Read Buku Loyera - Chichewa Yes. 13 Bible Online

Yes. 13 - Buku Loyera - Chichewa bible

Yes. 13

¹ Nawu uthenga wonena za Babiloni umene Yesaya, mwana wa Amozi, adalandira kwa Mulungu.

²Kwezani mbendera yankhondo pa phiri loti see. Muŵafuulire ankhondo ndi kuŵakodola kuti adzaloŵe pa zipata za mzinda.

³Ine Mulungu mwini wake ndapereka malamulo kwa anthu anga opatulika. Ndasonkhanitsa ankhondo amphamvu, amene amakondwerera kupambana kwanga, kuti akhale zida zanga zolangira amene ndimaŵakwiyira.

⁴Tamvani phokoso kumapiriku! Likumveka ngati phokoso la chinamtindi cha anthu. Imvani chiwawa m'maufumu! Ndiye ngati mitundu ya anthu ikusonkhana pamodzi. Chauta Wamphamvuzonse akukhazika ankhondo ake mokonzekera kumenya nkhondo.

⁵Iwowo akuchokera ku maiko akutali, ku malekezero a dziko. Ndiye kuti Chauta wanyamula zida zake zija mokwiya, akubwera kuti adzaononge dziko lonse lapansi.

⁶ Lirani kwamphamvu pakuti tsiku la Chauta layandikira. Likubwera ndi chiwonongeko chochokera kwa Mphambe.

⁷Tsono manja onse adzafooka, ndipo mtima wa munthu aliyense udzachokamo.

⁸Onse adzada nkhaŵa, adzavutika ndi kumva zoŵaŵa, zoŵaŵa zake zonga zimene amazimva mkazi pochira. Azidzayang'anana mwamantha, nkhope zao zidzagwa ndi manyazi.

⁹Zoonadi, tsiku la Chauta likudza, tsiku lopanda chisoni, laukali ndi lamkwiyo. Chauta akubwera kuti asandutse dziko lapansi chipululu ndi kuwononga anthu ochimwa am'menemo.

¹⁰ Nyenyezi zonse zakumwamba sizidzaonetsanso kuŵala. Dzuŵa lidzada potuluka, ndipo mwezi sudzaŵala konse.

¹¹Chauta akuti, “Ndidzalanga anthu a dziko lapansi chifukwa cha kuipa kwao, ndidzalanga oipa chifukwa cha kuchimwa kwao. Ndidzathetsa kunyada kwa odzikuza ndipo ndidzatsitsa kudzitukumula kwa anthu ankhanza.

¹²Anthu ndidzaŵasandutsa osapezekapezeka kuposanso m'mene aliri golide wangwiro, mtundu wa anthu udzakhala wosoŵa ngati golide wa ku Ofiri.

¹³Tsono ndidzagwedeza mlengalenga, ndipo dziko lapansi lidzachoka pa maziko ake. Zonsezi zidzachitika chifukwa cha ukali wa Ine Chauta Wamphamvuzonse pa tsiku la mkwiyo wanga woopsa.

¹⁴Choncho munthu aliyense adzabwerera kwa anthu akwao, aliyense adzathaŵira ku dziko lake, ngati mbaŵala zothaŵa anthu auzimba kapenanso ngati nkhosa zopanda wozikusa.

¹⁵Aliyense amene adzapezeke adzabayidwa chipyoza. Aliyense amene adzagwidwe adzaphedwa ndi lupanga.

¹⁶Ana ao akhanda adzatswanyidwa iwo akuwona. M'nyumba mwao mudzafunkhidwa, ndipo akazi ao adzaŵachimwitsa mwakhakhamizo.

¹⁷“Ine Chauta ndidzadzutsa Amedi kuti amenyane ndi Ababiloni. Iwo safuna siliva ndipo sakondwa ndi golide.

¹⁸Adzapha anyamata ndi mauta ao. Sadzachitira chifundo ana. Mitima yao siidzamva chisoni ndi ana akhanda omwe.

¹⁹ Babiloni ufumu wake ndi waulemerero kuposa maufumu ena onse, ndipo anthu ake amaunyadira. Koma Ine Chauta ndidzaononga mzinda wa Babiloniwo monga ndidaonongera Sodomu ndi Gomora pa nthaŵi imene ndidagonjetsa mizindayo.

²⁰Anthu sadzakhalamonso kapena kukhazikikamo pa mibadwo yonse. Mluya aliyense woyendayenda sadzamangako hema kumeneko, abusa sadzaŵetako ziŵeto zao kumeneko.

²¹ Koma nyama zakuthengo ndizo zimene zidzakhale kumeneko, nyumba zake zidzadzaza ndi akadzidzi. Kuzidzayendayenda nthiŵatiŵa, ndipo atonde akuthengo azidzavinavinako.

²²M'nsanja zake muzidzalira afisi, m'nyumba zake zaufumu zokongola muzidzalira nkhandwe. Nthaŵi yake yayandikira, ndithu masiku ake ali pafupi kutha.”