Read Buku Loyera - Chichewa Yes. 17 Bible Online

Yes. 17 - Buku Loyera - Chichewa bible

Yes. 17

¹ Nawu ulosi wonena za Damasiko: “Mzinda wa Damasiko sudzakhalanso mzinda, koma udzasanduka bwinja.

²Mizinda ya ku Siriya idzakhala yopanda anthu mpaka muyaya. Idzasanduka podyera ziŵeto zimene zizidzagonako popanda wina woziwopsa.

³Ku Efuremu sikudzakhalanso linga, ndipo ku Damasiko sikudzakhalanso ufumu. Otsalira a ku Siriya adzachotsedwa ulemu monga anthu a ku Israele,” akutero Chauta Wamphamvuzonse.

⁴“Tsiku limenelo ulemerero wa Yakobe udzachepetsedwa, ndipo chuma chake chidzasanduka umphaŵi.

⁵Israele adzakhala ngati munda watirigu umene adatsiriza kukolola. Adzakhalanso ngati munda wa m'chigwa cha Refaimu, anthu atatha kukunkha ngala za tirigu.

⁶Ochepa okha adzatsalako, monga pogwedeza mtengo wa olivi, zimatsalako ndithu zipatso ziŵiri kapena zitatu pa nthambi ya pamwamba penipeni, kapenanso zinai kapena zisanu pa nthambi zam'munsi,” akutero Chauta, Mulungu wa Israele.

⁷Tsiku limenelo anthu adzayang'ana Mlengi wao, ndipo adzatembenukira kwa Woyera uja wa Israele, kufuna thandizo.

⁸Sadzakhulupiriranso maguwa amene iwo omwe adamanga, kapenanso kudalira zimene adapanga ndi manja ao, ngakhale mafano ofanizira Asera[6] kapena maguwa ofukizapo lubani.

⁹Tsiku limenelo mizinda yamphamvu ya Aisraele idzasiyidwa monga mizinda ya Aamori ndi ya Ahivi imene anthu adaaisiya pothaŵa Aisraelewo. Ndipo idzakhala mabwinja.

¹⁰Inu Aisraele, mwaiŵala Mulungu Mpulumutsi wanu, simudamkumbukire Iye amene ndiye thanthwe lokupulumutsani. M'malo mwake, mumabzala mbeu zabwino, kubzalira milungu yachilendo,

¹¹Mumati zikule tsiku lomwe mwabzalalo, mumati zituluke maluŵa m'maŵa momwe mwazibzalamo, komabe zimene mudzakololezo zidzatha pa tsiku lamavuto, ndipo mazunzo ake adzakhala osatha.

¹²Ha, anthu a mitundu yambiri akusokosa kwambiri! Phokoso lao lili ngati kukokoma kwa nyanja! Ha, lumbwe la anthu a mitundu ina, likusokosa ngati madzi amphamvu!

¹³Ankhondo a mitundu ina akubwera ndi mkokomo ngati wa madzi ambiri. Koma Mulungu akuŵadzudzula, ndipo iwo adzathaŵira kutali. Adzapirikitsidwa ngati mankhusu ouluka ndi mphepo pa mapiri, ngati fumbi la kamvulumvulu namondwe asanayambe.

¹⁴Pa nthaŵi yamadzulo ndi oopsa! Koma kusanache, onse azimirira. Umu ndimo m'mene zidzaŵachitire anthu otilanda zathu. Limeneli ndilo tsoka la anthu otibera zinthu zathu.