Read Buku Loyera - Chichewa Mphu. 7 Bible Online

Mphu. 7 - Buku Loyera - Chichewa bible

Mphu. 7

¹Malangizo ena ndi ena Usachite choipa, ndipo choipa sichidzakugwera.

²Pewa choipa, ndipo choipa chidzakulambalala.

³Mwana wanga, usabzale mbeu za kusalungama, kuti ungadzakolole zipatso zoipa kasanunkaŵiri.

⁴Usapemphe Ambuye kuti akupatse udindo waukulu, kapena mfumu kuti ikupatse malo aulemu.

⁵Usadziwonetse kuti ndiwe wolungama pamaso pa Ambuye, kapena kuti ndiwe wanzeru pamaso pa mfumu.

⁶Usafune kukhala woweruza, kuwopa kuti nkudzalephera kuthetsa zosalungama, kuwopanso kuti mwina nkudzakondera akuluakulu ena, nulephera kukhala wachilungamo potero.

⁷Usachimwire gulu lonse la anthu amumzinda ndi kutaya choncho ulemu wako pamaso pa onse.

⁸Usachite kubwereza kaŵiri kuchimwa. Pajatu ngakhale utachimwa kamodzi kokha sungalephere kulangidwa.

⁹Usanene kuti, “Mulungu adzaŵerengera mphatso zanga zochulukazi; ndikadzapereka chinthu kwa Mulungu Wopambanazonse, ndithu adzachilandira.”

¹⁰Usatope ndi kupemphera, usaleke kuthandiza osauka.

¹¹Usaseke munthu amene ali ndi chisoni mu mtima, chifukwa wotsitsa anthu Uja amathanso kuŵakweza.

¹²Usaganizire zonamizira mbale wako, kapena kunamizira bwenzi lako.

¹³Usanene zabodza nthaŵi ina iliyonse, chifukwa bodza silipindulitsa.

¹⁴Usalankhule zambiri pakati pa akulu, usabwerezebwereze mau m'mapemphero ako.

¹⁵Usadane ndi ntchito yamanja kapena yolima, chifukwa adaifuna ndi Mulungu Wopambanazonse.

¹⁶Usakhale nawo m'magulu a anthu ochimwa, kumbukira kuti chilango chidzafika msanga.

¹⁷Udzichepetse mtima kwambiri, chifukwa anthu osalabadira za Mulungu amalangidwa ndi moto ndi mphutsi. Za abwenzi ndi achibale

¹⁸Usalekane ndi bwenzi lako chifukwa chofuna ndalama, usalekane ndi mbale wako weniweni chifukwa chofuna golide wa ku Ofiri.

¹⁹Usalekane naye mkazi wanzeru ndi wabwino, chifukwa chikoka chake nchopambana golide.

²⁰Usazunze kapolo amene akugwira ntchito mokhulupirika, kapena wantchito amene akuikapo mtima pa ntchito.

²¹Kapolo wabwino umkonde ndi mtima wako wonse, kapolo wotere usamletse kupeza ufulu wake.

²²Kodi uli ndi zoŵeta? Uzisamale bwino. Ngati zimakupindulitsa, uzisunge.

²³Ngati uli ndi ana aamuna, uŵaphunzitse kusunga mwambo akadali aang'ono.

²⁴Ngati uli ndi ana aakazi, uwone kuti adzisunge, usamaŵasasatitsa.

²⁵Ukwatitse mwana wako wamkazi. Ukatero wamaliza ntchito yaikuludi. Koma tsono umkwatitse ndi mwamuna wanzeru.

²⁶Ngati uli ndi mkazi amene umamkonda, usamsudzule. Koma ngati sumukonda, usamkhulupirire.

²⁷Uzilemekeza bambo wako ndi mtima wako wonse, ndipo usaiŵale mavuto a mai wako pokubala.

²⁸Kumbukira kuti ndiwo amene adakubereka. Kodi ungaŵabwezere chiyani pa zimene adakuchitira? Za ansembe

²⁹Uziwopa Ambuye ndi mtima wako wonse, ndipo uzilemekeza ansembe ake.

³⁰Uzikonda Mlengi wako ndi mphamvu zako zonse, ndipo usatayane nawo atumiki ake.

³¹Uziwopa Ambuye, ndipo uzilemekeza wansembe ndi kumpatsa zimene zimuyenera monga adakulamulira, monga zipatso zoyamba kucha, nsembe zopepesera kupalamula, mwendo wamwamba wa nyama, nsembe yoyeretsera, ndi zipatso zoyamba za zinthu zoyera. Za anthu osauka

³²Uzithandizanso mwaufulu anthu osauka, kuti udale kwenikweni.

³³Umchitire zaufulu aliyense wamoyo, ndi anthu akufa omwe usaŵamane zachifundo.

³⁴Olira usaŵafulatire, koma umve nawo chisoni amene ali pa chisoni,

³⁵Usagwere ulesi kuyendera odwala, poti adzakukonda chifukwa cha chifundo chakocho.

³⁶Pa zonse zimene ukuchita ukumbukire mathero ako; ukatero sudzachimwa pa moyo wako wonse.