Read Buku Loyera - Chichewa Yes. 19 Bible Online

Yes. 19 - Buku Loyera - Chichewa bible

Yes. 19

¹ Nawu ulosi wonena za Ejipito. Chauta wakwera pa mtambo wothamanga, akupita ku Ejipito. Mafano a ku Ejipito adzanjenjemera pamaso pake, ndipo Aejipitowo mitima yao idzachokamo ndi mantha.

²Tsono Ine ndidzautsa Aejipito kuti amenyane okhaokha. Ndipo adzamenyana, mbale ndi mbale wake, mnansi ndi mnansi wake, mzinda ndi mzinda unzake, ndiponso ufumu ndi ufumu unzake.

³Ndidzalepheretsa zolinga za Aejipito mwakuti adzataya mtima. Tsono adzapempha nzeru kwa mafano, amaula, olankhula ndi mizimu, ndiponso anyanga.

⁴Ndidzapereka Aejipito kwa wolamulira wankhalwe. Ndipo mfumu yoopsa ndiyo idzaŵalamulira, akutero Ambuye, Chauta Wamphamvuzonse.

⁵Madzi a mtsinje wa Nailo adzaphwa, ndipo mtsinjewo udzauma kuchita kuti gwaa.

⁶Ngalande zake zizidzanunkha, ndipo mphanda za mtsinjewo ku Ejipito zidzayamba kuchepa kenaka nkuuma. Bango ndi mlulu zidzafota,

⁷ndipo zomera zonse za m'mphepete mwa Nailo ndi ku mathiriro ake, zidzafa. Zonse zobzalidwa m'mbali mwa Nailo zidzauma, zidzauluzika, zosaonekanso.

⁸Asodzi adzadandaula ndi kulira. Onse amene amaŵedza mu mtsinje wa Nailo adzamva chisoni. Onse amene amaponya khoka m'madzi adzalira.

⁹Anthu ogwira ntchito yopota thonje, ndiponso anthu oomba nsalu zoyera, adzataya mtima.

¹⁰Akatswiri opanga nsalu adzangoti kakasi, ndipo anthu ogwira ntchito yolipidwa adzangoti m'nkhongono zii.

¹¹Akalonga a mu mzinda wa Zowani ndi zitsilu. Aphungu anzeru a Farao amalangiza zopusa. Kodi mungathe kumuuza bwanji Farao kunena kuti, “Ine ndine mmodzi mwa anthu anzeru, wophunzira wa mafumu akale?”

¹²Iwe Farao, anzeru ako ali kuti? Abwere kuno msanga kuti akudziŵitse zimene Chauta Wamphamvuzonse akunena zotsutsa Ejipito.

¹³Akalonga a mu mzinda wa Zowani asanduka zitsilu, ndipo akalonga a ku Memfisi anyengedwa. Amene ali atsogoleri a Aejipito alisokeza dziko lao.

¹⁴Chauta waŵasokoneza Aejipito. Iwo akuchita dzandidzandi pa ntchito zao zonse, ngati chidakwa choterereka pa masanzi ake omwe.

¹⁵Ndipo palibe wina aliyense mu Ejipito amene angachitepo kanthu, wolemera kapena wosauka, wotchuka kapena munthu wamba.

¹⁶Tsiku limenelo Aejipito adzakhala ngati akazi, adzanjenjemera ndi kuchita mantha, akadzaona Chauta Wamphamvuzonse akusamula dzanja kufuna kuŵalanga.

¹⁷Dziko la Yuda lidzaopsa dziko la Ejipito. Ndipo nthaŵi zonse Aejipito akadzamva za Yuda, adzaopsedwa chifukwa cha zimene Chauta Wamphamvuzonse afuna kuŵachita Aejipitowo kudzera mwa Yudayo.

¹⁸Tsiku limenelo ku dziko la Ejipito kudzakhala mizinda isanu yolankhula Chihebri, ndipo anthu ake adzalumbira kwa Chauta Wamphamvuzonse kuti adzamtumikira. Umodzi mwa mizindayo udzatchulidwa “Mzinda wa Dzuŵa.”

¹⁹Tsiku limenelo m'kati mwa dziko la Ejipito mudzakhala guwa la Chauta, ndipo kufupi ndi malire adzaimikirako Chauta mwala wachikumbutso.

²⁰Zimenezo zidzakhala umboni wozindikiritsa kuti Chauta Wamphamvuzonse alimo m'dziko la Ejipito. Aejipito akadzalira kwa Chauta pa zovuta zao, Iye adzatuma mpulumutsi kuti aŵateteze ndi kuŵapulumutsa.

²¹Tsono Chauta adzadziwulula kwa Aejipito, ndipo tsiku limenelo Aejipitowo adzadziŵa Chauta. Adzapembedza Chauta potsira nsembe ndi kupereka zopereka. Adzachita malonjezo aakulu kwa Chauta ndipo adzachitadi zimene adalonjezazo.

²²Ngakhale Chauta adzaŵalange Aejipito dzolimba, adzaŵalanga inde, koma pambuyo pake adzaŵachiritsa. Iwo adzatembenukira kwa Chauta, ndipo Iye adzaŵamvera ndi kuŵachiritsa.

²³Tsiku limenelo kudzakhala mseu waukulu wochoka ku Ejipito kupita ku Asiriya. Aasiriya adzayendera Aejipito, Aejipitonso adzayendera Aasiriya. Ndipo Aejipito ndi Aasiriya adzapembedza pamodzi.

²⁴Tsiku limenelo Israele adzakhala pamodzi ndi Ejipito ndi Asiriya, ndipo maiko atatuwo adzakhala dalitso pa dziko lonse lapansi.

²⁵Chauta Wamphamvuzonse adzaŵadalitsa ndi mau aŵa akuti, “Adalitsidwe Aejipito, anthu anga; adalitsidwe Aasiriya, ntchito ya manja anga; adalitsidwe Aisraele, osankhidwa anga.”