Read Buku Loyera - Chichewa Yes. 10 Bible Online

Yes. 10 - Buku Loyera - Chichewa bible

Yes. 10

¹Tsoka kwa amene amapanga malamulo opanda chilungamo, ndi kwa alembi amene amalemba zongovutitsa anzao.

²Pakutero amapotoza malamulo poweruza amphaŵi mosalungama. Amaŵalanda zoŵayenerera anthu anga osauka, amafunkha za akazi amasiye ndi kubera ana amasiye!

³Kodi mudzatani pa tsiku lachilango pofika namondwe wochokera kutali? Kodi mudzathaŵira kwa yani kuti akuthandizeni? Nanga chuma chanu mudzachisiya kuti?

⁴Kudzatsala nkungozyolika mwamanyazi pakati pa anthu ogwidwa kapena kufa pamodzi ndi ophedwa. Komabe mkwiyo wa Mulungu sudaŵachoke chifukwa cha zonsezi, ndipo mkono wake uli chisamulirecho kufuna kuŵalanga.

⁵ Chauta akuti, “Tsoka kwa mfumu ya ku Asiriya, mkwapulo wa ukali wanga, ndodo ya mkwiyo wanga.

⁶Ndikumtuma kwa mtundu wosasamala za Mulungu, ndipo ndikumlamula kuti apite kwa anthu amene ndaŵakwiyira, kuti akafunkhe ndi kukalanda chuma chao chonse, ndi kuŵaponderezera pansi ngati matope am'miseu.”

⁷Koma mfumu ya ku Asiriya sikudziŵa zimenezi ndipo mtima wake sukuganiza choncho. Mtima wake uli pa kuwononga ndi kupulula mitundu yochuluka ya anthu.

⁸Iye akuti: “Kodi atsogoleri anga onse ankhondo si mafumu okhaokha?

⁹Ine ndagonjetsa mizinda iyi: Kalino, Karikemisi, Hamati, Aripadi. Ndagonjetsanso Samariya ndi Damasiko.

¹⁰Ine ndidakantha mafumu a anthu opembedza mafano, amene mafano ao ndi aakulu kupambana a ku Yerusalemu ndi a ku Samariya.

¹¹Ndiye ndingalephere kuwononga Yerusalemu pamodzi ndi mafano ake omwe, monga momwe ndidachitira Samariya ndi mafano ake?”

¹²Ambuye atamaliza ntchito yao yolanga onse pa phiri la Ziyoni ndiponso ku Yerusalemu, adzalanganso mfumu ya ku Asiriya, chifukwa cha kudzitama kwake ndi kunyada kwake.

¹³Pakuti mfumuyo ikuti, “Ndachita zimenezi ndi mphamvu zanga ndiponso ndi nzeru zanga, pakuti kumvetsa nkwanga. Ndachotsa malire a mitundu ya anthu, ndipo ndafunkha chuma chao. Ndaŵatsitsa amene anali pa mipando yaufumu.

¹⁴Dzanja langa lagwira chuma cha mitundu ya anthu, monga momwe munthu amagwirira chisa cha mbalame. Monga momwe anthu amatolera mazira osiyidwa, ndimo m'mene Ine ndidasonkhanitsira dziko lonse lapansi. Ndipo panalibe mbalame ndi imodzi yomwe yoti mapiko phephere-phephere, kapena yoti kukamwa yasa kapena yolira kuti psepsepse.”

¹⁵Koma Chauta akuti: “Kodi nkhwangwa ingathe kudzikuza kupambana munthu woigwiritsa ntchito? Kodi sowo ingathe kudzikuza kupambana munthu woigwiritsa ntchito? Ndiye kukhala ngati kuti mkwapulo ukuzunguza munthu, kapena ndodo yanyamula munthu!”

¹⁶Nchifukwa chake Ambuye, Chauta Wamphamvuzonse, adzatumiza matenda oondetsa kwa ankhondo amphamvu a mfumu ya ku Asiriya. Ndipo mfumuyo kunyada kwake kudzapsa ndi moto wosazimika.

¹⁷Mulungu, Kuŵala kwa Israele, adzakhala ngati moto. Mulungu, Woyera Uja wa Israele, adzakhala ngati malaŵi a moto. Motowo udzaŵatentha ndi kuŵapsereza ngati minga ndi mkandankhuku pa tsiku limodzi.

¹⁸Adzaononga nkhalango yaikulu ndi nthaka yachonde. Zidzaonongeka m'kati ndi kunja kwake, ndipo zidzakhala ngati munthu wodwala amene akuwonda.

¹⁹Mitengo yotsalira yam'nkhalangomo idzakhala yochepa kwambiri, yoti ndi mwana yemwe nkuiŵerenga.

²⁰Tsiku limenelo otsalira a ku Israele, opulumuka a m'banja la Yakobe, sadzadaliranso anthu amene adaŵakantha, koma ndithu adzadalira Chauta, Woyera Uja wa Israele.

²¹Otsalira adzabwerera, otsalira a m'banja la Yakobe, adzabwereradi kwa Mulungu wamphamvu.

²² Iwe Israele, ngakhale anthu ako achuluke ngati mchenga wakunyanja, otsalira oŵerengeka okha ndiwo adzabwerere. Chiwonongeko chalamulidwa, chidzaonetsa chilungamo chosefukira.

²³Ambuye, Chauta Wamphamvuzonse, adzaononga ndithu dziko lonse monga momwe adalamulira.

²⁴Nchifukwa chake Ambuye, Chauta Wamphamvuzonse, akunena kuti, “Inu anthu anga okhala ku Ziyoni, musaŵaope Aasiriya pamene akukanthani ndi ndodo, nakumenyani ndi zibonga zao, monga m'mene Aejipito ankachitira.

²⁵Patsala pang'onong'ono kuti uthe mkwiyo wanga pa inu, koma ndidzaŵakwiyira iwonso mpaka kuŵaononga.

²⁶Ine, Chauta Wamphamvuzonse, ndidzaŵakwapula monga momwe ndidakwapulira Amidiyani ku thanthwe la Orebu. Ndi ndodo yanga ndidzaŵalanga, monga momwe ndidalangira Aejipito panyanja paja.

²⁷Tsiku limenelo ndidzakusanjulani katundu wa Aasiriya pa mapewa anu, ndi goli lao m'khosi mwanu, golilo lidzathyoka chifukwa cha kunenepa.”

²⁸Adani aja akudza afika ku Aiyati. Apyola ku Migironi, aikiza katundu wao ku Mikimasi.

²⁹Adzera pa mpata uja, nagona ku Geba usiku. Anthu a ku Rama akunjenjemera, a ku Gibea, mzinda wa Saulo, athaŵa.

³⁰Lirani mokweza, inu anthu a ku Galimu! Tcherani khutu, inu anthu a ku Laisa! Yankhani, inu a ku Anatoti.

³¹Anthu a ku Madimena akuthaŵa, a ku Gebimu akubisala.

³²Lero lomwe lino adaniwo adzaima ku Nobu, adzagwedeza mikono yao kuwopseza anthu a ku phiri la Ziyoni, phiri la Yerusalemu.

³³Koma Ambuye, Chauta Wamphamvuzonse, adzaŵadula ngati nthambi za mtengo. Akuluakulu adzagwetsedwa, odzikweza adzatsitsidwa.

³⁴Chauta adzaŵadula monga momwe anthu amadulira ndi nkhwangwa mitengo ya m'kati mwa nkhalango. Iwo adzagwa monga momwe imagwera ngakhale mitengo yaikulu ya ku Lebanoni.