Read Buku Loyera - Chichewa Yes. 22 Bible Online

Yes. 22 - Buku Loyera - Chichewa bible

Yes. 22

¹Nawu ulosi wonena za chigwa chooneramo zinthu m'masomphenya: Kodi chachitika nchiyani kuti nonse mukwere pa madenga?

²Ndinu anthu osokera, okhala mu mzinda wachiwawa ndi waphokoso. Anthu anu ophedwa sadaphedwe ndi lupanga, kapena kufera pankhondo.

³Atsogoleri anu onse adathaŵa nagwidwa, osaponyako ndi muvi umodzi womwe. Nonsenu amene mudapezeka mudagwidwa, ngakhale mudaathaŵiratu adani akali kutali.

⁴Nchifukwa chake ndidati, “Muchoke, mundileke ndilire ndi mtima woŵaŵa. Musayese kundipepesa pa za kuwonongeka kwa abale anga.”

⁵Nthaŵi ino ndi yamavuto, yogonjetsedwa ndiponso yachisokonezo m'chigwa chooneramo zinthu m'masomphenya. Ambuye, Chauta Wamphamvuzonse, ndiwo atichita zimenezi. Malinga adagumuka ndipo anthu adakalirira ku mapiri.

⁶Ankhondo a ku Elamu adadza atakwera pa akavalo, m'manja muli mauta ndi mivi, ndipo ankhondo a ku Kiri anali okonzeka ndi zishango zao.

⁷Zigwa zanu zachonde zinali zodzaza ndi magaleta, ndipo asilikali okwera pa akavalo adakaima kumaso kwa zipata za mzinda.

⁸Zonse zoteteza Yuda zidalandidwa. Tsiku limenelo mudayang'ana ku zida zankhondo zimene zinali m'Nyumba ya Nkhalango ija.

⁹Mudapeza malo ena m'makoma a mzinda wa Yerusalemu ali ogumuka. Mudasunga madzi m'chidziŵe chakunsi.

¹⁰Mudaŵerenga nyumba zonse mu mzinda wa Yerusalemu, ndipo mudagwetsa zina kuti mupeze miyala yokonzera makoma a mzindawo.

¹¹Pakati pa makoma aŵiri mudamangapo chitsime chosungiramo madzi ochokera ku chidziŵe chakale. Koma simudaganizeko za Mulungu amene adachititsa zimenezi, simudasamaleko za Iye amene adazikonza kale lomwe.

¹²Nthaŵi imeneyo Ambuye, Chauta Wamphamvuzonse, adakuitanani kuti mulire ndi kudza misozi, kumeta ndi kuvala ziguduli.

¹³ Koma inu mudakondwa ndi kusangalala, mudapha ng'ombe ndi nkhosa ndi kuzidya, ndiponso mudamwa vinyo. Mudati, “Tidye, timwe, poti maŵa tifa.”

¹⁴Chauta Wamphamvuzonse adandiwululira pondinong'oneza m'khutu kuti, “Ndithudi, tchimo limeneli sindidzakukhululukirani mpaka kufa kwanu,” akutero Ambuye, Chauta Wamphamvuzonse.

¹⁵Ambuye, Chauta Wamphamvuzonse, adandiwuza kuti ndipite kwa Sebina, kapitao woyang'anira nyumba yaufumu, kukamufunsa kuti,

¹⁶“Kodi ukuchita chiyani kuno? Walimba mtima bwanji kuti udzikumbire manda kuno, kudzikumbira manda pa phiri, ndi kudzisemera mopumulira m'thanthwe?

¹⁷Chauta adzakugwira dzolimba ndi kukuponya mwamphamvu, iweyo wanyongawe.

¹⁸Adzakusandutsa ngati mpira ndipo adzakuponya m'dziko lalikulu. Kumeneko nkumene ukafere, ndipo magaleta ako amene unkanyadira adzatsalira komwekonso, iwe wochititsa manyazi nyumba ya mbuye wakowe.

¹⁹Chauta adzakuchotsa pa ukapitao wako, ndipo adzakutsitsa pakuthetsa udindo wako.”

²⁰Chauta adauza Sebina kuti, “Tsiku limenelo ndidzaitana mtumiki wanga Eliyakimu, mwana wa Hilikiya.

²¹Ndidzam'veka mkanjo wako ndi lamba wako ndi kumpatsa ulamuliro wako. Tsono adzalamulira anthu onse okhala mu Yerusalemu ndiponso a fuko la Yuda.

²² Ndidzampatsa makii a ulamuliro wa pa banja la mfumu Davide. Akadzatsekula, palibe amene adzatseke. Ndipo adzatseka, popanda wina wotsekula.

²³Ndidzamulimbitsa ngati chikhomo pa udindo wakewo, ndipo adzakhala wopatsa ulemu kwa banja la atate ake.

²⁴“Koma ana ndi adzukulu ake adzakhala katundu wolemera pa iye m'banja la atate ake, monga ngati ziŵiya zonse zimene zimapachikidwa pa chikhomo.

²⁵Tsiku limenelo chikhomo chokhoma dzolimba chija chidzasukusa, chidzazuka ndipo chidzagwa. Tsono zonse zopachikidwa pachikhomopo zidzaonongedwa.” Akutero Chauta Wamphamvuzonse.