Read Buku Loyera - Chichewa Yes. 15 Bible Online

Yes. 15 - Buku Loyera - Chichewa bible

Yes. 15

¹ Nawu ulosi wonena za Mowabu: Chifukwa chakuti mzinda wa Ari waonongedwa usiku umodzi wokha, dziko la Mowabu lagwa. Chifukwa chakuti mzinda wa Kiri waonongedwa usiku umodzi wokha, dziko la Mowabu lagwa.

²Anthu a ku Diboni akukwera ku nyumba ya milungu yao, akukwera ku akachisi ao kukalira. Anthu a ku Mowabu akulira mzinda wa Nebo ndi wa Medeba. Mutu uliwonse wametedwa mpala, ndevu zonse zametedwa.

³M'miseu akuvala ziguduli, pamadenga ndi m'mabwalo aliyense akulira kwamphamvu, misozi ili pupupu.

⁴Anthu a ku Hesiboni ndi ku Eleale akulira mofuula. Mau ao akumveka mpaka ku Yahazi. Nchifukwa chake asilikali a ku Mowabu akulira mofuula, ataya mtima.

⁵Inenso ndikulira Mowabu. Anthu ake othaŵa nkhondo akuthaŵira ku Zowari, ku Egilati-Selisiya. Akupita nalira ku chikweza cha Luhiti, akulira mosweka mtima pa mseu wopita ku Horonaimu.

⁶Ku mtsinje wa Nimurimu madzi adaphwa, udzu udauma, msipu udafota, palibenso chomera chobiriŵira.

⁷Nchifukwa chake anthu akuthaŵa atanyamula chuma chao. Afuna kuwoloka nacho Chigwembe cha Misondodzi.

⁸Kulira kwao kukumveka ku dziko lonse la Mowabu, kukumveka kuchokera kumpoto ku Egilaimu mpaka kumwera ku Beerelimu.

⁹Madzi a ku Diboni asakanizika ndi magazi, komabe ndidzafikitsa zovuta zina zambiri pa Diboni. Ndidzafikitsa mkango woti udzagwire aliyense wopulumuka ku Mowabu, ndiponso aliyense wotsalira m'dzikomo.