Read Buku Loyera - Chichewa Yes. 24 Bible Online

Yes. 24 - Buku Loyera - Chichewa bible

Yes. 24

¹Zoona, Chauta adzaononga dziko lapansi ndi kulisandutsa chipululu. Adzalisakaza, nadzamwaza anthu ake onse.

²Aliyense adzaona zimodzimodzi: ansembe ndi anthu, akapolo aamuna ndi ambuyao aamuna, adzakazi ndi ambuyao aakazi, ogula ndi ogulitsa, obwereka ndi oŵabwereka, ndiponso okongola ndi okongoza.

³Dziko lapansi lidzaonongedwa kwathunthu, lidzasakazikiratu, pakuti Chauta wanena zimenezi.

⁴Dziko likulira ndipo likufota. Dziko lonse lapansi likuvutika ndipo likuuma. Mlengalenga ukuvutika pamodzi ndi dziko lapansi.

⁵Anthu aipitsa dziko lapansi posatsata malamulo a Mulungu, ponyoza mau ake, ndipo pophwanya chipangano chamuyaya chimene Iye adapangana nawo.

⁶Nchifukwa chake Mulungu watemberera dziko lapansi, anthu am'dzikomo akuzunzika chifukwa cha machimo ao. Iwo amalizika, ndipo atsala ndi oŵerengeka okha.

⁷Mphesa zikuuma, ndipo vinyo akusoŵa. Aliyense amene ankasangalala ali ndi chisoni.

⁸Kulira kokometsera kwa ting'oma tao kwatha, phokoso la anthu osangalala latha, zeze wosangalatsa uja wati zii.

⁹Anthu saimbanso pomwa vinyo, akamamwa zaukali zimaŵaŵa m'kamwa mwao.

¹⁰Mu mzinda wachisokonezo uja zonse zaonongedwa, nyumba iliyonse yatsekedwa, kotero kuti palibe wotha kuloŵamo.

¹¹Anthu akufuula m'miseu chifukwa cha kusoŵa kwa vinyo. Chimwemwe chonse chatheratu, palibenso chisangalalo pa dziko lonse lapansi.

¹²Mzinda wasanduka bwinja, zipata zake zagumuka.

¹³Zimenezi ndizo zimene zidzachitikire mtundu uli wonse wa pa dziko lapansi. Kudzakhala ngati khunkha la olivi ndi khunkha la mphesa, pamene kholola latha.

¹⁴Koma otsala aja adzafuula ndi kuimba mokondwa. Akuzambwe adzatamanda ukulu wa Chauta.

¹⁵Nchifukwa chake inu akuvuma, tamandani Chauta. Anthu okhala m'mphepete mwa nyanja, yamikani Ambuye, Mulungu wa Israele.

¹⁶Kuchokera ku maiko akutali tilikumva nyimbo zotamanda, zoyamika Wolungama uja. Koma ine ndikuti: Ndatheratu, ndatheratu! Tsoka kwa ine! Onyenga akupitirizabe ndipo kunyenga kwao kukupitabe m'tsogolo.

¹⁷Inu anthu a dziko lapansi, zoopsa, mbuna ndi misampha zikukudikirani.

¹⁸Aliyense wothaŵa phokoso la zoopsazo adzagwa m'mbuna, ndipo wotuluka m'mbunamo adzakodwa mumsampha. Kudzagwa mvula yachigumula ndipo maziko onse a dziko adzagwedezeka.

¹⁹Dziko lapansi lidzathyokathyoka, lidzang'ambika kwathunthu ndi kugwedezeka kwamphamvu.

²⁰Dziko lapansi lidzadzandira ngati munthu woledzera, lidzagwedezeka ngati chisimba nthaŵi ya mkuntho. Dziko lapansi lalemedwa ndi zoipa zake, lidzagwa ndipo silidzaukanso.

²¹Tsiku limenelo Chauta adzalanga kumwamba zamphamvu zakumwamba, ndipo pansi pano mafumu a pansi pano.

²²Mulungu adzasonkhanitsa mafumu onse pamodzi, ngati am'ndende amene ali m'dzenje. Adzaŵatsekera m'ndende, ndipo patapita nthaŵi yaitali, adzalangidwa.

²³Mwezi udzanyala, ndipo dzuŵa lidzachita manyazi, pakuti Chauta Wamphamvuzonse adzakhala mfumu. Adzalamulira pa phiri la Ziyoni ndi ku Yerusalemu, ndipo adzaonetsa ulemerero wake pamaso pa akuluakulu.