nsangamutu yachimwemwe.

³²Mwana wanga, ngati ufuna, udzaphunziradi. Ngati uikapo mtima, udzakhala waluntha.

³³Ngati ukonda kumvetsera udzaphunzira, ngati utchera khutu, udzakhala waluntha.

³⁴Ukakhale pakati pa anthu aakuluakulu, ukakaona wina waluntha, ukaphatikane ndi ameneyo.

³⁵Umvetsere mokondwa mau onse okamba za Mulungu, malangizo aluntha asamakupite.

³⁶Ukapeza munthu waluntha uzifulumira kukakamba naye, phazi lako lifumbule pakhomo pake.

³⁷Uzisinkhasinkha mau a Ambuye, uzilingalira malamulo ake nthaŵi zonse. Ndiwo amene adzakuunikira nzeru zako, ndipo luntha limene umalifuna udzalipeza.