Read Buku Loyera - Chichewa Mphu. 9 Bible Online

Mphu. 9 - Buku Loyera - Chichewa bible

Mphu. 9

¹Za akazi Usamchitire nsanje mkazi wako womukonda, kuwopa kuti ungamuphunzitse nzeru zoipa zodzakupweteka.

²Usadzipereke kwa mkazi kuwopa kuti angakhale ndi ulamuliro pa iwe.

³Usamayendera mkazi wachiwerewere, ukatero adzakukola m'khwekhwe mwake.

⁴Usachite chizoloŵezi ndi woimba wachikazi, kuwopa kuti ungagwidwe m'misampha yake.

⁵Usayang'anitsitse namwali, kuwopa kuti ungagwe naye nkulangidwirapo.

⁶Usadzipereke kwa akazi adama; ukatero udzaononga chuma chako chonse.

⁷Usamachita cheucheu m'miseu yamumzinda, ndipo usamayendayenda m'malo mosapitapita anthu.

⁸Usayang'anitsitse chiphadzuŵa, ndipo maso ako asakhale pa mkazi wosakhala wako. Anthu ambiri adasokera nako kukongola kwa mkazi. Kukongolako kumautsa chilakolako chonga ngati moto.

⁹Usadyere pamodzi ndi mkazi wamwini kapena kumwa naye vinyo, kuwopa kuti ungatengeke ndi kukongola kwake, pambuyo pake nkusokonezeka nugwa m'chiwonongeko. Za kuzoloŵerana ndi amuna

¹⁰Usalekane ndi bwenzi wakale, poti watsopano sangalingane naye. Bwenzi watsopano ali ngati vinyo watsopano, akakhalitsa, ndi pamene umamumva bwino.

¹¹Usakhumbire kukhoza kwa munthu woipa, poti sudziŵa zimene zidzamugwera patsogolo.

¹²Usasangalale ndi zimene anthu onyoza Mulungu amakondwera nazo. Kumbukira kuti asanafe adzalangidwa ndithu.

¹³Usayandikire munthu amene ali ndi mphamvu zokupha, ndipo sudzachita mantha ndi imfa. Ukamuyandikira, uchenjere zedi, kuti angakuphe. Udziŵe kuti ukuyenda pakati pa misampha, kapena pamwamba pa malinga ankhondo.

¹⁴Uyesetse ndi mphamvu zonse kudziŵana ndi anzako, ndipo uzipempha malangizo kwa anthu anzeru.

¹⁵Uzikambirana ndi anthu anzeru, zokamba zako zonse zizikhudza Malamulo a Mulungu Wopambanazonse.

¹⁶Uzidya ndi anthu abwino, ndipo uzinyadira kuwopa Ambuye.

¹⁷Munthu waluso amadziŵika ndi ntchito zake, mtsogoleri amadziŵika ndi mau ake anzeru.

¹⁸Kazitape ndi munthu woopsa pa mudzi, munthu wapakamwa anthu amadana naye.