Read Buku Loyera - Chichewa Mphu. 8 Bible Online

Mphu. 8 - Buku Loyera - Chichewa bible

Mphu. 8

¹Za kukhala ndi nzeru zabwino Usalimbane naye munthu wamphamvu, kuwopa kuti ungagwe m'manja mwake.

²Usakangane naye munthu wolemera, mwina ngwolemera koposa iwe. Paja ndalama zidaononga anthu ambiri, zidasokeretsa ngakhale mitima ya mafumu.

³Usatsutsane ndi munthu wolongolola, ukatero wamsonkhezera.

⁴Usamaseka naye munthu wopanda mkhalidwe, kuti angakunyozere makolo ako.

⁵Usadzudzule munthu wolapa tchimo lake, kumbukira kuti tonsefe timalakwa.

⁶Usanyoze munthu akakalamba, paja enafensotu tikunka tikukalamba.

⁷Usasekerere imfa ya mnzako, kumbukira kuti tonsefe tidzafa. Za kukumbukira zakale

⁸Usanyoze malangizo a anthu anzeru, koma uzigwiritsa ntchito kwambiri miyambi yao. Ukamaŵamvera udzaphunzira nzeru, ndipo udzadziŵa njira yotumikira akuluakulu.

⁹Usanyoze nkhani za nkhalamba, poti nawonso adachita kuphunzira kwa makolo ao. Angathe kukuphunzitsa kumvetsa zinthu ndi kudziŵa choyankha pa nthaŵi yake. Za kuchenjera

¹⁰Munthu wochimwa usachite kumsonkhezera, kuwopa kuti ungaonongekerepo iwenso.

¹¹Usaputane naye munthu wachipongwe kuti angakutchere msampha pokutapa m'kamwa.

¹²Usakongoze ndalama munthu wamkulu kuposa iwe. Ukatero, zapita zimenezo.

¹³Usaperekere wina chikole mopitirira zomwe uli nazo. Ngati wapereka kale, ukhale wokonzeka kuti ulipire.

¹⁴Usamzenge mlandu munthu woweruza, chifukwa pogamula mlandu zidzakomera iyeyo.

¹⁵Usayende ndi munthu wosimbwa kuti ungadzavutike naye. Adzangochita zomwe zamudzera m'mutu, ndiye uchitsiru wake udzaononga aŵiri nonsenu.

¹⁶Usakangane ndi munthu wopsa mtima msanga, usayende naye kopanda anthu. Iye kupha munthu sayesa kanthu. Choncho adzakupha pamene palibe wokuthandiza.

¹⁷Chitsiru usachikambire zakukhosi, poti sichingathe kusunga chinsinsi.

¹⁸Usachite zinthu zachinsinsi pamaso pa mlendo, poti sukudziŵa kuti adzachita nazo chiyani.

¹⁹Usamauza munthu aliyense maganizo ako, ukatero udzataya mwai.