Read Buku Loyera - Chichewa Yes. 16 Bible Online

Yes. 16 - Buku Loyera - Chichewa bible

Yes. 16

¹Amowabu atumiza mphatso ya mwanawankhosa kwa wolamulira dziko. Iwo achokera ku mzinda wa Sela, adzera njira ya chipululu mpaka kukafika ku phiri la Ziyoni.

²Monga momwe mbalame zimaulukira uku ndi uku akazimwaza m'chisa, momwemonso akazi a ku Mowabu akuyendayenda ku madooko a Arinoni.

³Akuuza anthu a ku Yuda kuti, “Mutiwuze chochita, gamulani zoti tichite. Pamene dzuŵa lili pa liwombo, mutipatse mthunzi wabii ngati mdima. Mutibise ife anthu opirikitsidwa, musatipereke ife anthu othaŵa nkhondo.

⁴Othaŵa nkhondo a ku Mowabu azikhala pakati panu. Mukhale populumukira pao kwa woononga uja.” Nthaŵi ikudza pamene kupsinja sikudzakhalaponso, kuwononga kudzaleka, ndipo amene amaŵapondereza adzachoka m'dzikomo.

⁵Pamenepo mpando wachifumu udzakhazikitsidwa mwachikondi, mmodzi mwa zidzukulu za Davide adzakhalapo mokhulupirika. Iyeyo poweruza adzatsata zachilungamo, ndipo adzalimbikira kuchita zaungwiro.

⁶Anthu a ku Yuda akunena kuti, “Kudzikuza kwa Amowabu takumva, adadzikuza kwambiri. Kudzitukumula kwao, kunyada kwao, kunyodola kwao ndi kudzitama kwao, zonse nzachabechabe.”

⁷Nchifukwa chake alekeni Amowabu alire kwambiri, onsewo alire fuko lao, Alire motaya mtima chifukwa cha makeke amphesa amene ankadya ku Kiri-Haresefi.

⁸Paja minda ya ku Hesiboni idaguga, yatha pamodzi ndi minda yamphesa ya ku Sibima. Mphesa zake zinkaledzeretsa olamulira anthu a mitundu ina. Kale nthambi zake zinkafika mpaka ku Yazere ndi ku chipululu, ndiponso mpaka kutsidya kwa nyanja.

⁹Nchifukwa chake ndikulira monga m'mene akulirira anthu a mu mzinda wa Yezere chifukwa cha minda yamphesa ya ku Sibima. Inu anthu a ku Hesiboni ndi Eleale ndikukunyowetsani misozi chifukwa choti mwalephera kupeza zokolola, kaamba ka nkhondo imene yaononga zonse.

¹⁰Kukondwa ndi kusangalala kwalekeka ku minda yadzinthu. Nyimbo sizikuimbidwa, palibenso kufuula m'minda yamphesa. Palibe wopsinya vinyo mopondera mphesa, kufuula kwachimwemwe kwa nthaŵi yotchera mphesa kwalekeka.

¹¹Nchifukwa chake moyo wanga ukulira ngati pangwe, kulira Mowabu, mtima wanga ukubuula chifukwa cha kuwonongeka kwa Kiriheresi.

¹²Ngakhale Amowabu akudzipereka pakupita ku akachisi ao namakapemphera mpaka kutopa, zimenezo sizidzaŵapindulira kanthu.

¹³Mau ameneŵa ndiwo amene adalankhula Chauta kalekale kunena za Mowabu.

¹⁴Koma tsopano akunena kuti, “Zisanathe zaka zitatu, potsata m'mene amaŵerengera munthu waganyu, ulemerero wa Mowabu udzakhala utatheratu. Chigulu chachikulu cha anthu ake chidzaonongeka, ndipo opulumukapo adzakhala ochepa ndi ofooka.”