Read Buku Loyera - Chichewa Yes. 20 Bible Online

Yes. 20 - Buku Loyera - Chichewa bible

Yes. 20

¹Chaka china mtsogoleri wankhondo wotumidwa ndi Sarigoni, mfumu ya ku Asiriya, adaadzalimbana ndi mzinda wa Asidodi, naulanda.

²Nthaŵi imeneyo nkuti Chauta atalankhula kale kudzera mwa Yesaya mwana wa Amozi. Adaanena kuti, “Pita ukavule chiguduli m'chiwuno mwako ndi nsapato kuphazi kwako.” Ndipo iyeyo adaachitadi zimenezo. Ankangoyenda maliseche ndiponso opanda nsapato.

³Tsono mzinda wa Asidodi uja utalandidwa, Chauta adati, “Yesaya mtumiki wanga wakhala akuyenda maliseche ndiponso opanda nsapato zaka zitatu zapitazi. Chimenechi chakhala chizindikiro kwa Aejipito ndi Aetiopiya cholosera zimene zilikudza.

⁴Ndimo m'mene mfumu ya ku Asiriya idzachitire: idzatenga akapolo a ku Ejipito ndi opirikitsidwa ku Etiopiya, anyamata ndi okalamba, nidzaŵayendetsa ali maliseche ndi opanda nsapato, matako ao ali pamtunda. Zimenezi zidzachititsa manyazi Aejipitowo.

⁵Tsono onse amene ankadalira dziko la Etiopiya ndiponso amene ankakhulupirira Ejipito, adzamva chisoni ndi kuchita manyazi.

⁶Tsiku limenelo anthu okhala m'mphepete mwa nyanja adzati, ‘Onanitu zimene zachitikira anthu aja tinkaŵakhulupiriraŵa, amene tinkathaŵirako kuti atithandize ndi kutipulumutsa kwa mfumu ya ku Asiriya! Ha! Tsopano tonsefe tidzapulumuka bwanji?’ ”