Read Buku Loyera - Chichewa Yes. 11 Bible Online

Yes. 11 - Buku Loyera - Chichewa bible

Yes. 11

¹ Nthambi idzaphuka patsinde pa Yese, ndipo mphukira idzatuluka ku mizu yake.

²Mzimu wa Chauta udzakhala pa Iye, mzimu wopatsa nzeru ndi kumvetsa, mzimu wopatsa uphungu ndi mphamvu, mzimu wopatsa kudziŵa zinthu ndi kuwopa Chauta.

³Ndipo kuwopa Chauta ndiye chidzakhale chinthu chomkondweretsa. Sadzaweruza potsata zooneka pamaso, kapena kugamula mlandu potsata zakumva.

⁴ Koma amphaŵi adzaŵaweruza mwachilungamo, ndipo anthu otsika a pa dziko lapansi adzaŵagamulira mlandu wao mosakondera. Mau ochokera m'kamwa mwake adzakhala ngati ndodo yokanthira ochimwa, atalamula iyeyo anthu oipa adzaphedwa.

⁵ Chilungamo chidzakhala ngati lamba wake, ndipo kukhulupirika, ngati chomangira m'chiwuno mwake.

⁶ Mmbulu udzakhala pamodzi ndi mwanawankhosa, kambuku adzagona pansi pamodzi ndi mwanawambuzi, mwanawang'ombe ndi mwanawamkango adzadyera limodzi, mwana wamng'ono nkumaziŵeta zonsezo.

⁷Ng'ombe yaikazi ndi chimbalangondo zidzadya pamodzi, ndipo ana ao adzagona pamodzi. Mkango udzadya udzu ngati ng'ombe.

⁸Mwana woyamwa adzaseŵera pa dzenje la mamba, ndipo mwana woleka kuyamwa adzapisa dzanja lake ku funkha la mphiri, osalumidwa.

⁹ Sipadzakhala chilichonse chopweteka kapena choononga pa phiri lopatulika la Mulungu. Ndipo anthu a pa dziko lonse lapansi adzakhala odzaza ndi nzeru ya kudziŵa Chauta, monga nyanja imadzazira ndi madzi.

¹⁰ Tsiku limenelo mfumu yatsopano yochokera ku banja la Davide idzakhala chizindikiro kwa anthu a mitundu yonse. Onse adzasonkhana kwa iye, ndipo malo ake okhalapo adzakhala aulemerero.

¹¹Tsiku limenelo Ambuye adzatambalitsa dzanja lake kachiŵiri kuti aombole anthu ake otsalira ku Asiriya, ku Ejipito, ku Patirosi, ku Etiopiya, ku Elamu, ku Sinara, ku Hamati ndi pa zilumba za m'nyanja yamchere.

¹²Adzakwezera mitundu ya anthu mbendera, adzasonkhanitsa otayika a ku Israele ndi obalalika a ku Yuda kuchokera ku mbali zonse zinai za dziko lapansi.

¹³Nsanje ya Efuremu idzatha, ndipo osautsa Yuda adzaonongeka. Efuremu sadzadukidwa ndi Yuda, ndipo Yuda sadzavuta Efuremu.

¹⁴Koma Yuda ndi Efuremu adzathira nkhondo pa Afilisti kuzambwe, ndipo onsewo pamodzi adzalanda zinthu za anthu akuvuma. Adzalimbana ndi Aedomu ndi Amowabu, ndipo Aamoni adzaŵagonjera.

¹⁵ Ndipo Chauta adzaphwetsa kotheratu mwendo wa nyanja yofiira ya ku Ejipito. Adzatambalitsa dzanja lake ndipo adzaombetsa mphepo yotentha pa mtsinje wa Yufurate. Mtsinjewo udzagaŵikana m'timitsinje tisanu ndi tiŵiri, kuti anthu aoloke pouma.

¹⁶Padzakhala mseu waukulu woti ayendepo otsalira ku Asiriya aja, monga m'mene panaliri mseu waukulu woyendapo Aisraele pochoka ku Ejipito.