Read Buku Loyera - Chichewa Yes. 18 Bible Online

Yes. 18 - Buku Loyera - Chichewa bible

Yes. 18

¹ Tsoka kwa anthu okhala ku dziko la patsidya pa mitsinje ya Etiopiya! Kumeneko kumamveka mkokomo wa mapiko.

²Kuchokera ku dzikolo amatuma akazembe pa mtsinje wa Nailo m'mabwato agumbwa omangoyandama pa madzi. Tsono pitani inu amithenga aliŵiro kwa mtundu wa anthu ataliatali ndi a khungu losalala, oopedwa ndi anthu akufupi ndi akutali omwe, mtundu wamphamvu ndi wogonjetsa mitundu ina, anthu amene dziko lao nlodukanadukana ndi mitsinje.

³Inu nonse anthu a pa dziko lapansi, inu amene mumakhala pansi pano, pamene mbendera yakwezedwa pa mapiri, muyang'ane! Lipenga likamalira, mumve!

⁴Pakuti Chauta adandiwuza kuti, “Kumene ndili Ineko, ndidzangoyang'ana pansi mwakachetechete, monga m'mene dzuŵa limaŵalira nthaŵi yotentha, monganso m'mene amagwera mame usiku pa nthaŵi yakholola.”

⁵Anthu asanayambe kukolola, maluŵa atayoyoka ndipo mphesa zitayamba kupsa, Iye adzadula mphukira ndi chigwandali, ndipo adzasadza nthambi zotambalala.

⁶Mitembo ya ankhondowo adzasiyira mbalame zam'mapiri zodya nyama, ndiponso zilombo zakuthengo. Mbalame zidzaidya pa nthaŵi ya chilimwe, ndipo zilombo zakuthengo zidzaidya pa nthaŵi ya chisanu.

⁷Pa nthaŵi imeneyo anthu adzabwera ndi zopereka kwa Chauta Wamphamvuzonse. Anthu ake adzakhala aatali ndi a khungu losalala, oopedwa ndi anthu akufupi ndi akutali omwe, mtundu wamphamvu ndi wogonjetsa mitundu ina, anthu amene dziko lao ndi lodukanadukana ndi mitsinje. Zoperekazo adzabwera nazo ku phiri la Ziyoni kumene anthu amapembedza Chauta Wamphamvuzonse.