Read Buku Loyera - Chichewa Yes. 26 Bible Online

Yes. 26 - Buku Loyera - Chichewa bible

Yes. 26

¹Tsiku limenelo m'dziko la Yuda anthu adzaimba nyimbo iyi yakuti, “Tili ndi mzinda wamphamvu, Mulungu amautchinjiriza ndi zipupa ndi malinga.

²Tsekulani zipata za mzinda, kuti mtundu wotsata malamulo ndi wokhulupirika uloŵe.

³Inu Chauta, mumapatsa mtendere weniweni kwa amene ali ndi mtima wokhazikika, chifukwa chokhulupirira Inu.

⁴Inu anthu, mukhulupirire Chauta mpaka muyaya, chifukwa chakuti Chauta Mulungu ndiye thanthwe losatha.

⁵Iye watsitsa anthu okhala pa malo okwera, waononga mzinda wamphamvu uja. Wagumula zipupa zake, ndipo waugwetsera pansi, pafumbi penipeni.

⁶Mapazi a anthu akuupondereza, mapazi a anthu otsika, mapazi a anthu osauka.”

⁷Inu Chauta ndinu Wolungama, mumasalaza njira ya munthu womvera inu,

⁸Inu Chauta, ife timatsata njira ya malamulo anu, ndipo timakhulupirira Inu. Mtima wathu umangolakalaka kukumbukira ndi kulemekeza dzina lanu.

⁹Mtima wanga wonse umalakalaka Inu usiku, mzimu wanga m'kati mwa ine umakufunafunani. Pamene muweruza dziko lapansi, anthu onse okhalamo amaphunzira chilungamo.

¹⁰Munthu woipa mukamchitira zabwino, saphunzira zachilungamo. Amachita zoipa m'dziko lachilungamoli, ndipo amalephera kuzindikira ukulu wa Chauta.

¹¹ Inu Chauta, mwasamula dzanja lanu kuti muŵalange, koma iwo sakuliwona. Anthuwo achite manyazi poona m'mene mumakondera anthu anu, ndipo moto umene mwasonkhera adani anu, uŵapsereze.

¹²Inu Chauta, mumatipatsa mtendere, chifukwa choti zonse zimene timakhoza, mumatichitira ndinu.

¹³Chauta, Mulungu wathu, ife ngakhale takhala tikulamulidwa ndi ena, sitilemekeza dzina lina, koma lanu lokha.

¹⁴Ankhanza aja tsopano adafa, sadzakhalanso ndi moyo, sadzabweranso kudzativutitsa, pakuti mwaŵalanga ndi kuŵaonongeratu. Palibenso amene amaŵakumbukira.

¹⁵Koma Inu Chauta, mwachulukitsa mtundu wathu, mwaukulitsa ndithu. Mwakuza dziko lathu, mwalandirapo ulemu mbali zake zonse.

¹⁶Inu Chauta, pamene anali m'masautso, anthu anu adakufunafunani, pamene munkaŵalanga, adapemphera kwa Inu.

¹⁷Inu Chauta, mwatiliritsa monga momwe amalirira mkazi pa nthaŵi yobala mwana.

¹⁸Ife tidamva ululu, ndipo tidavutika ngati mkazi pa nthaŵi yobala mwana, koma sitidapindule kanthu. Sitidadzetse chipulumutso m'dziko lapansi pano, sitidabadwitse anthu atsopano pansi pano.

¹⁹Anthu anu amene adafa adzakhalanso ndi moyo, matupi ao adzauka. Inu nonse amene muli m'manda, dzukani ndi kuimba mosangalala. Monga momwe mame amafeŵetsera pansi kutsitsimutsa zomera, momwemonso Chauta adzaukitsa anthu amene adafa kale.

²⁰Abale anga, pitani mukaloŵe m'nyumba zanu, ndipo mukadzitsekere. Mubisale pang'ono mpaka mkwiyo wa Chauta utatha.

²¹Chauta akubwera kuchokera kumene amakhala, akubwera kudzalanga anthu a dziko lapansi chifukwa cha machimo ao. Magazi okhetsedwa pa dziko lapansi adzaululuka, mitembo ya anthu ophedwa sidzabisikanso.