Read Buku Loyera - Chichewa Yes. 25 Bible Online

Yes. 25 - Buku Loyera - Chichewa bible

Yes. 25

¹Inu Chauta, ndinu Mulungu wanga. Ndidzakulemekezani ndi kutamanda dzina lanu. Pakuti mwachita zinthu zodabwitsa mokhulupirika ndi motsimikiza, zinthu zimene mudakonzeratu kalekale.

²Mzinda uja mwausandutsa mulu wamiyala, Mzinda wamalinga uja mwausandutsa bwinja. Nyumba zamphamvu za adani athu si mzindanso tsopano, sizidzamangidwanso.

³Nchifukwa chake anthu amphamvu a mitundu yonse adzakutamandani, m'mizinda ya mitundu yankhalwe anthu adzakuwopani.

⁴Inu mwakhala ngati ngaka kwa anthu osauka, mwakhala ngati linga kwa anthu osoŵa pa nthaŵi yamavuto. Mwakhala ngati pobisalirapo namondwe, ndiponso ngati mthunzi wousirapo dzuŵa. Anthu ankhalwe ali ngati namondwe woomba pa khoma, ngati chitungu m'dziko louma.

⁵Inu mumaletsa phokoso la anthu achilendo. Monga momwe mthunzi wa mtambo umathetsera kutentha, momwemonso mumaletsa nyimbo ya anthu ankhalwe.

⁶Pa phiri ili la Ziyoni Chauta Wamphamvuzonse adzakonzera anthu a mitundu yonse phwando la zakudya zokoma ndi la vinyo wabwino, phwando la nyama yonona ndi la vinyo amene wafikapo.

⁷Pa phiri limeneli adzachotsa chisoni chimene chaphimba anthu a mitundu yonse, chimene chakuta mafuko onse.

⁸Chauta adzathetsa imfa mpaka muyaya, adzapukuta misozi m'maso mwa aliyense, ndipo adzachotsa manyazi a anthu ake pa dziko lonse lapansi. Watero Chauta.

⁹Tsiku limenelo aliyense adzati, “Uyu ndiye Mulungu wathu! Tidamkhulupirira kuti adzatipulumutsa. Iyeyu ndiye Chauta. Tidamkhulupirira, tsopano tiyeni tikondwe ndi kusangalala chifukwa choti watipulumutsadi.”

¹⁰ Chauta adzateteza phirili ndi dzanja lake, ndipo Amowabu adzaŵapondereza pomwe aliripo, monga momwe manyowa amaŵaponderezera m'dzenje.

¹¹Amowabuwo adzayesa kutambasula manja ao monga amachitira munthu wosambira. Koma Chauta adzathetsa kudzitama kwao ndiponso luso la manja ao.

¹²Adzagumula malinga ao ataliatali. Adzaŵagwetsa, kenaka adzaŵaponya pansi, pafumbi penipeni.