Read Buku Loyera - Chichewa Yes. 23 Bible Online

Yes. 23 - Buku Loyera - Chichewa bible

Yes. 23

¹ Nawu ulosi wonena za Tiro. Fuulani mwachisoni, inu oyendetsa zombo za ku Tarisisi! Pakuti mzinda wa Tiro waonongeka, kulibenso nyumba kapena dooko! Zimenezi adazimva pochokera ku Kitimu.

²Khalani chete, inu anthu okhala m'mphepete mwa nyanja, inu amalonda a ku Sidoni! Amithenga anu adaoloka nyanja, ndipo adayenda pa nyanja zazikulu.

³Phindu lanu linali tirigu wa ku Sihore, zokolola za ku Nailo, ndipo munkachita malonda ndi anthu a mitundu yonse.

⁴Chita manyazi, iwe Sidoni, mzinda wamalinga wakunyanja, chifukwa nyanjayo yalankhula, yanena kuti, “Sindinamvepo zoŵaŵa za kubala, sindinaberekepo ana, ndipo sindinalerepo mwana, wamwamuna kapena wamkazi.”

⁵Aejipito adzadzidzimuka ndi kuchita mantha, akadzamva kuti Tiro adaonongeka.

⁶Thaŵirani ku Tarisisi, fuulani mwachisoni, inu okhala m'mphepete mwa nyanja.

⁷Kodi ndi uwu mzinda wa Tiro wotchukawu, mzinda wakalekale uja? Kodi ndi uwu mzinda uja unkatumiza anthu kuwoloka nyanja kukakhala ku maiko ena?

⁸Kodi ndani amene adakonza zimenezi kuti zigwere Tiro, mzinda uja wopereka ukulu kwa anthuwu, umene amalonda ake anali akalonga ndiponso otchuka kwambiri pa dziko lonse lapansi?

⁹Chauta Wamphamvuzonse ndiye adakonza zimenezi kuti athetse kunyada kwao, kuti atsitse anthu onse olemekezeka a pansi pano.

¹⁰Mubalalike m'dziko mwanu ngati mtsinje wa Nailo, inu anthu a ku Tarisisi. Palibenso china choti nkukutchinjirizani.

¹¹Chauta watambalitsa dzanja lake kuloza nyanja ndipo wagwedeza maufumu. Walamula a ku Kanani kuti agwetse malinga ao.

¹²Ndipo adati, “Simudzakondwanso, inu anthu a mu mzinda wa Sidoni, mudzapanikizidwa, ndipo ngakhale muthaŵire ku Kitimu, nkumeneko komwe simukapeza mpumulo.”

¹³Onani dziko la Ababiloni, anthu ameneŵa palibenso, adatheratu. Aasiriya ndi amene asandutsa Tiro kuti akhale malo a zilombo. Adamanga nsanja zao zankhondo, adagumula malinga ake nasandutsa mzindawo bwinja.

¹⁴Lirani kwambiri, inu oyendetsa zombo a ku Tarisisi, chifukwa mzinda wanu wamalinga wagwetsedwa.

¹⁵Nthaŵi ikubwera pamene Tiro adzaiŵalika pa zaka makumi asanu ndi aŵiri, imene ili ngati nthaŵi ya moyo wonse wa mfumu imodzi. Zitatha zaka zimenezo, Tiro adzakhala ngati mkazi wachiwerewere uja woimbidwa nyimbo ija yakuti:

¹⁶“Tenga zeze wako, uzungulire mzinda, iwe mkazi wachiwerewere woiŵalika. Uimbe zezeyo mokometsera, uimbenso nyimbo zako zija, kuti anthu akukumbukire.”

¹⁷Zitatha zaka makumi asanu ndi aŵiri, Chauta adzachitapo kanthu pa Tiro. Mzindawo udzabwerera ku ganyu wake wakale uja. Ndipo adzachita zachiwerewere ndi maufumu a dziko lonse lapansi.

¹⁸Koma phindu lake ndi malipiro ake adzazipereka kwa Chauta. Sadzachita nazo kaligwiritsa kapena kuzikundika, koma adzazipereka kwa otumikira Chauta, kuti agule zakudya zambiri ndi zovala zokongola.