Read Buku Loyera - Chichewa Yes. 21 Bible Online

Yes. 21 - Buku Loyera - Chichewa bible

Yes. 21

¹Nawu ulosi wonena za chipululu cha m'mbali mwa nyanja. Tsoka lidzafika kuchokera ku dziko lochititsa mantha monga m'mene kamvulumvulu amakunthira kuchokera ku chipululu.

²Ndaona zinthu zoopsa m'masomphenya: wofunkha akufunkha, woononga akuwononga. Ankhondo a ku Elamu, yambani nkhondo! Ankhondo a ku Mediya, zingani mzindawo. Ine Chauta ndidzathetsa mavuto onse amene adadza ndi Babiloni.

³Nchifukwa chake zimene ndidazimva ndi kuziwona m'masomphenya zija zandichititsa mantha, ndipo ndamva nazo ululu ngati mkazi amene akuchira. Ndikuvutika nazo zimene ndilikumva. Ndikuda nazo nkhaŵa zimene ndikuwonazi.

⁴Mtima wanga ukugunda, ndipo ndikunjenjemera ndi mantha. Ndakhala ndikulakalaka chisisira, koma chisisiracho chandibweretsera zoopsa.

⁵Iwo akukonza tebulo ndi kuyala mphasa, alikudya, alikumwa. Mwadzidzidzi alikumva mau akuti, Dzukani inu ankhondo, pakani mafuta zishango zanu!

⁶Pakuti Ambuye andiwuza kuti, “Pita, kaike mlonda kuti azinena zimene akuwona.

⁷Akamaona anthu aŵiriaŵiri okwera pa akavalo, okwera pa abulu ndi okwera pa ngamira, mlondayo akhale tcheru, tcherutu zedi!”

⁸Apo mlondayo adafuula kuti, “Ambuye, usana wonse ndimakhala pa nsanja, usiku wonse ndimakhala pa malo anga olondera.

⁹ Ndidangoona kukubwera anthu okwera pa akavalo, akuyenda aŵiriaŵiri. Mmodzi mwa iwo adati, ‘Ii, wagwa, wagwatu uku Babiloni! Mafano onse a milungu yake aphwanyikira pansi.’ ”

¹⁰Ndiye abale anga Aisraele, inu opunthidwa ndi opetedwa ngati tirigu, tsopano ndakuuzani uthenga umene ndamva kwa Chauta Wamphamvuzonse, Mulungu wa Israele.

¹¹Nawu ulosi wonena za Edomu: Wina akundilankhula mofuula kuchokera ku Edomu, akuti, “Iwe mlonda, usikuwu utha liti? Iwe mlonda, utha liti kodi usikuwu?”

¹²Mlonda akuti, “Kulikucha, koma kudanso. Ukafuna kufunsanso, ubwerenso udzafunse.”

¹³Nawu ulosi wonena za Arabiya: Inu anthu a ku Dedani oyenda pa gulu, amene usiku mumagona m'malunje a ku Arabiya,

¹⁴muŵapatse madzi anthu aludzu kuti amwe. Inu anthu a ku Tema, muŵapatse chakudya anthu othaŵa nkhondo.

¹⁵Pakuti akuthaŵa malupanga, malupanga osololasolola, mauta okokakoka, ndiponso nkhondo yoopsa.

¹⁶Ambuye adandiwuza kuti, “Chatsala chaka chimodzi, potsata m'mene amaŵerengera munthu waganyu, ndipo ulemu wonse wa anthu a ku Kedara udzatheratu.

¹⁷Mwa anthu onse amphamvu a ku Kedara okoka mauta, opulumuka adzakhala oŵerengeka.” Chauta, Mulungu wa Israele, watero.